Политики за промоција и привлекување на инвестиции во државите-потписнички на ЦЕФТА и регионот какоцелина, зголемување на потенцијалот за развој и промоција на синџири навредности во индустриите од регионален интерес, како и јакнење и координација на регионалните напори за олеснување на трговијата согласно меѓународните стандарди и принципи беа темите на кои се дискутираше на ЦЕФТА Неделата 2014, во рамки на претседателството на Република Македонија.

Посебен акцент беше ставен на презентацијата на најактуелните трговски прашања идентификувани од страна на бизнис заедницата во регионот, кои беа предмет на посебна сесија на Форумот на стопанските комори на државите-потписнички на ЦЕФТА.

На ЦЕФТА Неделата, која ја отвори министерот за економија Беким Незири земаа учество сите релевантни меѓународни и донаторски организации во Република Македонија и регионот, кои ги презентираа нивните проекти и иницијативи насочени кон јакнење на резултатите на државите-потписнички на ЦЕФТА во областите поврзани со надворешно-трговската размена  и инвестициите.

„ЦЕФТА Договорот, како еден од најлибералните регионални договори за слободна трговија, дава можност за еднакво ниво на полето на соработката,  пред да се отворат вратите на ЕУ за земјите од регионот. Бројните ЦЕФТА активности кои ги превземавме во рамките на нашето претседавање со ЦЕФТА оваа година го зголемија оптимизмот и покажаа дека регионот е подготвен да исчекори  напред и да ја подобри економската интеграција. Уверен сум дека континуитетот на овие активности ќе придонесе заеднички да креираме услови за јакнење  на економски раст, со краен  ефект – подобрување на стандардот на  нашите граѓани“, рече Незири во своето излагање.

Раководителот на Одделот за оперативни работи во Делегацијата на ЕУ, Јаромир Левичек посочи дека ЕУ го поддржува ЦЕФТА договорот кој, како што рече, претставува чекор напред за земјите од Западен Балкан од аспект на економијата и политиката.

„Оваа спогодба дава одлична рамка за земјите да се подоготват за пристапувањето кон Европската унија и се покажа како клучна за комплетирање на регионалната зона за слободна трговија од која најголем процент е веќе либерализирана. Натамошната либерализација кај земјоделските производи и елиминирањето на нетрговските бариери и отворањето на пазарите за јавни набавки понатаму ќе ги зголемат потенцијалите за раст на регионот“, рече Левичек.

Тој нагласи дека ЦЕФТА договорот приоднесува кон развивање на добрососедските односи и значи непречен пристап кон пазар со преку 20 милиони потрошувачи.

На свеченото отварање на ЦЕФТА Неделата 2014, во организација на Министерството за економија, а со поддршка на Проектот на УСАИД за унапредување на инвестирањето и извозот, свое обраќање имаше и заменик амбасадорот на САД, Бартон Путни.

„Регионалната соработка помеѓу земјите членки на ЦЕФТА има огромен потенцијал да придонесе кон економски развој. Сепак, како што го зголемуваат нивото на соработка и се доближуваатдоцелосно елиминирање на  царинските давачки во меѓусебната трговија, земјите на ЦЕФТА се соочуваат со нови предизвици. Разноликоста на овие прашања целосно се одразува во агендата на настанот CEFTA Недела 2014, и ја потврдува комплексноста на процесот на трговско интегрирање“, потенцираше Путни, истакнувајќи дека Владата на САД,препознавајќи ја важноста на регионалниот дијалог и размената на мислења во рамки на ЦЕФТА, е почестена што доби можност да го поддржи овој настан преку Агенцијата за меѓународен развој УСАИД.

ЦЕФТА Неделата 2014 беше фокусирана на клучните приоритети на претседателството на  Република Македонија  со  ЦЕФТА во 2014 година, прилагодени да ги опфатат четирите димензии на столбот за „Интегриран раст“ од Стратегијата на ЈИЕ 2020, со што се воспоставува врската  помеѓу  приоритетите  на  ЦЕФТА  и приоритетите на  ЈИЕ 2020.

Притоа, целта на столбот ,,Интегриран раст“ е да ја промовира регионалната трговија и инвестициите, нивната врска и политиките на недискриминаторска основа, транспарентноста, предвидувањата кои ќе го зајакнат протокот на стоки, инвестиции, услуги и луѓе во рамките на регионот.  /крај/со/ст