Економија
Мизо: Нормално е дел од профитот во ТИРЗ да се одвиваат во матичните компании на инвеститорите

Одливот на директни странски инвестиции во Македонија е нормален процес како и секаде во светот кога се работи за компании чии седишта се надвор од државата во која се инвестира, одговори во петок во Охрид директорот на Агенцијата за технолошко развојни зони Виктор Мизо, пренесе OhridNews.
Народна банка во септември објави дека од Македонија се одлеале 22.6 милиони евра директни странски инвестиции, што е втор таков одлив оваа година од технолошките зони во земјата.
„Тоа директно зависи ид бизнис плановите на компаниите во кој момент тие планираат да направат прераспределба на профит и на кој начин тоа може да го исплаќаат во нивните матични компании или мајките фирми навистина само зависи од компаниите, ние се трудиме цело време да имаме дополнителни инвестиции. Мора да се земе предвид дека дел од тие инвестиции се реинвестираат во Македонија, но дел од профитот секогаш ќе биде одлеан надвор во мајките фирми бидејќи тоа нормално се очекува насекаде во светот и не е случај само во Македонија“, изјави Мизо.
Во третиот квартал нивото на странски инвестиции изнесува 200 милиони евра, но прецизно не може да се предвиди дали во 2016 ќе има повеќе странски инвестии од минатата година, вели Мизо.
„Тешко е да се прогнозира на кое ниво ќе бидат странските инвестиции бидејќи тоа зависи од моментот кога влегува вредноста на инвестицита, дали е тоа опрема или е вложување во нови производствени капацитети, но инвестициите во истиот временски период се подобри од бројките во минатата година, и она што е најважно ние се трудиме да привлечеме инвестиции најчесто во гринфилд, но и во браунфилд производствени капацитети бидејќи тој вид инвестиции имаат најголема додадена вредност“, додаде Мизо.
Директорот на Агенцијата за технолошко индустриски развојни зони заедно со вицепремиерот за економски прашања Владимир Пешевски денеска беше во посета на фабриката „ОДВ Електрик“ и на ТИРЗ Охрид – Струга. Тој истакна дека плановите на ОДВ ќе ги надминат првичните планирања за 1000 вработивања, кои ќе бидат зголемени на 1200 лица кога ќе се изгради фабриката во ТИРЗ Охрид – Струга.
„Сите активности се во крајна фаза за новата индустриско технолкошко развојна зона да биде функционална идната година и да им се нудат истите услуги на инвеститорите како што тоа се прави во зоните во Скопје, Штип, Прилеп и во Кичево кои се веќе функционални. Тоа е важно особено за Охрид бидејќи се креираат нови работни места со технолошки развиени зони“, рече Мизо./крај/он/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Објавен јавен повик за надомест на трошоци за одржување на висински пасишта и ливади и поддршка на традиционално сточарство

Денеска е објавен Јавниот повик 08/2025 за доставување на барање за исплата на средства од Програмата за финансиска поддршка на рурален развој за 2025 година.
Поддршката е наменета за надомест на трошоци за одржување на висински пасишта и ливади и поддршка на традиционално сточарство, со цел зачувување на руралните подрачја и промовирање на одржливо земјоделство.
Право на поддршка имаат земјоделски стопанства регистрирани согласно Законот за земјоделство и рурален развој во Единствениот регистар на земјоделски стопанства при Министерството за земјоделство, шумарство и водостопанство.
Висина на поддршката:
• 100% од исплатената просечна нето-плата во период од 1 јануари 2024 година до 31 декември 2024 година, како трошок за чување и напасување на добитокот (овци, кози и/или говеда) на пасишта и ливади, односно регистрирани одгледувалишта кои се наоѓаат во населени места со надморска висина еднаква или повисока од 700 метри;
• 60% од исплатената просечна нето-плата во период од 1 јануари 2024 година до 31 декември 2024 година, како трошок за чување и напасување на добитокот (овци, кози и/или говеда) на пасишта и ливади, односно регистрирани одгледувалишта кои се наоѓаат во населени места со надморска висина пониска од 700 метри.
Услови за доделување:
• 1 вработено лице на 150 овци;
• 1 вработено лице на 100 кози;
• 1 вработено лице на 50 говеда, но не повеќе од 620.000 денари по вработено лице.
Задржување на истиот број вработени најмалку една година по исплатата.
Барањата со потребната документација потребно е да се поднесат најдоцна до 30.07.2025 година.
Економија
Божиновска: Македонија ја гради новата енергетска мапа на Балканот

