Владата ќе ги зголеми за 10 отсто студентските и ученичките стипендии, истакна во саботата премиерот, Никола Груевски на народнито собир во Тетово кој го организираше неговата владејачка ВМРО-ДПМНЕ и најави нови инвестиции во Полошкиот регион во образованието, земјоделието, зравството и инфраструктурата.

За 10 отсто ќе бидат зголемени ученичките стипендии за најталентирани ученици, талентирани спортисти, деца без родители, деца со посебни потреби, ученици од социјални категории, од угостителско-туристичка струка и ученици кои се деца на бранители, како и студентските стипендии за студенти со висок успех на студиски програми по информатика, студенти од социјални категории, студенти со висок успех, студенти од природно-математички, техничко-технолошки, биотехнички и медицински науки и студенти кои се деца на бранители, најави премиерот Никола Груевски.

„Пред три седмици најавивме ваучери за студентите од трета и од четврта година, чии родители имаат пониски примања од просечната плата во Македонија, ваучери со кои бесплато ќе можат да си набават таблет со тастатура. Законот веќе помина во парламентот и постапката за аплицирање е започната“, појасни Груевски.

Нагласи дека неговата влада инвестира многу во образованието, во образовната инфраструктура, како ниедна претходно „Во тетовскиот регион досега имаме изградено четири сосема нови училишни сали во вредност од повеќе од два милиона евра. Имаме изградено и три нови спортски сали преку Агенцијата за спорт и млади, со инвестиција од над 1,5 милиони евра. Само во Тетово во моментот во тек е изградба на уште три нови спортски сали, две големи со трибини и една мала сала, за што ќе бидат инвестирани околу два милиона евра“, рече Груевски .

Додаде дека се изградени и седум целосно нови училишта, за што инвестиравме околу четири милиони евра. „Со повеќе од два милиона евра реконструиравме и 36 училишта во овој регион. За оваа година во Тетово планираме реконструкција на уште три училишта, и реконструкција на училиштето во Вратница за околу половина милион евра. Инвестираме и во спортот. Со околу милион евра изградивме фудбалски игралишта во Тетово, Гостивар и Теарце и повеќенаменски игралишта во Гостивар и во Јегуновце“, прецизираше челникот на владејачката ВМРО-ДПМНЕ.

Груевски објави нови мерки во корист на земјоделците, попрецизно зголемување на рокот на важност на регистрацијата на тракторите, легализација на мотокултиватори, едноносни приколки и полуприколки и други мобилни машини кои им се неопходни на земјоделците за извршување на нивните секојдневни работи, како и намалување на цената за изготвување геодетски елаборати за обележување на шуми што е услов за добивање на одобрение за сеча на дрва за греење.

Овие мерки, како што рече премиерот, се произлезени на барање на земјоделците од директните контакти што ги остваруваат на терен. „Ќе овозможиме наместо секоја година тракторите да се регистрираат на секои шест години, а нивната техничка исправност ќе се потврдува на секои две години… Предлогот за легализација на мотокултиватори, едноносни приколки и полуприколки и други мобилни машини ќе може да го поднесат во рок од една година по донесувањето на законот со кој тоа ќе биде овозможено“, рече Груевски .

„По барање на граѓаните сопственици на приватни шуми, Катастарот во соработка со Комората на приватни геодетски фирми ја започна постапката за намалување на цената за изготвување на геодетски елаборати за обележување на шуми што е услов за добивање одобрение за сеча на дрва за греење. Сегашната цена која е 30 денари за метар должен ќе биде намалена за 50 отсто за површини до хектар, додека за површините над хектар и поголеми ќе се намали и до 70 отсто“, додад.

Груевски истакна дека ВМРО-ДПМНЕ е партија чиешто раководство изминатите години, постојано е „на терен“ меѓу народот, „со цел да биде во тек со нивните проблеми, нивното мислење, нивните барања“.

„Во овој период, откако СДСМ потпомогната од странска разузнавачка служба, започна операција за наше оцрнување, преку монтирани, сечени, вадени од еден и ставани во друг контекст, и креирани телефонски разговори, таа комуникација е и засилена и почеста. Од тие контакти, од тие разговори директно на терен, по населените места, селата, домовите низ цела Македонија, произлегоа и нови идеи како да им се помогне на земјоделците“, рече Груевски и порача дека „ВМРО-ДПМНЕ го слуша гласот на народот, тоа беше и тоа ќе остане така“.

„Земјоделците се нашиот стратешки партнер кој секогаш ќе го има нашето полно внимание. За помош при купување на земјоделска механизација и за изградба на локална инфраструктура во селата инвестиравме два милиона евра. Во тетовско-гостиварскиот регион во изминатите години земјоделците добија над 30 милиони евра субвенции, односно по околу пет милиони евра годишно. И оваа година полошките земјоделци ќе добијат нови пет милиони евра за субвенции“, нагласи премиерот Груевски.

