Во следните десет години се планира да се потрошат 30 милијарди евра за енергетски проекти во нашиот регион.

„Од одлуките на владите ќе зависи колку нам, на граѓаните, ќе ни бидат топли домовите, колку ќе бидат безбедни и сигурни енергетските проекти во нашата земја, колку ќе биде чист или загаден воздухот што го дишеме“, потсетуваат граѓанските организации Аналитика, Екосвест и Фронт 21/42.

Значењето на изборите на енергетските проекти, кои ќе мора да се направат во следниве неколку години, е огромно – нивните последици (позитивни или негативни) граѓаните долго ќе ги чувствуваат и живеат.

Поаѓајќи од ова граѓанските здруженија во регионот изработија извештај под наслов „Топла, безбедна, чиста енергија – Кој е патот кој го одбира Југоисточна Европа?“. Извештајот дава приказ на перформансот на владите во регионот споредени едни со други, како и во однос на состојбата и целите на Европската Унија.

„Со над 60% од вкупната електрична енергија произведена од јаглен Македонија е речиси на дното во категоријата „Валкана електрична енергија“. Србија е многу блиску до нас, а само во Косово јагленот учествува со многу повисок процент во вкупниот енергетски микс. Во категоријата „Енергетски интензитет“ дното го делиме со Србија. Тоа значи дека за производство на еден ист производ ние трошиме и до 4 пати повеќе енергија одколку во Европската унија. Ова има огромно негативно влијание врз конкурентноста на нашето производство“, рече Искра Стојковска од Фронт 21/42, претставувајќи ги заклучоците од извештајот.

Плановите во категоријата „Енергетска ефикасност“ се далеку под европските цели (9% наспроти 20%) во сите земји во регионот, освен во Хрватска.

„За граѓаните, ова е веројатно најважната категорија – енергетската ефикасност носи поголема вредност за сметките за потрошена енергија. Енергетски ефикасните домови, болници и училиштата се затоплуваат со помалку пари. 1000 пати е поделотворно да се заштеди една единица енергија, отколку да се произведе нова“, истакнаа здруженијата на денешниот настан.

Работите не се многу подобри ниту во категоријата „Произведена електрична енергија од сонце и ветер“. Македонија, како и речиси сите земји од регионот, во 2010 воопшто не ги искористила своите потенцијали за чиста енергија.

Само во категоријата „Губитоци и кражба на енергија“ Македонија котира подобро во однос на повеќето земји од регионот и ЕУ. Според здруженијата тоа не значи дека не треба да се спроведуваат енергични мерки за намалување на сите губитоци и кражби. /крај/со/мф