Култура
Врвниот светски електронски музичар Метју Џонсон со настап во живо на „ПМГ рекордингс фестивал 13“

Втората фестивалска вечер на годинешното издание на „ПМГ рекордингс фестивалот“ ќе биде во дансинг-салата во Младинскиот културен центар, оваа сабота, 14 октомври.
Предводена од реномираниот светски електронски музичар Метју Џонсон од Канада, програмата на втората фестивалска вечер ни носи и признати домашни продуценти и диџеи од електронската музичка сцена заедно со надоаѓачки таленти од младата генерација активни во полето на хип-хоп, трап, електронската и поп-музиката.
Метју Џонсон е врвен светски музичар. Уникатен артист, кој е повеќе од 20 години на самиот врв на електронската сцена. Неговата музика ужива култен статус помеѓу љубителите на електронската музика за танц. По настапите на сцените во Белгија, Шпанија, Германија, Италија, Србија, Малта, Англија и Јапонија, само во последните два месеци, оваа сабота ни доаѓа во Скопје со настап во живо на „ПМГ рекордингс фестивалот’. Тој активно работи како автор, продуцент и изведувач од 90-ти години на минатиот век. Во 2000-те Метју има веќе развиен и препознатлив аналоген звук.
Во 2010 го издава својот прв и култен албум Agents of Time по кој следат уште три албуми и бројни синглови, ЕП, ремикси и соработки. Неговата работа е видлива и ценета и во рамките на музичките состави Cobblestone Jazz, Midnight Operator и Modern Deep Left Quartet. Звукот и репутацијата на Метју како уметник континуирано се развива, како што би очекувале за некој толку изразно богат и широко талентиран автор и изведувач. Следствено на тоа, публиката во светот, но и во Македонија, го препознава како уникатен музичар и изведувач, кој на своите концерти и овозможува максимално уживање. За „ПМГ рекордингс“, квалитетот на музиката отсекогаш бил на прво место. Врвниот музички продукт на Метју Џонсон, заедно со големата популарност што ја ужива, е гаранција за настан од светски калибар оваа сабота во Скопје. Несомнено електронски настан на годината во Македонија.
Македонскиот дел од програмата е резервиран главно за млади артисти, што ја потврдува позицијата на „ПМГ рекордингс“ за развој и поддршка на домашната сцена. Пред сè, тука е извонредно талентираниот Young Dadi, кој со својот уникатен бленд на хип-хоп, електроника и поп, моментално е помеѓу најпопуларните млади артисти во земјава. Неговата екипа се состои од младите и перспективни диџеи и продуценти 5R и DIMCHUGA, а во рамките на настапот на нашата млада македонска ѕвезда на вечерта Young Dadi, ќе се приклучи и најмладиот, надежен рапер Vanski. Оваа екипа на талентирани млади музичари ќе ја отвори програмата на втората фестивалска вечер.
Андреја Салпе е несомнено водечки артист на нашата електронска танцова сцена. Неговите последни изданија Metropoli и Relationships го потврдуваат тоа. Еден од најбукираните артисти во последно време, задолжен да ја загрее атмосферата за фантастичниот Метју Џонсон.
Вечерта ќе ја затвори Горан Кан, добро познат артист на македонската електронска сцена. Врвен диск-џокеј, со многу изданија за домашни и странски дискографски куќи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Македонскиот народен театар вечерва ја изведува „Народен пратеник“ во Народно позориште – Белград

129 години по праизведбата на „Народен пратеник“ и 101 година од неговото прво печатено издание, „Народен пратеник“ на Македонски народен театар вечерва игра во Народно позориште – Белград.
Оваа прва комедија на Бранислав Нушиќ, во изведба на моќна актерска екипа и режисерски конципирана од страна на Егон Савин, по впечатливата и одлично забележана изведба на реномираниот фестивал и добиената специјална награда за колективна актерска игра од „Стериино позорје“ – вечерва во 20:30 часот игра на сцената „Раша Плаовиќ“.
Силните впечатоци и импресиите што ги сподели новосадската публика и критиката за двете изведби се патоказ и очекување тоа да се доживее и по оваа изведба.
Култура
Историски ден за МНТ: триумф на ансамблот во „Народен пратеник“

3 јуни 2025 – ден што со особена чест ќе биде запишан во поновата историја на Македонскиот народен театар.
Наградата што секој актер и ансамбл ја посакуваат – Специјалната Стериина награда за колективна актерска игра – му припадна на ансамблот на претставата „Народен пратеник“ од Бранислав Нушиќ, во режија на Егон Савин, а во продукција на Македонскиот народен театар – Скопје.
Ова е награда што ја слави и ја велича не само актерската вештина туку и сплотеноста што се раѓа на сцената – заедништвото во процесот на создавање, како и силата на колективната енергија што живее низ целото траење на претставата.
Александар Микиќ, Дарја Ризова, Тони Михајловски, Јордан Симонов, Тања Кочовска, Александар Михајловски (со снимен глас), народот: Дејан Стамчевски, Синан Ракип, Скендер Бериша, Зекирија Алим, Мирослав Атанасовски, Мартин Китановски и Хусеин Халили, како и целиот тим зад сцената – го заслуживте ова признание!
ПР
Култура
Премиера на балетот „Госпоѓа Бовари“ – одбележување 25 години уметничка дејност на примабалерината Марија Кичевска-Шокаровска

На 25 јуни 2025 година со почеток во 20.00 часот на големата сцена на Националната опера и балет, ќе се одржи премиерата на новата балетска продукција „Госпоѓа Бовари“, инспирирана од безвременскиот роман на Густав Флобер. Ова сценско остварување е посветено на јубилејот од 25 години уметничка дејност на примабалерината, Марија Кичевска Шокаровска која со својата енергија, емоција и посветеност остави длабок белег во историјата на македонскиот балет.
Ова балетско дело, поставено во два чина ја раскажува драмата на женската душа, копнежот по страст, слобода и трагичниот судир со општествените норми.
Диригент е Едуард Амбарцумјан од Ерменија, кореографијата ја потпишува Виктор Ишчук од Украина, кој со прецизност и современ израз го доловува духот на 19 век, додека музичката подлога е составена од дела на К. Сен-Санс, М. Равел, Ж. Масне, Ф. Менделсон и Г. Ф. Хендл, сценографијата и костимографијата се на Андреј Злобин и Гана Ипатиева од Украина, светло дизајн, Милчо Александров, а концерт-мајстор е Јане Бакевски.
Особено значајно е што оваа премиера е посветена на Марија Кичевска Шокаровска, која со својата уметничка кариера остави неизбришлив печат во историјата на македонскиот балет.Таа ќе ја толкува главната улога на Ема Бовари, во останатите улоги ќе настапат, Франциско Хименез Руиз (Шарл Бовари), Балаж Лочеи (Рудолф Буланже), Дмитро Чеботар (Трговецот Лере) и Ендру Кук (Доктор Оме) заедно со солистите, балетскиот ансамбл и оркестарот на Националната опера и балет.
Билетите се пуштени во продажба, онлајн и на билетарницата на МОБ.