Македонија влегува во клучна фаза на трансформација на енергетскиот систем, земјата не само што вложува во стабилноста и модернизацијата на сопствената мрежа, туку стана активен играч во регионалното поврзување и енергетската интеграција, изјави министерката за енергетика, Сања Божиновска.
Според неа, со новите интерконектори, стратешките трансформаторски станици и инвестициите во паметна енергетска инфраструктура, државата го поставува курсот кон енергетска независност и улога на регионален енергетски коридор.
Божиновска најави дека во следните денови официјално започнува изградбата на гасниот интерконектор со Грција.
„Интерконекторот е долг 68 километри, ќе пренесува не само природен гас, туку и водород, остварена e заштеда од 12 милиони евра и ќе биде изграден од македонска компанија – директна корист за домашната економија“, рече таа.
Во меѓувреме, додаде Божиновска, Македонија и Србија направија значаен исчекор кон ново енергетско поврзување – минатата недела се потпиша Меморандум за соработка меѓу НОМАГАС и Србијагас за изградба на интерконектор меѓу Клечовце и Врање, со вкупна должина од 70 километри, од кои 23 километри ќе бидат на македонска територија. Во рамки на проектот ќе се изградат и мерни станици од двете страни на границата. Студиите за изводливост и за влијание врз животната средина се веќе во тек, со поддршка од Инвестициската рамка за Западен Балкан (WBIF).
„Преку овие две стратешки поврзувања, Македонија се позиционира како нова транзитна точка за природен гас на релација Југ – Север, односно од ТАП гасоводот и ЛНГ терминалот во Александруполис кон Србија и Средна Европа, со капацитет до 3 милијарди нормални метри кубни годишно. Ова е директна поддршка на енергетската диверзификација на целиот регион, со зголемена употреба на гас од различни извори“, рече таа.
Изградбата на 400/110 kV врската Охрид – Елбасан, пак, ќе го заокружи електроенергетското поврзување на Македонија со сите соседни држави – стратегиски проект за цел регион.
„Ова е новата сила на македонската енергетика. Со регионалните интерконектори, Македонија веќе не е само краен потрошувач – станува активен учесник во преносот и стабилноста на енергетиката во Југоисточна Европа. Ова е патот кон сигурна енергија, економска отпорност и стратешка позиција на енергетската карта на Балканот. Македонија ја гради новата енергетска мапа на Балканот.“, вели министерката за енергетика, рударство и минерални суровини Сања Божиновска.
Економија
Министерката Димитриеска-Кочоска ќе учествува на 4. меѓународна конференција за финансирање на развојот во Севилја

Министерката за финансии Гордана Димитриеска- Кочоска заедно со претседателката Гордана Сиљановска-Давкова од денеска ќе престојува во работна посета на Кралството Шпанија.
Министерката Димитриеска-Кочоска ќе се обрати на Тркалезна маса „Leveraging private business and finance“ во рамки на 4. Меѓународна конференција за финансирање на развојот (FfD4), којашто под покровителство на Организацијата на Обединетите нации ќе се одржи во Севиља.
На Конференцијата, на којашто е најавено учество на педесетина шефови на држави и влади, министри, претставници на меѓународните организации, на бизнис заедниците и граѓанското општество, треба да биде усвоен „Договорот од Севиља“.
Целта на лидерскиот собир е изнаоѓање на решенија за справувањето со финансиските предизвици во исполнувањето на Целите за одржливиот развој и Агендата 2030, реформирање на меѓународната финансиска архитектура и поттикнување на инвестиции од страна на приватниот сектор.
Во рамки на посетата, предвидено е претседателката Сиљановска-Давкова да одржи билатерална средба со премиерот на Шпанија, Педро Санчез, а на средбата ќе присуствува и министерката Димитриеска -Кочоска.