Министерот за економија Ваљон Сараќини заедно со државниот секретар во Кабинетот на премиерот на Унгарија Петар Сијарто, во понеделникот го отворија Македонско-унгарскиот бизнис форум во просториите на Стопанската комора на Македонија.

На форумот, покрај стопанственици од Македонија, учествуваа и претставници на дваесеттина унгарски компании, чија цел е да воспостават деловни контакти со македонски компании од различни стопански дејности.„Се надевам дека потенцијалите за соработка меѓу двете земји во иднина ќе бидат искористени, а уверен сум дека тие потенцијали се бројни. Ги повикувам унгарските инвеститори да ги искористат поволностите што ги нуди Македонија и да инвестираат кај нас. Очекувам денешниот бизнис форум да биде во таа насока”, рече министерот Сараќини.Тој потсети дека економскитe врски меѓу двете земји се зајакнаа со одржувањето на првиот конститутивен состанок во февруари годинава во Будимпешта, каде што Мешовитата комисија по Договорот за економска соработка ги дефинира економските области, кои ќе бидат во духот на заедничките интереси на бизнис заедницата.Министерот Сараќини пред стопанствениците ги претстави мерките на Владата за зголемување на атрактивноста на земјата за инвестирање, преку подобрување на деловното опкружување со спроведување на структурни реформи, одржлива макроекономска и фискална политика, зголемување на конкурентноста и поддршка на претприемништвото, агресивна извозна и инвестициона промоција, како и преку примена на моделот јавно-приватното партнерство. „За странските инвеститори има многубројни фискални поволности за инвестирање, особено во ТИРЗ-те, воведување и задржување на најниски даноци во Европа и олеснување на постапките за вршење бизнис”, истакна Сараќини.Министерот информираше дека во насока на продлабочување на соработката со Република Унгарија посебно внимание заслужуваат можностите за инвестирање во енергетските и инфраструктурните проекти, туризмот, потенцијалите за експлоатација на минерални суровини, заеднички проекти за научни и иновативни истражувања и слично.Сијарто истакна дека денешниот бизнис форум е доказ за намерата на Република Унгарија во интензивирање на соработката со Република Македонија на економски план,а воедно ја истакна и  поддршката што  ја дава  Унгарија во однос на интегрирањето на Македонија во Европска Унија и НАТО Алијансата. Инаку, трговијата на билатерална основа во 2012 година изнесувала 61,7 милиони долари, што претставува еден отсто пораст споредено со 2011 година. Воедно, податоците покажуваат  раст на извозот од 9,2 отсто и раст на увозот од 5,8 отсто во 2012 година, во однос на 2011 година.  Од аспект на првите три месеци на 2013 година, вкупната билатерална трговска размена изнесува 13,4 милиони долари. Во однос на трговијата на Република Македонија со Европската Унија, учеството на Унгарија е над еден отсто, додека покриеноста на увозот со извозот изнесува 17,3 отсто. /крај/