Друштвото на филмски работници на Македонија остро се спротивставува на, како што велат, повторните илузорни тенденции да му биде одземен Интернационалниот фестивал на филмска камера „Браќа Манаки.

„ДФРМ е основач и веќе 44 години организатор на нашиот најпрестижен филмски фестивал, а собранието на друштвото го избира директорот на Манаки“, се вели во реакцијата на ДФРМ по повод вчерашниот пост на советникот и координатор на советничката група на ВМРО ДПМНЕ, Бојан Бојкоски, кој на својот Фејсбук профил објави дека фестивалот „Браќа Манаки“ треба да биде национална институција со седиште во Битола.

Од ДФРМ наведуваат дека фестивалот „Браќа Манаки“ им припаѓа на сите филмски дејци и вљубеници во седмата уметност, без разлика од кој дел на светот тие доаѓаат.

„Фестивалот несомнено ѝ припаѓа и на Битола, градот на Манаки. Но од институционален аспект, тој му припаѓа единствено на Друштвото на филмските работници, како што е впишано и во Централниот регистар и за што друштвото ексклузивно ја поседува трговската марка „ИФФК Браќа Манаки“. Престижните светски филмски фестивали не се установи под капа на државата од која во голем дел се финансираат, туку се независни“.

„Фестивалот Браќа Манаки се финансира од Агенцијата за филм и од општината Битола, од комерцијални спонзори и други донации, со несебична помош од Кинотеката на Македонија, Факултетот за драмски уметности и многу други општествени чинители и поединци од сферата на филмот, а покровител е Претседателот на државата“

„Го разбираме локал патриотизмот кај одредени политички чинители, но „Браќа Манаки“ е фестивал на ДФРМ и така и ќе остане“, стои во соопштението на Друштвото на филмски работници.

Актерката Билјана Драгичевиќ Пројковска е годинашен лауреат на Меѓународниот театарски фестивал „Свети Јоаким Осоговоски“ – награда за особен придонес во македонскиот театар и култура – што по 15. пат ќе се одржи од 28 септември до 7 октомври во Крива Паланка.

На јубилејниот фестивал, кој што традиционално е ревијален и нема натпреварувачки карактер, ќе настапат девет театри од Србија, Хрватска, Босна и Херцеговина и нашата земја.

Фестивалот ќе биде отворен со пригодна свеченост при што на актерка Билјана Драгичевиќ Пројковска градоначалникот на Крива Паланка Сашко Митовски ќе и ја врачи наградата по што ќе следува, на првата фестивалска вечер, претставата „За нас почнува живот“, работена по текст на Ѓерѓ Шпиро, а во режија на Дејан Пројковски со лауреатката Билјана Драгичевиќ Пројковска и Нино Леви.

Непосредно пред почетокот на свеченоста ќе биде отворена изложба на театарските плакати на Фестивалот од авторот Стојанче Величковски.

Втората фестивалска вечер ќе биде изведена преставата на Народниот театар „Стерија“ од Вршац, Србија, „Откачено запросување“ од Зоран Божовиќ во режија на Петар Пјер Рајковиќ со актерите Милош Ѓуровиќ, Јована Андреевиќ-Грујиќ, Соња Радосавњивиќ и Срѓан Радосављевиќ.

На први октомври ќе настапи Уметничката работилница „Призор“ од Белград, Србија со мјузиклот „Весели девојки“ во режија на Раде Вукотиќ со Маја Брукнер, Светлана Сретеновиќ, Зорана Павиќ, Тијана Дапчевиќ и Ивана Петерс.

На втори октомври Драган Тешиќ од Драфт театарот ќе ја изведе монодрамата „Со кого и со што во ЕУ“, а на трети октомври ќе се претстави градскиот театар „Јоза Ивакиќ“ – Винковци, Хрватска со „Три и пол сестри“ од Петра Цицвариќ во режија на Пеѓа Гвоздиќ со Матеа Марушиќ, Мартина Стјепановиќ, Ловорка Трдин и Петра Цицвариќ.

Претставата „Ноќ во куќата на господин Колак“, по текст на Владимир Ѓурѓевиќ во режија Ирфан Менсур, на Југоарт продукција, од Белград, Србија со Слободан Бодо Нинковиќ, Ирфан Менсур и Владимир Керкез ќе биде прикажана на четврти октомври.

На петти октомври Народниот театар од Лесковац, Србија ќе настапи со „Чекајќи го докторот“ во режија на Синиша Ефтимов со Петар Смиљковиќ, Тања Крчмарик, Филип Радивојевиќ, Сузана Грујиќ, Иван Јанковиќ, Петра Димитријевиќ и Наташа Пејиќ.

Народниот театар од Штип ќе ја изведе преставата „Власт“ од Бранислав Нушиќ во режија на Ѓорѓи Ризевски на шести октомври со актерите Ефтим Трајчов Ѓаурски, Милорад Ангелов, Никола Милошевски, Елена Шорова Дербов, Марко Трајковиќ, Ава Хусеини, Миланчо Ѓеоргиев и Стефанија Митовска.

