Економија
Меркел: Должничката криза во Европа не е надмината
Должничката криза сé уште не е надмината изјави во средата германската канцеларка Ангела Меркел во својот настап во Бундестагот.
„Не смееме сега да имаме доверба во лажливото спокојство…, во секој случај, таа (кризата) е под контрола, но не е надмината во подолгорочна перспектива“, истакна германската канцеларка Ангела Меркел додавајќи дека „и покрај постигнатиот напредок, не треба да седиме со скрстени раце“.
Според челничката на германската влада, за справување со ситуацијата „неопходен на развој на економската и монетарната унија, како и зајакнување на европските институции…. “. Меркел смета дека „натамошниот развој потребно е да се постигнат, исто така, и договори во Европската унија“. „Европа треба да стане постабилна, поблиска на граѓаните и посправедлива“, убедена е германската канцеларка.
Меркел посочи на надминувањето на стагнирањето во делот на финансиските пазар. Во таа насока „неопходно се постигне напредок, кој ќе заслужува да се нарекува така“, истакна канцеларката.
Политичарите им ветија на граѓаните дека опустошувачка глобална финансиска криза слична на онаа од 2008/2009 година нема да се случи повторно, потсети Меркел. „Кој свесно оди во ризик, тој е одговорен за загубите“, рече канцеларката укажувајќи дека загубите не треба да бидат на товар на даночните обврзници. Затоа, учесниците на финансиските пазари „треба да бидат повикани на одговорност преку данокот на финансиските трансакции“, додаде.
Меркел истакна и дека благодарение на „повратената моќ Германија е моторот на Европа“. „Ние во значителен степен придонесуваме во тоа европската должничка криза да може да биде надмината“, нагласи канцеларката.
Според неа, тоа се должи на добрата заемна соработка меѓу социјалните партнери, работодавачите и синдикатите. Социјална пазарна економија, тоа е нашиот патоказ“, укажа Меркел. Од нејзина гледна точка „Германија е добро, како што одамна не била“. Постои „највисоко ниво на вработеност од обединувањето (на земјата), за социјална пазарна економија, како еден застарен модел веќе никој не зборува“, појасни канцеларката.
Говорејќи за перспективите за развојот на германската економија, таа оцени дека претставува „херкулска задача“ спроведувањето на реформите во енергетската сфера „Токму затоа ‘големата коалиција’ е создадена за решавање на големите проблемите“, рече Меркел, осврнувајќи се на актуелната влада којашто, третпат во историјата на Германија, е составена од конзервативните христијанско демократи (Унијата CDU/CSU) и социјалдемократите од SPD.
„Светот гледа на овој проект (енергетската реформа) со мешавина на изненадување и скептицизам. Доколку успееме да го имплементираме, тој, убедена, сум дека ќе стане еден од најпознатите германски извозни производи“, рече Меркел. Според неа, во моментов уделот на обновливите извори на енергии коишто се користат во Германија изнесува 25 отсто, а до 2050 година се очекува овој удел да се зголеми до 80 отсто./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.