Економија
ЕБОР со 11,15 млн. евра заем за македонската воздушна пловидба
Европската банка за Обнова и развој (ЕБОР) одобри заем од 11,15 милиони евра за провајдерот на услуги од воздухопловна навигација во Македонија (М-НАВ), заради модернизација и надградба на опремата за воздухопловна навигација на компанијата.
Проектот претставува прв кредит без државна гаранција одобрен од банката во транспортниот сектор на Македонија, кој е дел од инвестиционата програма на компанијата во вкупен износ од 16,75 милиони евра, наменет за хармонизација на воздухопловната навигација со Заедничкиот европски воздухопловен простор. Владите на Австрија и Франција обезбедуваат по 300.000 евра во кои се неповратни средства наменети за олеснување на имплементацијата на проектот и институционално зајакнување на М-НАВ и Агенцијата за цивилна воздушна пловидба.Сју Барет, Директор на транспортниот тим на ЕБОР, изјави: „Го поздравувам овој важен проект, бидејќи со него ќе се подобри безбедноста и ефикасноста на услугите од воздухопловна навигација во земјата. Освен надградбата на опремата, со него ќе се поддржи и институционалното јакнење на службите за воздушна пловидба, преку усогласување со европските стандарди. Ова е наш четврт проект во македонскиот воздухопловен сектор, што ги потврдува успешните релации кои ги изградивме во изминативе години.“ Николет Тагарински, Извршен директор на М-НАВ истакна: „Посветени сме на целите од Договорот за единствен европски воздухопловен простор. Со поддршка од ЕБОР, ќе ги имлементираме идните чекорите за обезбедување на високо квалитетни услуги во областан на воздухопловната навигација во нашата земја и ќе можеме безбедно и ефикасно да се справиме со зголемениот сообраќај кој се очекува во иднина. Првиот и најважен приоритет од сите проекти е безбедноста, која ќе се унапреди со набавката на најсовремената опрема.“ М-НАВ е провајдер на услуги во воздухопловната навигација во државна сопственост. Компанијата е формирана во 2009 година, со поддршка обезбедена во претходниот проект реализиран со банката. Таа е одговорна за воздухопловната навигација, контрола на летањето, служби за тревожење, аеронаутички информации, процедури за воздушниот простор и летовите, како и за метеоролошки и други услуги. Исто така, има одговорности во обезбедување услуги во воздухопловна навигација на летови во македонскиот воздушен простор, и услуги на терминалите на аеродромите во Скопје и Охрид.ЕБОР започна со инвестиции во македонската економија во 1993 година и досега има потпишано над 80 проекти со нето кумулативен обем од над 1,1 милијарда евра. Приближно 36 проценти од кумулативните обврски се во инфраструктурниот сектор, 28 проценти се во финансискиот сектор, 20 проценти во енергетскиот сектор и 16 проценти во индустријата, трговијата и агробизнисот. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.