Фестивалот ќе заврши со настап на Театар Комедија од Скопје на седми октомври со претставата „Анатомија на неверството“ од Валентин Красногоров во режија на Александра Кардалевска со актерите Жаклина Петровска и Тони Денковски.

По повод петнаесетгодишниот јубилеј на актерот и режисер Владо Денчов ќе му биде врачена специјална повелба „Свети Јоаким Осоговски“ за придонес во аудиовизуелните уметности и медиуми.

Разрешувањето на директорката на Националната филхармонија, и на целиот Управен одбор неодамна, наиде на реакции, на кои свој одговор даде министерката за култура Бисера Костадиновска-Стојчевска, на денешната прес-конференција во Владата.

Министерката рече дека Филхармонија е една од националните установи во која се слева највисок буџет од граѓаните на државата, преку Министерството за култура. Институција која има огромана поддршка и на која ѝ се подмирени сите трошоци, програмски и матерјални, и која има своја посебна сметка која ја полни по разни основи.

„Одбивам да бидам квалификувана како министерка која врши политички прогон или каков било притисок, или дека сум настапила против раководно лице кое застанало на страната на колективот, како што беше речено во реакциите. Мило ми е што поранашната директорка е заедно со вработените, но на ниту една национална институција која се финансира од државниот буџет нема да дозволам да располага со имотот и со средствата без почитување на правилниците и на соодветни одлуки“, рече министерката Костадиновска-Стојчевска која потоа наброја неколку примери од Извештајот на работната група од Министерството за култура во кој се наведени пропусти во работењето на поранешната директорка и Управниот одбор.

Комисијата од Министерството за култура изврши увид во Филахрмонија на документацијта поврзана со издавање на салата на ден 7.5.2023 година, за настан на Конвенција на жени и на документацијата поврзана со издавање на просторот под закуп на Бистро Бока.

Министерката за култура посочи дека за првиот случај, увидено дека не се исполнети обврските од член 3, 7, 8 и 9 од Договорот, според кои се предвидени обврски за договорните страни за доставување на списоци и записници, кои треба да бидат дел од договорната документација, a кои не беа презентирани на Комисијата.

„И во Извештајот на Државниот инспекторат за труд е констатирано дека не е почитуван Правилникот за ангажирање вработени лица при изнајмување на просторот. Па така ангажираните не кореспондираат со утврдениот потребен персонал предвиден во член 5 став 3 од Договорот. Со вака предвидената одредба од Договорот, за ангажирање на персонал од страна на организаторот да ракува и управува со опремата на установата која е во државна сопственост, се овозможува евентуално нестручно и несовесно ракување и можност за оштетување на опремата“, објасни министерката Костадиновска-Стојчевска. Таа додаде дека за овој настан, не е поднесено барање за изнајмување, а и не е наплатена затезна камата за задоцнета наплата на фактурата, со што директно се наштетува на Буџетот на државата, а со неангажирање професионални лица за управување со скапата опрема, се покажува несовесно однесување кон имот на институцијата.

Во однос на издавањето на просторот на бифето на Бистро Бока, не е испочитувана одлуката со која е определена квадратурата која смее да се изнајмува, како и тоа што со разни одлуки околу плаќањето на закупот, закупецот е доведен во правна заблуда околу плаќање на кириите. „Околу предвреме раскинатиот договор со Бистро Бока, е констатирано дека Управниот одбор нема донесено одлука за раскинување на договорот, што повторно е на директна штета на Буџетот“, рече министерката за култура.

Минситерката Костадиновска-Стојчевска на прес-конференцијата, осврнувајќи се на реакцијата на социјалните медиуми на поранешната директорка на Филхармонија дека имало повеќе пати инспекции во установата рече дека е тоа точно.

„Точно е дека повеќе пати имавме инспекции. Тие уследија по пријави до Мининистерството за култура за извесни неправилности во работењето. Имавме укажувања дека имало институции кои го уништиле угледот на установата. Но, ние никако не наоѓаме записници за евентуални договори со такви институции. Не можеме да најдеме записник ниту за настанот на 7 мај, и затоа јас како минситерка поднесов барање за информација од јавен карактер до Филхармонија, да ги добијам записниците. Кога ќе ја добијам информацијата, ќе излеземе сите јавно и се надевам сите, вклучувајќи ме и мене ќе пресудиме кој на кого треба да се извини. Тогаш ќе одговориме кој е вистинскиот мотив за нивните рекции и за сè што беше изнесувано во минатото, дека јас сум правела каков било политички притисок врз поранешната директорка“, изјави министерката за култура.

На крајот министерката Костадиновска – Стојчевска посочи дека според сите увиди и извештаи, од Министерството за култура и од Државниот инспекторат за труд, директорката на Филхармонија е разрешена заради несовесно менаџирање со националната установа, ненавремено и несовесно извршување на работните задачи во насока на заштита на јавниот интерес и јавните средства.