Услугите во домаќинството, на пример кога некој ќе повика во сопствениот дом мајстор или хигиеничар, не се опфатени со предлог Законот за забрана и спречување на нерегистрирана дејност. Целта  е да се спречи вршењето на нерегистрирани дејности од поголем обем, поголеми бизниси кои не се регистрирани и се дел од сивата економија, појасни министерот за труд и социјална политика Диме Спасов.

На првата јавна расправа во однос на Предлог законот за забрана и  спречување на вршење на нерегистрирана дејност што се одржа во петок (07.11) министерот Спасов истакна дека нацрт текстот е подготвен после опсежни анализи, црпење на искуства од слични решенија во соседството, но и консултации со партнери од Економско-социјалниот совет. 

„Нерегистрираната дејност беше парцијално регулирана во дел од посебните закони, додека пак во одредени закони и воопшто не беше регулирана и опфатена. Во законите каде што е регулирана, има минимална казна за вршење на нерегистрирана дејност или воопшто ја нема. Практично  поради тие причини постоеше огромен простор и стимул за сивата и неформална економија. Односно, оние кои не беа регистрирани не плаќаат даноци, не ги регистрираат своите бизниси, не ги пријавуваат своите вработени, не ги исполнуваат стандардите за работа, бидејќи практично немаше забрана, ниту казна, ниту постапка која е дефинирана во законите”, рече Спасов.

Тој истакна дека со овој закон се опфатени нерегистрирани дејности од поголем обем, додека домаќинските услуги се исклучени. 

„Целта на законот е да се спречи вршењето на нерегистрирани дејности од поголем обем, поголеми бизниси кои не се регистрирани и се дел од сивата економија и не исполнуваат никави стандарди, како на пример: физичките лица кои градат згради, маркетинг во кои работат повеќе работници на сопственикот нема никаква фирма и функционира како физичко лице, нерегистрирани угостителски објекти ресторани, кафулуња, сендвичари кои продаваат храна на голем број на граѓани, увезувачи и продавачи на возила  и така натаму. Нашата цел со овој закон не е да ги опфатиме и казниме работите и услугите кои се вршат во домаќинствата односно некој во сопствениот дом кога ќе повика мајстор или хигиеничар и токму заради тоа овие услуги, односно сите услуги во домаќинствата нема да се опфатат со овој предлог закон и истите се исклучени”, појасни министерот за труд и социјална политика. 

Предлог-законот за забрана и спречување на нерегистрирана дејност ќе го санкционира: 

          – вршењето на дејност од страна на  правно лице која не е запишана во посебните регистри утврдени со закон, покрај трговскиот регистар;

            – вршење на дејност од страна на  правно лице без да поседува законски пропишан акт/и за исполнување на условите за вршење на регистрирана дејност издаден/и од надлежен орган согласно закон;

            – вршење на дејност од страна на физичко лице  која не е регистрирана кај надлежен орган;

            – вршење на дејност од страна на физичко лице без да поседува законски пропишан акт/и со кој ги исполнува условите за вршење на регистрирана дејност издаден/и од надлежен орган согласно закон и

             – кога правното или физичкото лице врши дејност спротивно на забраната на вршење дејност изречена од надлежен орган”.

Во однос на казнената политика, според Спасов, предвидени глоби во законот се:

            -Глоба во износ од 10.000 до 20.000 евра во денарска противвредност  ќе му се изрече за прекршок на работодавач-правно лице

            -Глоба во износ од 3.000 до 10.000 евра во денарска противвредност ќе му се изрече за прекршок на физичкото лице

            -Глоба во износ од 2.000 до 3.000 евра во денарска противвредност  ќе му се изрече  за прекршокот на работодавач-правно лице како соучесник.

Во предлог законот многу јасно се наведени исклучоците или дејностите кои нема да бидат опфатени како:

            -работа за сопствени потреби, семејна помош, соседска помош, продажба на лични користени предмети, работа која се врши без финансиски надоместок или друга материјална корист и ако работата не се извршува редовно.

            -дејноста која ја вршат физички лица преку продажни места на организирани зелени пазари,

            -извршувањето на нужна работа за спречување на несреќи или отстранување на последици од природни и други несреќи

            – услуга извршена за потребите во домаќинството

            -повременото вршење на активност за која со закон е исклучена обврската за регистрација на дејноста кај надлежен орган (панаѓури, саеми).крај/мф