Упатувајќи најсрдечни честитки за рударскиот празник, министерот за економија Беким Незири ја истакна важноста на рударскиот како движечки сектор во македонската економија, во текот на неговото присуство на централната прослава на Денот на рударите на Македонија, која се одржа во рудникот Бучим-Радовиш. 

„Со учество од 1,5 отсто од бруто домашниот производ (БДП) на земјата, во рударскиот и во придружните сектори што го опслужуваат, работно се ангажирани 13 илјдаи лица, кои придонесоа за раст на производството минатата година од околу 10 отсто. И најновите статистички показатели се позитивни, односно прометот во индустријата во секторот Рударство и вадење на камен во јуни 2015 година, во однос на јуни 2014 година, бележи пораст од 21.9 проценти, а индексот на индустриско производство во овој сектор, во јуни годинава, исто така, бележи пораст од 9,2 отсто, во однос на јуни минатата година“, рече Незири.

Министерот за економија потсети и дека во земјата има повеќе од 150 рудници кои активно работат, а само во текот на 2015 година доделени се 15 концесии за детални геолошки истражувања и 35 концесии за експлоатација на минерална суровина.

„Со извршените измени на Законот за минерални суровини во поглед на усогласување со новата казнена политика, лично сметам дека ќе придонесеме за раздвижување на компаниите од рударскиот сектор и подобрување на условите за стопанисување, но и справување со нелојалната конкуренција“, истакна министерот Незири потенцирајќи ја важноста на човечкиот потенцијал, кој работи во рудниците.

„Рударите претставуваат наш бесценет човечки ресурс и должни сме да им обезбедиме што подобри услови за работа, а со цел да ги наградиме за нивната професионална предаденост и одговорност, и оваа година им доделуваме пригодни плакети“, рече Незири, врачувајќи им признанијата за најуспешните во форма на плакети на 16 најуспешни рудари, номинирани од страна нивните работодавци, според достигнувањата во изминатата година.

Заменик генералниот директор на БУЧИМ и претседател на Македонската асоцијација за рударство при Стопанската комора на РМ, Николајчо Николов, изрази посебно задоволство што централната прослава на Денот на рударите се одржа токму во Бучим, во годината кога овој рудник ги одбележува своите два јубилеја – 35 години од работа на Бучим и 10 години работа на рудникот во состав на компанијата „Солвеј“.

„Во изминатиот период е остварен вкупен приход од 346 милиони евра, остварена е добивка од 54 милиони евра, исплатени се бруто плати од 37 милиони евра и концесиски надомест од 7,5 милиони евра. Во Бучим се вработени околу 700 работника, нето исплатена плата за 2014 година е 440 евра, а вкупните инвестициони вложувања се над 51 милион евра“, информираше Николов, додавајќи дека целокупната реализација е за извоз, а значителни суми се издвоени и за поедините фондови во општината и државата, што говори за важноста на овој рудник за економијата во Радовиш и поширокиот регион. /крај/мф/ап

Извор: Макфакс