Важноста од воведувањето на финансиската транспарентност во работењето е на високо ниво, а од сето тоа зависи животниот циклус на компаниите. Потребно е да се воведат нови работни функции, доедуцирање на кадарот и реорганизација на работни позиции за кои порано воопшто немало потреба.

Овие нови услови на работење и управување на компаниите ги диктира кризната 2008 година, со која се соочија повеќето од компаниите во Македонија, а и компаниите на глобално ниво. Сопствениците на мали и средни компании во Македонија, на деловен појадок, под менторство на регионалните експерти од Србија, Милан Мијаиловиќ и Љубомир Јовановиќ, заеднички ги поставија постулатите за важноста на финансиската писменост и финансиска транспарентност во работењето на малите и средните компании во Македонија.

Како тема на овој бизнис појадок беше поставено прашањето: Дали, како и кога треба да го пораснам сопствениот бизнис, со кое се соочуваат македонските компании.

„Одземено ни е правото да одговориме на прашањето дали сакаме или пак не. Потребно е да избереме дали сакаме да се реструктуираме и да обезбедиме предуслови бизнисот да расте, или пак ќе донесеме одлука да останеме онаму каде што сме. Неликвидноста се јавува како последица на неподготвениот раст и развој на компаниите, која пак е прашање на рентабилноста. Токму поради овој момент, компаниите 90 % од времето го посветуваат на пронаоѓање на евтини кредити“ изјави Милан Мијаиловиќ – финансиски консултант од Р.Србија.

Кај банките потребно е да се пласира способноста за враќање на кредитите. За да се постигне тоа, најважно е да се работи на подигање на финансиската писменост на компаниите, односно колку точно средства им се потребни на компаниите (ни повеќе, ни помалку) за да можат да го унапредат односно, прошират сопствениот бизнис.

„Со банките потребно е да се разговара на ист јазик. Од една страна, штом тие го забележат тоа, со сигурност на компаниите ќе им ги дадат потребните средства во вид на кредити, а од друга страна се сигурни дека парите ќе бидат вратени“ додаде Мијаиловиќ

Пазарите низ Европа очекуваат регионот да стане доминантен производител на земјоделски производи. Тоа претставува дејност која е најисплатлива за малите и средните компании во Македонија, бидејќи производите од овој регион се доста познати и квалитетни.

„Малите компании кои ги зафати кризата, потребно е брзо да се реструктуираат, да се насочат во производство што носи пари, а помалку да се насочуваат кон давање на услуги“ Љубомир Јовановиќ им посочи на сопствениците на мали и средни компании од Македонија.

“Според нашите истражувања, една од исплатливите работи на овие простори е земјоделското, односно прехранбеното производство. Тоа е нешто што на овие простори, особено во Македонија ќе даде позитивни резултати.“ додаде Јовановиќ. Деловниот појадок од овој карактер, претставуваше одлична можност за отворена дискусија и заедничко пронаоѓање на соодветни решенија на прашањето: Дали, како и кога да почнам со стратегија за развој, проширување, зголемување на портфолиото, зголемување на пласман на пазарот. Овој деловен појадок е првиот од планираните четири и всушност сите се на различна тема, опфаќаат Финансии, Контролинг, Интернет маркетинг и Продажба. Овие четири теми се дел од Експертските Академии наменети за македонскиот пазар“ истакна Душко Угриноски – директор на Triple S Group и организатор на првиот деловен појадок на тема финансии.

Како што расте еден бизнис, потребно е и инвестирање во образованието, едукацијата и вештините за успешно управување на менаџментот, а и на целиот тим кој при растот презема поголем дел од работата и одговорноста на менаџментот./крај/со/