За тетовскиот регион рече дека е значајно тоа што веќе започнале активности за изградба на хидросистемот Равен – Речица, кој ќе се овозможи наводнување на нови 3.200 хектари земјоделско земјиште и вредност на инвестицијата од 19 милиони евра.

За Полошкиот регион годинава, само за субвенции за земјоделците од Полошко се издвоени повеќе од пет милиони евра. „Во тетовско-гостиварскиот регион во изминатите години земјоделците добија над 30 милиони евра субвенции, односно по околу 5 милиони евра годишно. И оваа година полошките земјоделци ќе добијат нови 5 милиони евра за субвенции“, рече Груевски и повтори дека земјоделците се нивниот стратешки партнер кој секогаш ќе го има нивното полно внимание.

Груевски најави инвестиции од 15 милиони евра во патната инфраструктура во Полошко, но потсети дека во тетовскиот регион изминатите три години се инвестирани повеќе од 11 милиони евра во делот на патната инфраструктура.

„Изградени, реконстуирани и модернизирани се над 90 километри локални и регионални патишта, а само во Тетово се инвестирани 4,5 милиони евра за реконструкција и модернизација на 30 километри локални и регионални патишта“, истакна премиерот

„Во периодот што следи, ќе продолжиме да инвестираме во подобрување на патната инфраструктура во Полог. Ќе инвестираме повеќе од два милиони евра за реконструкција и надградба на 20 километри пат, меѓу кои и надградбата на коловозот Тетово – Попова Шапка која ќе започне во мај-јуни, како и рехабилитацијата на регионалниот пат Тетово – Брвеница – Чегране – Гостивар во должина од 16,5 километри и инвестиција од два милиона евра која ќе започне летово“, посочи Груевски.

Додаде дека во текот наскоро ќе започне и втората фаза од рехабилитацијата на патната делница Тетово – Пирок – Гостивар во должина од 10 километри, а декја се работи и на реализација на инвестиции од 1 милион евра за реконструкција на два пата и автопатска клучка во Брвеница. Груевски информираше и дека во петокот започнаа и тендерските процедури за реконструкција на три пата во Гостиварско и санација на мостот на магистралниот пат Гостивар – Стража, инвестиција во висина од 1,5 милион евра.

„Откако ги завршивме градежните работи во висина од три милиона евра на делниците Гарски мост – Бошков Мост и Маврово – Дебар, летово започнуваме и со реконструкција на регионалниот пат Ново Село – Маврово – Жировница – Дебар во должина од 20 километри во вредност од 8 милиони евра. Реконструкција која ќе заврши за една година, рече премиерот во Тетово додавајќи дека тоа се проекти кои се од значење за сите жители од овој регион“, според Груевски.

Најави и новиот дијагностичко-ургентен центар наскоро ќе биде отворен во Тетово. Комплетно нов дијагностичко-ургентен центар е изграден во рамки на Клиничката болница во Тетово. Инвестиција е вредна над пет милиони евра. Објектот, рече Груевски, е комплетно готов и ќе биде пуштен во употреба веднаш по закажаниот технички прием веројатно до почетокот на летото, кој рече дека покрај тоа, во оваа јавна здравствена установа се вложени дополнителни 1,3 милиони евра за реконструкција на одделите за: хирургија, интерна медицина, хемодијализа.

Истакна дека набавена е и најсовремена медицинска опрема во вредност од пет милиони евра која опфаќа и апарат за компјутерска томографија, магнетна резонанца, ангиограф, мамограф и др., со кои значително го унапредиле квалитетот на медицинска дијагностика и третман на пациентите.

„Во Тетово успешно функционира Центарот за интервентна кардиологија, со што се прошири и се зајакна кардиолошката мрежа за третман на акутен срцев инфаркт. Континуирано се зајакнува и здравствениот кадар, и само во изминатите две години во тетовската болница и здравствениот дом се реализирани над 110 нови вработувања, од кои: 56 доктори, 35 медицински сестри, и други технички лица“, рече Груевски

Додаде дека сиве овие инвестиции придонеле Клиничката болница во Тетово да прерасне во регионален медицински центар, кон кој гравитираат околу 200.000 жители од реонот на Тетово, Теарце, Јегуновце, Брвеница, Боговиње, Желино… Во Гостивар, пак, за реконструкција на болницата се вложени околу половина милион евра, а набавена е и нова медицинска опрема во вредност над милион евра и обезбедени се нови санитетски возила за Итната медицинска помош при Здравствениот дом, рече уште премиерот.

Во здравството, рече Груевски, реализирани се крупни инвестиции во Тетово и Гостивар и успешно се спроведуваат проектите „Рурален доктор“ и „Домашна визита“ со кои се обезбедува здравствена заштита за граѓаните во помалите населени места кои порано патувале и по неколку часа за да стигнат до најблиската здравствена установа, а сега медицински тим ги посетува во самото место на живеење./крај/мф/сн

Извор: Макфакс