По дводневните панел дискусии во рамки на ЦЕФТА Неделата 2014, на кои се разговараше на теми за зголемување на инвестициите во ЦЕФТА регионот, за регионалните синџири на вредност, за глобалните и регионалните аспекти на олеснувањето на трговијата во ЦЕФТА, а се одржа и форумот на стопанските комори од ЦЕФТА регионот, министерот за економија Беким Незири денеска претседаваше со 8. Мешовит комитет.

На овој Мешовит комитет, министрите и овластените претставници на ЦЕФТА Страните, ја истакнаа важноста за превземање напори посветени на продлабочување на примената на ЦЕФТА Договорот, како солиден правен основ за либерализација на трговијата со стоки и услуги, олеснување на трговијата и поедноставување на процедурите, елиминирање на нетарифните бариери во трговијата, зголемување на транспарентноста и зајакнување на регионалната соработка во политиките за  инвестиции и промоција.

„Го поздравивме напредокот направен во преговорите за либерализација на трговијата со услуги, неопходен за постигнување на целите за економски развој и раст во регионот со проширување на интрарегионалните инвестиции и можности за производство. Процесот на преговори треба да резултира со склучување на регионален Протокол за трговија со услуги, со кој отворањето на пазарот со услуги треба да биде на повисоко ниво од либерализацијата на која се обврзаа земјите со нивното членство или потенцијално членство во Светската Трговска Организација, како и да се зајакне интра-регионалната трговија со услуги“, истакна Незири.

Министерот за економија ги предочи и решенијата на одредени бариери кои беа предложени на денешната седница:

„Македонија има бариери за извоз на лекови во Албанија и за извоз на вино во Србија. На седницата донесовме заклучок Република Албанија во наредниот период да ја согледа можноста да направи измена на Законот за здравство,  во делот со кој се регулира увозот на лекови, кој предвидува лековите што се увезуваат да бидат регистрирани во земјата во која се произведуваат и во една земја-членка на ЕУ. Побарав од Албанија да се тргне бариерата и лековите од Македонија да може слободно да се увезуваат“, рече Незири

Тој посочи дека со Србија е договорено на највисоко можно ниво да се расправа за проблемот со увозот на македонското вино.

„Заклучивме за оваа проблематика да се разговара на заедничката  седница на владите на Република Македонија и Република Србија, што треба да се одржи во периодот од 22 до 24 декември годинава. Очекувам до крајот на годинава или во првата половина од 2015 година да бидат елиминирани двете бариери за извоз на македонски производи во Албанија и Србија, благодарение на  Мешовитиот комитет на ЦЕФТА“, рече Незири.

Истовремено, ЦЕФТА Страните се согласија до крајот на 2015 година да започнат преговори со цел склучување на Рамковен договор помеѓу царинските администрации за поедноставување на инспекциите, за размена на податоци и за соработка во програмите за трговско партнерство. Беше поздравен и процесот на потпишување или ратификација на Пан-европската медитеранска Конвенција (ПЕМ) која ќе ги спои разните зони на дијагонални кумулации во Конвенцијата. За потестување, Република Македонија во септември оваа година ја ратификуваше Одлуката за потекло според Конвенцијата во рамките на ЦЕФТА, а во тек е постапката со ЕУ, ЕФТА земјите и Турција.

На седницата, меѓу другото, беше договорено и да се формираат работна група за електронска размена на информации, комитет за олеснување на трговија, и поткомитет за трговија со услуги, како и да се измени одлуката за основање на Комитет за избор на мандат на персонал на ЦЕФТА Секретаријатот, да се основа отворен фонд на ЦЕФТА Комитетот и да се воведе национална програма за експерти.

Од наредната година претседавач на ЦЕФТА ќе биде Молдавија. /крај/