Економија
Трговијата со Косово паѓа заради неизградениот 13 километарски автопат

Албанскиот бизнис во Македонија е насочен на извоз кон Косово, но непостоечката или слабата инфраструктура на позврзување со нашиот северен сосед придонесува извозот кон Косово во последните пет години да падне за 2,5 пати.
„Ние бараме, иницираме автопатот кон Блаце, конкретно кон Косово, да се заврши што побрзо оти тој 13 километарски автопат, кој не е многу во вредност, би носел многу поголем бенефит на стопанството на Македонија. Ние знаеме дека во 2011 година во Македонија обртот со Косово беше 550 милиони евра извоз и 30 милиони увоз“, рече Неби Хоџа, претседател на Стопанската комора за северозападна Македонија, во петок на конференцијата „25 години независна Република Македонија: Што научивме за македонската економија и како понатаму“, која се одржува во Скопје.
Тој појасни дека во истиот период, Косово кон Албанија изгради автопат од 300 километри кој чинеше две милијарди евра, што значи дека економијата меѓу Албанија и Косово се зголеми, а со Македонија назадуваше и имамае паѓање на тој обрт и сега Македонија кон Косово изнесува некаде 200 милиони евра, што значи пад за околу 2,5 пати.
„Затоа апелирам до властите и политичарите да се насочат кон капитални инвестиции кои носат бенефит за стопанството и за бизнисот“, рече Хоџа.
Се пожали дека како Стопанска комора на северозападна Македонија која претежно го застапува албанскиот бизнис во Македонија, доставиле повеќе барања до институциите за подобрување на економската клима но до сега немаат добиено конкретен одговор.
„Последните барања се транспарентност на властите, отчет, подобрување на Бруто домашниот производ и ред други барања кои ние сме ги доставиле до сите институции“, рече Хоџа.
На денешната конференција со еминентни гости се очекува да се постават црвени линии во економијата за која сите, без разлика на која политичка опција припаѓаат да се сложат со консензус, да се направи една стратегија за следните 25 години./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.
Економија
Во Народната банка се одржа 54. сесија на Клубот на истражувачите

Во Народната банка се одржа 54. сесија на Клубот на истражувачите на која беше претставен научниот труд „Макроекономски, институционални и финансиски детерминанти на дефицитот на тековната сметка во Северна Македонија: Согледувања преку временски серии“ од авторот Бардул Даути.
Сесијата ја отвори директорката на Секторот за монетарна политика, истражување и статистика, Султанија Бојчева-Терзијан, која посочи дека презентираниот труд нуди значајни сознанија за макроекономските и институционалните фактори коишто влијаат на дефицитот на тековната сметка во Република Северна Македонија. Таа нагласи дека надворешната позиција на македонската економија има особено значење, имајќи ја предвид стратегија на фиксен девизен курс, што ја спроведуваме. Во таа насока, одржливата тековна сметка претставува клучен елемент за зачувување на севкупната макроекономска стабилност.
Главниот заклучок на емпириската анализа е дека дефицитот на тековната сметка е резултат на макроекономски фактори – производниот јаз, како индикатор на домашната побарувачка, трговската отвореност и реалниот девизен курс. Дополнително, влијание имаат и фискални и финансиски фактори, како што се јавниот долг и паричната маса (М2), соодветно. Сепак, клучниот придонес на овој труд е вклучувањето на т.н. институционални фактори и оцената на нивното влијание врз билансот на тековната сметка. Студијата покажува дека силните институции – особено поефикасното управување, зголемениот квалитет на јавните услуги и заштитата на економските права, како што е правото на сопственост – можат значително да придонесат за подобрување на тековната сметка на платниот биланс. Овие заклучоци упатуваат дека, институционалните реформи се исто така важен сегмент за зајакнување на надворешната стабилност на економијата.
По презентацијата, следеше дискусија меѓу учесниците и презентерите, поттикната од презентацијата на трудот и од изнесените заклучоци. Следната сесија е планирана за септември годинава.