Македонија
Панова: Ковачевски е единствениот кој што не отишол на политичка дебата
„Денес, пос повеќе од петнаесетина дена, повторно расправаме за нови кадровски решенија, кадровски решенија што не ги избрал премиерот бидејќи не кажа ниту еден збор за нив. Заменик-министрите Тирон Јајага, Викторија Аврамовска, Вјолца Бериша, Маја Манолева, Агим Нухиу и, да, Ковачевски зборуваше за сè, само за заменик-министрите – не. Ова е прв премиер во историјата на оваа држава кој повеќе зборува за опозицијата отколку за себе, за своите визии, за тоа зошто ги избрал овие кадри или за проблемите со кои се соочуваат граѓаните“, рече пратеничката од ВМРО-ДПМНЕ, Ели Панова.
Панова истакна дека премиерот Ковачевски не сака да зборува за многу клучни теми и проблеми со кои се соочуваат граѓаните.
„Премиерот не сака да зборува ниту за непотизмот што се случува, впрочем, со некои од овие имиња, премиерот не сака да зборува за скандалите што ја тресат македонската јавност, премиерот не сака да зборува за дуќаните на дуќанџијата Груби, не сака да зборува за ветингот што го ветуваа, за никакви реформи, премиерот не сака да каже за лебот, впрочем, да каже зошто граѓаните немаат леб, не сака да зборува ниту за своите спонзорирани објави, не сака да зборува ниту за бомбите што секојдневно се најавуваат во училиштата повеќе од половина година, не сака да зборува ниту за учениците, кои немаат континуирана настава, не сака да зборува за учебниците што учениците ги немаат. Тој е единствениот што не отишол на политичка дебата“, рече Панова.
Панова додаде и дека премиерот Ковачевски треба да собере храброст и да зборува за проблемите со кои се соочуваат граѓаните, бидејќи тие теми се многу важни за нив, и му посочи дека со спонзорирани објави нема да може да ја стекне довербата кај граѓаните бидејќи тие ниту го избрале ниту, пак, ќе го изберат во иднина.
„Премиерот не сака да зборува за земјоделците, кои се незадоволни, не сака да зборува за ФЗОМ и за проблемот што го имаат таму вработените и сите граѓани, не сака да зборува ниту за судството, за непотизмот во судството, премиерот не сака да зборува за многу клучни теми, а очекува поддршка од пратениците. Овие теми се многу важни за граѓаните, најдете храброст, излезете, со спонзорирани објави нема да можете да ја стекнете довербата кај граѓаните. Тие ниту ве избрале ниту ќе ве изберат. Вакво арогантно однесување не му прилега на еден премиер“, нагласи Панова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Отворен конкурс на тема штедење – учениците може да испратат литература или ликовна творба
Народната банка и Министерството за финансии традиционално, дванаесетта година по ред, по повод одбележувањето на Светскиот ден на штедењето – 31 октомври го објавија Конкурсот за учениците од основното и средното образование. Целта на Конкурсот е да се поттикне креативноста, имагинацијата, како и интересот на учениците за штедењето и едукација на младите за овој сегмент во финансиската сфера.
Учениците од основното образование може да испратат литературна и / или ликовна творба на темата: „Штедењето – наша навика и наша потреба!“. За избраните 12 најдобри творби на учениците од основното образование ќе им бидат доделени парични награди, и тоа: 3 награди за најдобар цртеж / дигитален цртеж за учениците од 1. до 5. одделение; 3 награди за најдобар цртеж / дигитален цртеж за учениците од 6. до 9. одделение; 3 награди за најдобра песна за учениците од 1. до 5. одделение и 3 награди за најдобар расказ за учениците од 6. до 9. одделение.
Учениците од средното образование може да испратат литературна творба ‒ есеј на темата: „Финансиската едукација на младите – основа за подобро управување со парите и заштита од финансиски измами во новото дигитално време“. За избраните 3 најдобри творби на учениците од средното образование ќе им бидат доделени парични награди.
