Претседателот на ВМРО-ДПМНЕ, Христијан Мицкоски, синоќа им се обрати на граѓаните во Карпош.
Тој истакна дека карпошани, како и сите граѓани, ќе ја изберат првата жена претседател на Република Македонија, професорката Гордана Силјановска-Давкова.

„Доста е од политичари што се насмеани, дотерани во фракови и пеперутка-вратоврска, газат дебели црвени персиски теписи на балови во Европа. Ќе гледате уморни и ненаспани политичари, кои, наместо проектите да ги чуваат во канцеларија, а инспекторите под мишка да ги носат на самото место со народот, ќе бидат политичари што ќе бидат уморни, ненаспани и здодевни со проектите под мишка тука помеѓу народот. И заедно со народот ќе ја градат иднината на оваа земја. Ова е нашата историска улога“, вели Мицкоски.

Тој посочи дека нема да ветува многу како што тоа го правеле некои досега, но тоа што ќе го вети, тоа и ќе го оствари. „Нам не ни требаат ниту жолтици, ниту бели дворци, ниту слава и моќ ниту, пак, ни треба крукче со „мајбахот“ на Трајче, нам ни треба добар збор од нашите сограѓани, да речат – фала богу, дојдоа чесни луѓе, чиј збор тежи. Тоа што го кажуваат, тоа и го спроведуваат. А јас се заветувам овде, од мојот Карпош, родниот Карпош, дека тоа што ќе го кажеме, тоа и ќе го направиме“, додаде тој.

Лидерот на ВМРО-ДПМНЕ потенцира дека заврши времето на политичари како Стево Пендаровски и Зоран Заев и доаѓа времето на честити луѓе што ќе ја водат државата.

„Вие сакате да чекорите во Европа за да се богатите, а ние сакаме да чекориме заедно со богата држава и богати граѓани, тоа е разликата помеѓу нас и вас. Вие би се откажале од целото минато, историја и традиција затоа што тие за вас се котва што не ви дава да одите напред. А за нас и историјата, и традицијата и културата се наше едро, во кое дува ветер и силно сакаме да чекориме кон вистинска, честита и достоинствена иднина“, посочи Мицкоски. Тој истакна дека Зоран Заев и луѓето околу него имаат проблем самите со себе, а граѓаните на Република Македонија имаат проблем со нив, проблем што ќе го решат на престојните претседателски избори и на предвремените парламентарни избори.

„Вие, господа од СДСМ, имате проблем со самите себе, а ние и граѓаните на Република Македонија имаме проблем со вас, но тој проблем ќе го решиме на 21 април, а потоа и на 5 мај. По тој 5 мај, потоа следуваат предвремени парламентарни избори, не дека му верувам на Зоран Заев, не дека верувам во неговиот збори. Тој не е честит збор, туку затоа што народот има таква енергија што ќе предизвика предвремени парламентарни избори. Затоа што на народот доста му е од понижувања, омаловажувања и виткање ‘рбет. Овој народ сака повторно да биде горд, достоинствен, со исправена глава и да чекори храбро кон иднината“, додаде Мицкоски.

Претседателот на ВМРО-ДПМНЕ забележа дека многу работи во минатото не биле фер, но сега се потребни обединетост и сплотеност за поразување на заевизмот, за поразување на принципот – кажувам, заборавам, негирам. „Нашиот сон за Македонија е голем и затоа кога ни велат дека е невозможно кога нè обесхрабруваат, кога ни велат дека сè е готово, сè е завршено, тоа треба да нè мотивира да продолжиме да се бориме, да се бориме и да го сонуваме нашиот сон за Македонија за да стане еден ден јаве. И во таа борба нема да победат ниту помногубројните ниту помоќните, туку ќе победат оние што се мотивирани и храбри, но вечерва на овој пролетен дожд гледам многу такви луѓе, мотивирани и храбри кои сакаат да победат. Затоа, ве повикувам, браќа и сестри, на 21 април заедно да ја прославиме победата на Гордана, на борецот за македонските национални и државни интереси. Доаѓа зората, изгрева зората и ја носи правдата во Република Македонија“, заврши Мицкоски.