Економија
„Синами“– атрактивно место за работа кое буди интерес кај ИТ-кадрите

„Добрите програмери сакаат две работи: да бидат добро платени и да работат на напредни, иновативни софтверски решенија. Во ‘Синами’ двете овие потреби им се задоволени“, вели Игор Лештар, македонски ИТ-претприемач, инвеститор и сопственик на ИТ-компанијата „Синами“ во интервју за Фактор.мк
ИТ-компанијата „Синами“ веќе буди голем интерес кај програмерите. Впрочем, компанијата е присутна речиси 20 години на пазарот како дел од групацијата на „Сеавус“, меѓутоа по аквизицијата на „Сеавус“ од страна на чешката групација „Арикома“, „Синами“ се ребрендира, и со нова енергија и нова визија, продолжува да ги освојува светските пазари.
Но, она што е интересно е дека компанијата одлично се позиционира и како одличен работодавач во ИТ-секторот, привлекувајќи голем број ИТ-професионалци. На нивната страница за кариера, како и на LinkedIn профилот на „Синами“ редовно се наоѓаат огласи за искусни ИТ-програмери, а она што најверојатно ги привлекува е дека компанијата нуди удобна, пријателска работна средина, континуирани можности за личен и професионален развој, можности за работа од дома итн.
Меѓутоа, како што вели сопственикот на „Синами“, Игор Лештар, инаку ИТ-претприемач и инвеститор кој досега во најголема мера беше препознаен како првиот човек на „Сеавус“, компетитивните плати и континуираната поддршка за развој на вработените не се единствените причини кои ги привлекуваат ИТ-професионалците. Како што вели тој во интервју за Фактор.мк, добрите програмери сакаат две работи: да бидат добро платени и да работат на напредни, иновативни софтверски решенија. За нив не претставува предизвик да работат на проекти кои се повторуваат или кои се од техничка природа. Во „Синами“ тие имаат можност да експериментираат со нови технологии и да работат на, како што се вели, „cutting edge“ продукти.
„Секако дека нашата стратегија за развој, меѓу другото, се темели и на силно вложување во нови ИТ-кадри и во постојан развој на постоечките, меѓутоа она што нè издвојува е дека во ‘Синами’ работиме на исклучително технолошки напредни продукти кои се предизвик за секој ИТ-професионалец“, вели Лештар и додава дека нивните тимови се вклучени практично во целиот процес на развивање на еден производ, односно од самата идеја, преку акциониот план, па сè до комплетната реализација.
Дополнителна предност е и тоа што во „Синами“ тие имаат можност да работат за светски познати брендови, а во нивното портфолио клиенти се вбројуваат дури 70% од најуспешните компании според Fortune 500. „Овде зборуваме за портфолио клиенти како Airbus, Rolls Royce, McLaren, SAP, Tesla и слични профили на клиенти од многу различни индустрии со просечна големина од 40.000 вработени“, објаснува Лештар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Мицкоски: Имаме раст на извозот, градежништвото и туризмот гарантираат раст на БДП и подобар стандард на граѓаните

Во одговор на новинарско прашање, претседателот на ВМРО-ДПМНЕ, Христијан Мицкоски, истакна дека увозот е многу помал за околу 8% во евра, или за 12-13% во долари, додека пак извозот е во пораст во евра 23%, додека пак во долари е 28%.
„Ако ги споредите првите два месеци април и мај од оваа година, со првите два месеци април и мај од 2024 година, длабоки анализи правиме, ќе видите дека за 80 милиони долари е намален трговскиот дефицит, а тоа е цели 13% и тоа ќе учествува во БДП. Ако на тоа се додаде растот на индустриското производство коешто е во просек за април и мај, првите два месеци од вториот квартал 5,5%, а само во мај 9,4%’’, истакна Мицкоски.
Мицкоски додаде дека растот на туризмот и градежништвото, ќе доведат до зголемување на животниот стандард на граѓаните, но и зголемување на бруто домашниот производ.
„Растот на туризмот повеќе од 20%, инвестициската активност повеќе од 15%, растот и бумот во градежниот сектор, сето тоа нас ни гарантира еден успешен резултат за БДП во вториот квартал којшто очекувам да продолжи и во третиот и четвртиот квартал’’, заклучи Мицкоски.
Економија
Македонската „Green Machines“ ја зацврстува дистрибутивната мрежа во САД

Green Machines на БРАКО, познат по своите иновативни еколошки возила за чистење на јавни површини, бележи сериозен раст на американскиот пазар со мрежа на реномирани дистрибутери низ повеќе од 30 американски сојузни држави.
Најнов партнер е компанијата Mar-co Equipment од регионот на Лос Анџелес, која стана ексклузивен дистрибутер за Јужна Калифорнија.
Моментално, Green Machines има дистрибутери во следниве американски држави:
Owen Equipment – Вашингтон, Орегон, Северна Калифорнија, Невада, Ајдахо, Монтана, Јута, Колорадо, Ново Мексико
Industrial Disposal Supply – Тексас
Mar-co Equipment – Јужна Калифорнија
United Rentals – достапен низ сите држави и територии на САД
Grainger – достапен низ целата територија на САД
Equipment Depot – Луизијана, Мисисипи, Кентаки, Индијана, Охајо, Пенсилванија, Масачусетс, Конектикат, Њу Џерси, Мејн, Вирџинија, Милвоки, Висконсин, Флорида, Орегон, Вашингтон
Van Keppel – Канзас, Арканзас, Илиноис, Висконсин, Ајова
Овој успех претставува уште еден доказ за конкурентноста на македонскиот индустриски производ и неговата технолошка супериорност. Со новите дистрибутерски партнери, Green Machines продолжува да ја шири својата глобална визија за почисти, поеколошки и поефикасни урбани средини.
ПР текст
Економија
Муцунски: Владините политики за извоз даваат резултати – раст од 23,44 отсто во мај

Министерот за надворешни работи и надворешна трговија, Тимчо Муцунски, утрово на социјалните мрежи сподели податоци за кои рече дека го потврдуваат ефектот од економските политики на Владата, при чија реализација значајна улога има и Министерството што го предводи. Статистиката покажува стабилни и позитивни трендови во извозот, дури и во услови на стагнација на европскиот пазар.
Според објавените податоци, македонскиот извоз во мај 2025 бележи раст од 23,44 проценти, додека за првите пет месеци од годината порастот изнесува 3,15 отсто. Во истиот период, увозот е зголемен за само 1 отсто, што упатува на стабилен трговски биланс и позитивно салдо.
„Податоците укажуваат на значително поголем извоз од увоз – што значи повеќе свеж капитал во државата, зајакната девизна позиција и дополнителен поттик за економски раст. Зголемениот извоз отвора нови работни места, го зајакнува домашното производство и ја зголемува конкурентноста на македонските производи“, напиша министерот Муцунски.