Министерката за енергетика, рударство и минерални суровини, Сања Божиновска и нејзиниот хрватски колега, министерот за економија на Република Хрватска, Анте Шушњар, денеска, во Охрид го потпишаа Меморандумот за разбирање и соработка во енергетскиот сектор меѓу двете земји. Меморандумот беше потпишан во рамките на работниот дел од посетата на висока хрватска делегација на земјава, предводена од премиерот на Хрватска, Андреј Пленковиќ. 

Во рамките на официјалниот дел, беше потпишан Договор меѓу Владата на Хрватска и на Македонија за стратешка соработка. Договорот го потпишаа двајцата премиери, Христијан Мицкоски и Андреј Пленковиќ. 

Посетата на хрватската делегација на земјава беше заокружена со одржување на Бизнис форум, на којшто присуствуваа претставници на македонската и хрватската бизнис заедница. На Форумот беа претставени можностите за идна соработка на повеќе полиња, меѓу кои и можностите за реализација на нови проекти и инвестиции во енергетскиот сектор. 

„ Енергетиката денес е една од најважните стратешки области за Европа и за целиот регион. Војната во Украина, како и случувањата на Блискиот Исток, јасно покажаа дека енергетската сигурност повеќе не е само економско, туку и геополитичко и безбедносно прашање. Затоа, државите кои знаат да соработуваат, да инвестираат и да градат заеднички инфраструктурни проекти, ќе бидат посилни, постабилни и поотпорни на идните предизвици“, истакна министерката Божиновска во своето обраќање на Форумот.

Меморандумот за разбирање и соработка во енергетскиот сектор меѓу Македонија и Хрватска којшто беше потпишан денеска е резултат на пријателските односи и долгогодишната взаемна соработка меѓу двете земји, којшто се базира на стратешката определба на Македонија за членство во ЕУ, а повикувајќи се на обврските според Договорот за Енергетска заедница и важноста на постепеното усогласување со енергетското законодавство на ЕУ. 

Целта на Меморандумот за разбирање и соработка во енергетскиот сектор помеѓу Министерството за енергетика, рударство и минерални суровини на Македонија и Министерството за економија на Хрватска е креирање на рамка за унапредување на можната соработка меѓу двете земји во енергетскиот сектор во насока на: зајакнување на енергетската безбедност и регионалните интерконекции; унапредување на интеграцијата на обновливи енергетски извори и транзицијата кон системи со ниска јаглеродна емисија; интеграција на пазарот на електрична енергија и регулаторна конвергенција со правилата на ЕУ и поддршка во градењето на институционалниот капацитет, размена на знаења и заеднички иницијативи.

Министерот за економија и труд Бесар Дурмиши и заменик-министерот Марјан Ристески денеска остварија работна средба со претставници на трите најголеми бизнис-комори во државата и Организацијата на работодавачи на Македонија, на која се разговараше за актуелната економска состојба, предизвиците со кои се соочува бизнис секторот и мерките за поддршка на домашните компании.

На средбата присуствуваа Горан Ѓорѓиевски – претседател на Сојузот на стопански комори на Македонија, Нухиу Алиу – претседател на Стопанската комора на Северо-Западна Македонија, Антони Пешев – извршен директор на Стопанската комора на Македонија, Владанка Трајкоска – претседател на Организацијата на работодавачи на Македонија и Ангел Димитров – претседател на Собранието на Организацијата на работодавачи на Македонија.

Во фокусот на разговорите беа економската состојба во државата, глобалните економски ефекти и енергетската криза предизвикани од воениот конфликт на Блискиот Исток, како и владините мерки за поддршка на домашните компании и зачувување на нивната ликвидност и конкурентност.

Дурмиши и Ристески ги информираа претставниците на коморите за тековните активности на Министерството за економија и труд насочени кон подобрување на бизнис-климата и обезбедување конкретна поддршка за компаниите.

„Владата и Министерството за економија и труд континуирано работат на креирање мерки и политики за поддршка на домашните компании, за нивен побрз раст и развој, како и за зголемување на нивната конкурентност на меѓународниот пазар. Во моментов активни се повеќе јавни повици и програми кои се директно наменети за поддршка на стопанството. Со измените во Законот за финансиска поддршка на инвестициите го продолживме рокот за аплицирање до 15 јуни, а до 30 јуни е активен и Јавниот повик за поддршка на микро, малите и средните претпријатија и занаетчиите преку субвенции за набавка на нови машини. Наскоро ќе биде донесен и Оперативниот план за вработување, кој содржи значајни мерки за поддршка на компаниите и отворање нови работни места“, беше истакнато на средбата.

На средбата беше упатен апел до коморите и нивните членки активно да ги следат јавните повици и огласи што ги објавуваат Владата и министерствата и, согласно своите потреби и можности, да аплицираат за достапната институционална поддршка.

Вицепремиерот и министер за транспорт, Александар Николоски, денеска во Охрид оствари работна средба со заменик претседателот на Владата на Хрватска и министер за поморски работи, транспорт и инфраструктура, Олег Бутковиќ.

На билатералната средба се зборуваше за развој на транспротниот сообраќај во регионот, можностите за продлабочување на соработката во делот на железничкиот сообраќај, како и продлабочување на економската соработка помеѓу двете земји.

„Николоски се заблагодари за поддршката во решавањето на проблемот со превозниците и професионалните возачи и се заблагодари и за измените на Законот за работни визи кои веќе ги направи Република Хрватска кои се од огромно значење за нашите превозници. На самата средба се разговараше за економската соработка помеѓу двете земји и можностите за засилена економска активност помеѓу двете држави“, соопштија од македонското министерство.