Македонија
Над 80 компании понудија работа на Саемот за вработување во Скопје
Со повеќе од 80 компании кои нудеа работа и стотици граѓани кои дојдоа да ја најдат посакуваната работна позиција и да се информираат за новитетите на работодавците, беше затворен вториот караван на Саемите за вработување.
Последниот Саем за вработување се одржа во Скопје во СЦ Борис Трајковски, на местото каде што и пред повеќе од една година започна целиот проект на Агенцијата за Вработување на Република Македонија, кој по добиените резултати се покажа како успешен..
„Заклучно со 7-от саем кој што беше во Куманово имаме 228 директни вработувања и уште 290 лица ќе бидат вработени во следниот месец ипол во компаниите кои што понудија работа на Саемите за вработување 2015. Инаку досега има 4.000 позитивни CV-а кои што се примени во компаниите, а над 900-ни лица се повикани на интервју. Очекуваме оваа бројка да биде зголемена барем двојно во наредниот период. Заедно со ланските саеми каде што имаме над 600-ни вработувања, заклучно со саемот во Куманово, имаме над 800 вработувања. Најголем интерес има за вработувања на лицата до 35 години, но радува фактот дека има и солидна бројка на интерес за вработувања на лицата над 50 и 58 години, бидејќи овие старосни групи имаат искуство и знаење кое може и тоа како добро да се искористи за едукација на помладите“, изјави Влатко Поповски, Директорот на Агенцијата за Вработување на Република Македонија.
По примерот на светските трендови, со Саемите за вработување им се даде можност на сите невработени луѓе од нашата држава, особено на младите, да дознаат што точно се бара на пазарот на труд и можност да остварат близок контакт со компаниите кои нудат работа и да аплицираат со свое CV за посакуваната работна позиција.
„Целта на овој саем за вработување на кои присуствуваат околу 80 компании е невработените лица побрзо и полесно да дојдат во контакт со претставници на оние компании кои што имаат потреба од нови работници и имаат слободни работни места. Овој саем го користиме за да го промовираме и презентираме новиот оперативен план за 2016-та година во кој што се предвидени над 27 мерки и обуки и вкупно 710 милиони денари за реализација на овие мерки “, изјави Диме Спасов, заменик министерот за Труд и социјална политика. /крај/мф/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Премиерот најави стабилизирање на инфлацијата: „Очекувам да се движиме околу 3 проценти“
Премиерот, Христијан Мицкоски, одговарајќи денеска на новинарско прашање за инфлацијата, изјави дека очекува стабилизирање на ценовните движења во 2024 година.
„Како што веќе кажав во неколку наврати, очекувам инфлацијата оваа година да се стабилизира под 3 проценти“, рече Мицкоски.
„Очекувам месечна негативна динамика, односно опаѓање споредено со лани. Во јануари минатата година имавме т.н. кошничка, па очекувам оваа година да се движиме некаде околу 3 отсто – можеби малку под или малку над – но со јасна негативна тенденција месец за месец.“
Тој додаде дека во следните денови се очекува објавување на параметрите од страна на надлежните институции, и нагласи дека Владата спроведува политики што се во интерес на стандардот на граѓаните:
„Водиме домаќински политики, работиме на консолидација на состојбите. Од хаотична ситуација, распаднати институции и уништен систем, дојдовме до точка каде можеме да кажеме дека сме стабилизирани. Сега е време да ја развиваме Македонија каква што ја посакуваат сите граѓани“, додаде премиерот.
Економија
Угостителите во Македонија за една година ги поскапеа цените за 3,4 проценти
Цените на угостителските услуги во јануари 2026 година се зголемени за 0,2 проценти во однос на претходниот месец.
Во споредба со истиот месец од минатата година, цените се повисоки за 3,4 проценти, сопшти Државниот завод за статистика.
На годишно ниво, односно во 2025 година во однос на 2024 година, цените на угостителските услуги се зголемени за 4,8 проценти.
Во јануари 2026 година, во однос на декември 2025 година, цените по групи се зголемени за: 0,3 проценти кај храна, 0,2 проценти кај алкохолни пијалаци. Кај групите Безалкохолни пијалаци и ноќевања не се забележани промени на цените.
Економија
Владата предложи покачување на платите за администрацијата до 40 отсто, со почетно зголемување од 8 проценти од април
Премиерот Христијан Мицкоски, изјави дека денешната средба со Синдикатот на УПОЗ била конструктивна и дека на маса е предлог за зголемување на платите на административните службеници за 40 проценти во наредниот период.
Во интервју за Дневникот на МРТ, Мицкоски рече дека Владата ги презентирала условите и правилата под кои е подготвена да го реализира процесот на покачување на платите и дека сега се очекува одговор од синдикатите дали го прифаќаат предлогот.
„Денеска имавме состанок со УПОЗ. Ние дадовме понуда, истата онаа понуда за која јас зборував во јавноста. Ги поставивме условите и правилата под кои сме подготвени да го движиме овој процес напред“, изјави Мицкоски.
Тој посочи дека претставниците на УПОЗ и КСС најавиле дека ќе се консултираат со своите раководства и дека во текот на утрешниот ден ќе ја соопштат нивната одлука. Доколку се постигне согласност, според најавите, договорот би бил финализиран во недела, а од понеделник би започнала изработка на примерок на индивидуален синдикален договор.
Мицкоски појасни дека исплатата на зголемените плати би започнала во април, за мартовската плата, со осумпроцентно зголемување на збирот од постојната плата и минималната плата. Истиот модел би се применувал и во 2027 и во 2028 година.
„Тоа значи дека за околу две години и два до три месеци, административните службеници ќе имаат најмалку 40 проценти повисоки плати во споредба со сегашното ниво“, истакна премиерот.

