Економија
Прогласени најуспешните 100 компании во Северозападна Македонија
Економската и политичката криза, која владее во земјата, тешкотиите во обезбедувањето финансиски средства претставуваат главен проблем за многу бизниси, кои минатата година се соочуваа со ниска побарувачка како на внатрешниот така и на надворешниот пазар, беше речено на промоција на каталогот „Топ 100“, во кој е направен избор на најдобри компании од албанската бизнис заедница во Македонија, во организација на Стопанска комора на Северозападна Македонија.
Изборот на „Топ 100“ се спроведува по шести пат и има за цел промоција на најмоќните компании на локалниот пазар, кои се дел од оваа комора. Промоцијата се врши преку каталог, што во себе содржи анализа на потенцијалот на компаниите на домашен пазар и придонесот во вкупниот Бруто домашен производ на земјата.
„Радува фактот што годишниот обрт на најголемите 100 компании во Северозападна Македонија за 2015 година е над 622 милиони евра, при што нето – добивката изнесува над 33 милиони евра, а бројот на вработени е речиси 5.000, што е доказ за развојот на овие компании, благодарение на мудрите бизнис одлуки и стратегии на нивните менаџери и квалитетниот избор на човечки ресурси ангажирани во нив“, рече министерот за економија Дритон Кучи.
Според него, овие параметри за фирмите во Северозападна Македонија, остварени во 2015 година се уште една потврда од страна на стопанството дека долгорочните и добро поставени економски политики се услов за раст на економијата и позитивни резултати, и покрај сложената политичка ситуација и неизвесноста која ја имаа бизнисмените при донесувањето на своите одлуки.
Министерот Кучи потсети дека во изминатиов период се овозможи олеснет пристап до финансии, преку поволните кредити и кредитни линии, поддршка за зголемување на извозот, како и креирање и спроведување на регулатива која ќе овозможи повеќе инвестиции, а нормализирањето на споменатите состојби, како и подобрувањето на можностите на европската економија, ќе придонесат за нормализирање на странската побарувачка на земјите од ЕУ, за уште поголема покриеност на увозот со извоз и позасилени деловни активности на нашите компании.
Стопанската комора на Северозападна Македонија континуирано ги следи и анализира движењата на албанските бизниси во земјата, со цел зајакнување на овие бизниси.
„Како сведоци на економската и политичката криза, која владее во земјата, тешкотиите во обезбедувањето на финансиски средства претставуваат главен проблем за многу бизниси, членки на СКСЗМ, кои минатата година се соочуваа со ниска побарувачка како на внатрешниот така и на надворешниот пазар. СКСЗМ ќе продолжи да работи кон остварување на забрзан економски раст, создавање на поволен амбиент за водење бизнис во нашата земја. Ние постојано сме чадор за бизнисот, бидејќи само на тој начин ќе се овозможи понатамошен развој на секој член на нашата комора”, рече Неби Хоџа, претседател на Стопанската комора на Северозападна Македонија.
На промоцијата на шестиот по ред Каталог на топ 100 најуспешни компании на ова комора, присуствуваа и претседателите на СКМ И ССКМ на Македонија, Бранко Азески и Даниела Арсовска, министерот за финансии Миновски, за правда Валдет Џафери и министерот за странски инвестиции Арлинд Зеќири./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.