Две нови технолошко-индустриски развојни зони ќе бидат изградени во источниот дел на Република Македонија, односно во близина на Виница и Берово, соопшти во вторник портпаролот на Владата, Александар Ѓорѓиев. Почетокот на градежните работи е предвиден за септември, а на крајот на годината веќе ќе може да се градат капацитети во нив.

„Технолошко-индустриската развојна зона во Виница ќе биде лоцирана во близина на градот Виница, на 4, 5 километри од градот, во место викано Поповец и таа ќе се протега на површина од 21,04 хектари. Технолошко-индустриската развојна зона Берово ќе биде лоцирана на јужната страна на градот Берово на регионалниот пат Берово – Дабиле, во место викано Шушлевец, и ќе се протега на површина од 17, 38 хектари. Согласно акцискиот план на Влада, додаде, за двете зони се предвидува веќе во месец август да биде распишана постапка за избор на компанија која ќе ги гради, а почетокот со градежни работи е предвиден веќе за месец септември“, рече Ѓорѓиев. 

Појасни дека до крајот на годината се очекува да биде завршена првата фаза од градбата на зоните, односно тие да бидат доведени во состојба да може веднаш да се пристапи кон изградба на микролокацијата за изградба и сместување на капацитети каде што би се одвивал бизнисот на компанијата. 

За овие фази од основањето и градбата на зоните, Владата има предвидено милион евра. 

Владата очекува отворањето на новите зони да привлече странски инвеститори како и економски развој во источниот регион од државата. 

„Со основањето на овие две зони во Виница и Берово се остварува диверзификација на можностите за привлекување на странски инвеститори, се создаваат услови за локален економски развој на овие општини и економски развој во овој регион од државата, како и за отворање на нови работни места“, изјави владиниот портпарол. 

Тој информираше дека во текот на месец август ќе почне изградбата на ТИРЗ Радовиш која ќе се протега на површина од 10 хектари и на ТИРЗ Струга која ќе се протега на 30 хектари. Во текот на минатата недела е распишана и постапка за избор на компанија која ќе ја гради и ТИРЗ Ранковце која ќе се протега на 40 хектари површина.

Со изградбата на овие пет зони се заокружуваат процесните или пак оперативните претпоставки за изградба на 14 од вкупно предвидените 15 технолошко-индустриски развојни зони кои се дел од владината програма, информираше Ѓорѓиев. За петнаесеттата зона која треба да биде лоцирана во Делчево се очекува да биде донесена одлука за основање во третиот квартал од годината и да се отпочне со градба до крајот на годината./крај/мф/сд