Економија
Обложувалниците реагираат на предлог законот за измени и дополнувања на Законот за персонален данок на доход
Најавените измени и дополнувања во Законот за персоналниот данок на доход кои во моментов се во собраниска процедура, во фаза на поминато Второ читање кај матичната собраниска комисија, не се компатибилни со европските прописи особено во делот за организирањето игри на среќа и ќе доведе до намалување на приливот во Буџетот, реагираа во четвртокот од Асоцијација на спортски обложувалници на Македонија (АСОМ).
„Најновите измени и дополнувања на Законот за персоналниот данок на доход кои уредуваат да посебните игри на среќа немаат праг на ослободување од данок на добивка, односно секоја поединечна добивка да се оданочува со 10 отсто од вредноста на исплатата, не се во согласност со реалното работење на спортските обложувалници и ќе резултираат со намалување на изборот и задоволството на играчите на игри на среќа во земјата, а индикативно ќе предизвикаат намалување на приходите кај организаторите на игри на среќа, отпуштање на вработени и крајно намалени приливи во Буџетот на Република Македонија“, се вели во реакцијата на Асоцијација на спортски о обложувалници (АСОМ) при што се додава дека предлозите се некомпатибилни со европското законодавство и начелата за заштита од монополска позиција
Според АСОМ, предложените измени во член 54 и член 55 согласно предлог законот за изменување и дополнување на Законот за персоналниот данок на доход претставуваат „негативен преседан во европската правна практика“ и истовремено, со новиот предлог закон „директно се кршат основните правила на Лисабонскиот договор кој е неофицијален устав на Европската унија, како и многуте директиви на ЕУ кои изразито забрануваат двојно оданочување и нерамноправна – монополска позиција“ на една група во однос на друга.
„Ваквите промени, директно ќе влијаат врз намалувањето на обемот на работата во индустријата на игрите на среќа во Република Македонија, а со тоа и врз намалување на буџетските приходи по овој основ“, истакнаа во четвртокот од АСОМ.
Посочуваат дека европско законодавство ги применува начините на оданочување на добивката од игри на среќа, на пример, кај поголем број држави, кога се оданочува добивката, се применува оданочување на износот на добивката над одредена сума. Таа сума не е мала и се движи од 500 евра па нагоре, а најчестиот праг за оданочување на добивката е помеѓу 3.000 и 4.000 евра, бидејќи тоа е реално најниската сума која претставува вистинска добивка од овој тип игри на среќа.
Во помал број држави, пак, добивките од игри на среќа над одреден износ влегуваат во вкупната сума за годишно оданочување на заработувачката на поединецот, а износите кои влегуваат во таа сума се движат од 3.000 евра па нагоре.
„Овие решенија не се случајни туку до нив се дошло преку истражувања: кој модел e најповолен за буџетот на државата. Искуствено, индустријата на игри на среќа секаде во светот егзистира на принципот на голем број на мали влогови и голем број на мали исплати, така да секое, па и минимално оданочување на малите добивки го демотивира повторното играње. Тоа практично значи ‘забрана’ за организирање игри на среќа, бидејќи ја прави бесмислена играта на малите играчи кои преку оданочувањето на малите добивки губат и кога добиваат“, велат од Асоцијацијата во којашто чно секој граѓанин полнолетен на РМ и секое правно лице коешто има одобрение или лиценца за посебни игри на среќа во обложувалница како што се Спорт Лајф, Бет Сит Балкан, Моцарт и други./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.