Македонија како крстосница во Југоисточна Европа е идеален производствен и дистрибутивен центар до европските пазари, која нуди пристап до повеќе од 650 милиони луѓе, порача министерот за странски инвестиции, Бил Павлески на Глобалниот партнерски самит во Агра, Утар Прадеш.

На Самитот, кој е еден од најголемите по економскиот форум во Давос, министерот Павлески како главен излагач се обрати пред повеќе од 5.000 компании.

Во рамки на Самитот, министерот Павлески се обрати на пленарната сесија насловена: „Брзорастечки глобален синџир на вредности: Каде се вклопуваат економиите во развој?“.

Во своето обраќање тој рече дека Македонија како земја која се наоѓа на крстосница во Југоисточна Европа, претставува идеален производствен и дистрибутивен центар до европските пазари. Сето тоа произлегува од севкупните конкурентни производствени трошоци, даночните ослободувања кои ги нуди нашата земја, како и потпишаните договори за слободна трговија кои на интернационалните компании им овозможуваат влез на пазар од повеќе од 650 милиони луѓе.

Годинешниот Самит е во организација на Министерството за трговија и индустрија, Владата на Индија и Конфедерацијата на индиската индустрија (CII).

На Самитот се дискутираше за неколку клучни прашања, меѓу кои враќање на макроекономската стабилност преку обезбедување фискална дисциплина, финансиска стабилност и поттикнување на развој и раст преку создавање на подобра конкурентска основа за инвестиции во областа на образованието, технологијата и иновациите.

Во владината делегација предводена од министерот Павлески се и директорот на Агенцијата за странски инвестиции и промоција на извозот на Македонија, Висар Фида, директорот на Дирекцијата за технолошко индустриски развојни зони, Виктор Мизо и економскиот промотор во Индија, Тони Атанасовски.

На маргините на самитот, министерот Павлески оствари средба со премиерот на Утар Прадеш, Шри Б. Л. Јоши и министерот за трговија, индустрија и текстил, Ананд Шарма. На средбите беа истакнати добрите односи помеѓу Република Македонија и Индија, како и взаемниот интерес за понатамошно унапредување на економските односи со Индија и привлекување на индиски инвестиции во Македонија.

Воедно, министерот Павлески и директорот Фида остварија деловни средби со повеќе индиски компании од автомобилската и ИТ индустријата, а исто така, се сретнаа и со претседателот на индиската Асоцијација на производители на автомобилски компоненти во Њу Делхи, Арвин Капур.

Покрај многубројните средби со интернационални компании, министерот Павлески имаше средба и со претседателот на Бордот на директори и извршен директор на Инфосис (Infossys), Крис Гопалакришнан, поранешниот претседател на Конфедерацијата на индиската индустрија (CII) и претседател на Бордoт на директори на НИКО финансиски системи (Nicco Financial Services Ltd.), Рајиве Каул, претседателот на Бордoт на директори на Годреј груп (Godrej Group) и претседател на Бордoт на директори на Конфедерацијата на индиската индустрија (CII), Ади Годреј, поранешниот претседател на Конфедерацијата на индиската индустрија (CII) и директор на TFR Ltd., Субод Баргава./крај/со/бб