Македонскиот совет за зелена градба со поддршка на Сојузот на стопански комори на Македонија (ССК), започнува со зеленото делување,  создавање нови трендови во градежништвото, како и  подигње на  јавната свест на национално ниво за промовирање на праксата и технологијата на зелена градба.

„Одржливост на градбата, енергетска ефикасност и заштита на животната средина, ќе генерира одржлив раст во градежниот сектор, креирање работни места, зголемување на енергетската сигурност како и намалување на сиромаштијата, бидејќи увозот на нафта и гас во Европа чини стотици милијарди евра секоја година. Исто така, ќе се подобрува испораката на јавните услуги, а финансиските придобивки од зелена градба ја зголемуваат можноста за продажба и закуп, помагаат да се намалат капиталните расходи како и намалување на ризикот од прописите кои бараат скапи модификации на објекти. Го предводиме преодот на пазарот со недвижности кон одржливост и заштита на животната средина и преку тоа кон подобар живот за сите луѓе во Република Македонија“, изјави Сеад Кочан, претседател на Македонскиот совет за зелена градба и заменик претседател на ССК.

Според претседателот на ССК, Данела Арсовска, зелената градба, позната како одржлива градба, се однесува на структура и употреба на процес кој е еколошки одговорен и енергетски ефикасен во текот на целиот животниот циклус на една зграда, од дизајн, изградба, работење, одржување, реновирање како и уривање.

„Трошоците при зелена градба се само од 1 до 5 отсто повисоки и корисникот на станбениот или деловниот простор преку заштедите кои ќе ги оствари ги враќа овие средства во првата година, бидејќи заштедата на електрична енергија е околу 30 отсто, додека на вода околу 40 отсто на годишно ниво. Концептот на зелена градба е од огромно значење не само за градежниот сектор туку и за секој граѓанин на Република Македонија, бидејќи значително го подобрува квалитетот на живот, влијае врз подобрување на сигурноста и здравјето на човекот како и на животната средина“, изјави Арсовска.

Со цел следење на европските директиви, нагласи министерот за транспорт и врски Миле Јанакиески, со последните законски измени на Законот за градење се изврши усогласување со Законот за енергетика.

„Од 1 јануари 2015 година за сите нови градби ќе биде задолжително  поседување сертификат за енергетска ефикасност. Кога се аплицира за одобрение за градење, самиот проект треба да содржи потврда за енергетска ефикасност. Тоа ќе се бара и при значителна реконструкција на градбите, со исклучок на индивидуалните објекти“, рече Јанакиески.

Тоа треба да доведе до пониски трошоци за домаќинствата и за компаниите, особено во делот на заштеда на енергијата.

Според заменик-министерот за животна средина и просторно планирање Стево Темелковски, заштитата на животната средина не треба да биде ограничена од економската и социјалната развиеност.

„Постојниот дел на потрошувачката на енергија во градежниот  сектор опфаќа 39 отсто од севкупната потрошувачка на електрична енергија,  станбениот сектор користи приближно 80 отсто од енергијата потребна за објектите, а  објектите дополнително користат 69 отсто електрична енергија и 40 отсто од топлинската енергија за која со комбинирано производство се емитираат приближно 71 отсто од годишните емисии на CO 2“, рече Темелковски.

Според него, енергетските трошоци заземаат огромен дел од националните и локалните буџети./крај/со/мф