Крајниот рок за доставување на творбите е 18 октомври 2024 година.
Списокот на наградените ученици ќе биде објавен најдоцна до 31 октомври 2024 година, на интернет-страниците на Народната банка и на Министерството за финансии.
Народната банка и Министерството за финансии ги повикуваат заинтересираните ученици да достават творби на објавениот конкурс. Веруваме дека и оваа година Конкурсот ќе предизвика голем интерес меѓу учениците од основните и средните училишта во нашата земја и дека дополнително ќе го поттикне стекнувањето и развивањето на навиките за штедење.
Економија
Потпишан нов договор за соработка меѓу Народната банка и Државниот завод за статистика
Квалитетната статистика е клучна за процесот на носење добри одлуки и за водењето солидни економски политики. Оттаму, функционалниот статистички систем и соработката помеѓу институциите од тој систем се од суштинско значење за осмислувањето на јавните политики, но и за носењето деловни одлуки од приватниот сектор.
Потпишувањето на новиот договор за меѓусебна соработка и размена на податоци и публикациски материјали помеѓу Народната банка и Државниот завод за статистика, со кој понатаму се унапредува досегашната соработка на овие две институции, е од особено значајно за функционалноста и ефикасноста на домашниот статистички систем, којшто го исполнува највисокиот статистички стандард за дисеминација на податоците на Меѓународниот монетарен фонд – СДДС плус. Со новосклучениот договор се проширува опфатот на податоците коишто се разменуваат, се олеснува и се осовременува начинот на таа размена, а истовремено се скусуваат и роковите за доставување податоци. Сето ова ќе придонесе за исполнување на статистичките барања на европските и меѓународните институции и подготовка на квалитетни, веродостојни и навремени статистички податоци. Договорот за соработка во име на институциите го потпишаа гувернерката на Народната банка, Анита Ангеловска-Бежоска и в. д. директорот на Државниот завод за статистика, Дејан Станков.
На средбата беше истакнато дека во изминатиот период, следејќи ги глобалните статистички трендови и меѓународните иницијативи, националната статистика е надградена со нови податоци, како и дека подготовката и дисеминацијата на статистичките податоци е во согласност со најновите европски и меѓународни стандарди. Беше посочено и дека секој учесник има своја улога и одговорност во производството на статистики од својот домен на работење, затоа координацијата и усогласеноста на сите чинители во статистичкиот систем е предуслов за исполнување на целите и обврските на овие институции.
Економија
СДСМ: Просечната плата се намалува, потфрлија економските политики на Мицкоски
Сведочиме на пад на просечната плата за 1.000 денари после години постојано покачување, велат од СДСМ преку соопштение.
„Намалувањето на просечната е директен одраз на погрешните политики на Мицкоски и ВМРО-ДПМНЕ и значи удар врз стандардот на граѓаните.
Економските политики на Христијан Мицкоски и владата на ВМРО-ДПМНЕ потфрлија.
Неприфатливо е која било влада да дозволи пад на платите, особено во време кога семејствата се соочуваат со зголемени трошоци за живот и покачени цени на производите.
Падот од 1.000 денари значи помалку средства за основни потреби, намален квалитет на живот и понизок стандард.
Во изминатите години, СДСМ континуирано ги зголемуваше платите, дури и во време на кризи, достигнувајќи над 41.000 денари. За споредба, во 2015 година, просечната плата под ДПМНЕ изнесуваше само 20.853 денари.
Наместо да поттикнуваат раст и зголемување на платите, ВМРО-ДПМНЕ се враќа на политиките од минатото, каде работниците беа третирани како евтина работна сила.
Бараме од владата на Христијан Мицкоски да ја промени оваа погрешна политика и да преземе итно мерки за покачување на платите“, се вели во соопштението на СДСМ.