концерти
Импресивен настап на словенечките уметници на „Охридско лето“
Големиот словенечки кларинетист со меѓународно реноме, Дарко Брлек, синоќа настапи на „Охридско лето“ одржувајќи концерт заедно со гудачкиот квартет „Дисонанс“ од Словенија.
На концертниот подиум во црквата „Света Софија“, освен солистот Брлек, настапија првата виолина Јанез Подлесек, Матјаж Поровне-втора виолина, Оливер Диздаревиќ на виола и виолончелистот Клемен Хвала.
На репертоарот беа дела од Мариј Когој, Дмитриј Шостакович и Волфганг Амадеус Моцарт. Познатиот Брлек изведе композиција на Моцарт.
-Синоќа настапив со гудачкиот квартет „Дисонанс“ изведувајќи го моцартовиот Квартет за кларинет и гудачки квартет. Сметам дека вториот став е еден од најдобрите во музичката историја, вели кларинетистот Брлек.
Инаку тој не учествува првпат на „Охридско лето“, но како што вели, многу добро се сеќава на неговиот прв настап во црквата „Света Софија“.
-Мислам дека по 10-ти пат сум на фестивалот „Охридско лето“. Првпат настапив во 1986 година со Камерниот оркестар „Урош Лајовиќ“. Оттогаш поминаа 33 години, но јас многу добро се сеќавам на првиот настап. Го свиревме Моцарт и други композиции. Дојдовме со чартер лет попладнето и се вративме назад веднаш по концертот, се присетува Брлек.
Годинава, словенечкиот уметник на „Охридско лето“ доаѓа заедно со музичкиот состав за гудачки инструменти „Дисонанс“ за кој вели дека е исклучително добар квартет и составен од врвни музичари.
-Со нив свирев во Трст и во Словенија. Тоа се концерт –мајстори во Словенечката филхармонија,а тука е и директорот на Филхармонијата, Клемен Хвала. Во Словенија има уште еден одличен гудачки квартет, „Тарантини“. Тоа е добра традиција на камерното музицирање. Тие се всушност јадрото на камерниот оркестар на Словенечката филхармонија со кој сум свирел јас, но и многу други големи ѕвезди како што се виолинистките Ванеса Меј и Сара Чанг, појаснува Дарко Брлек.
Иако по професија е кларинетист, тој е и директор на интернационалниот Љубљанскиот фестивал, но успева да ги синхронизира музицирањето и културното менаџирање.Во насока на проширување на соработката со институциите од областа на културата и надвор до границите на матичната земја, Дарко Брлек во октомври минатата година оствари и работна средба со директорката на НУ „Охридско лето“, Наташа Поповиќ.
-„Охридско лето“ е многу важен фестивал, не само за Охрид, туку и за целиот регион и Европа, и треба да ја има поддршката од сите страни. Сигурно ќе имаме заеднички копродукции, но би било убаво, овде повторно да дојде Камерниот оркестар на Словенечката филхармонија, а можеби и сите членови на Филхармонијата доколку се обезбедат средства за тоа, зашто сепак се работи за состав од сто члена, додава Брлек.
За Дарко Брлек културниот менаџмент е повеќе од професија, но тој истовремено активно се занимава и со неговата прва љубов-кларинетот настапувајќи во Словенија и на меѓународните концертни подиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
концерти
„Медитеранска магија“: Концерт за две пијана и четирирачно пијано на дуото Аврамовска–Мариновски
Во Салон 19 19, на 26 ноември 2025 година со почеток во 19:19 часот, ќе се одржи концертот „Медитеранска магија“ — музичка вечер посветена на јужниот медитерански дух, во изведба на дуото Аврамовска–Мариновски. Наратор на концертот ќе биде Мимоза Рајл.
Публиката ќе има можност да доживее ретко музичко патување исполнето со сончеви ритми, страст и виртуозност. На програмата се дела од италијански, француски и шпански автори, како и премиерни изведби и специјално подготвени аранжмани.
Програма:
Жорж Бизе – Свита „Арлезијанка“ бр. 2
Жорж Бизе – Свита „Арлезијанка“ бр. 1
Ернесто де Куртис – Non ti scordar di me (солист: Илија Белистојановски)
Rodolfo Falvo – Dicitebcelli (солист: Илија Белистојановски)
Г. Росини – Увертира „Крадливата страчка“
Исаак Албениз – Rapsodia Española
Дуото, активно веќе девет години, има бројни настапи во Македонија и во странство — меѓу кои Турција, Бугарија и САД. Нивната работа е посветена на спојот меѓу македонската традиција и современиот музички израз, со концертни програми што ја освојуваат публиката со емоција и уметничка длабочина.
„Медитеранска магија“ ветува вечер исполнета со топлина, енергија и дух на јужниот Медитеран — музика која ги надминува границите и допира директно до публиката.
концерти
Почна фестивалот „Виноскоп 2023“
Со настапи на Стефан Петановски, Пајак, „Офчестра“, „Брас брадрс“ и „Фолтин“ вчера беше отворен фестивалот „Виноксоп“, кој веќе тринаесет години по ред ја промовира македонската винска култура.
![]()
Со учество на над 40 винарници и гурмански катчиња фестивалот продолжува до сабота, а денеска концертни настапи ќе имаат „Баклава“, Нино Величковски, Сале Певац, Дани Димитровска и „Куку леле’.
![]()
Програмата почнува во 17 ч со „афтер ворк“ забава, а до 19 ч на секои две купени вина, посетителите ќе добијат едно гратис.
концерти
Петтото издание на музичкиот фестивал „Андерфест“ Скопје
Музичкиот фестивал „Андерфест“ ќе се одржи петти пат на 13 октомври во Младинскиот културен центар (МКЦ).
На овој јубилеј публиката ќе може да ужива во музиката од алтернативната, рок, панк-рок, метал, хардкор-сцената од нашата држава, која ќе покаже дека е одлична и има што да понуди.
Од најавените бендови, сите ѝ се одлично познати на македонската публика. Се работи за актуелни музички имиња за кои организаторите очекуваат многу публика и ветуваат забава.
На „Андерфест 5“ ќе настапат: Преку ред, Ред 18, Конспираси, Луфтанза, Пич Ваис и Последен удар.
Продажбата на билети за концертот e почната и можете да ги набавите преку следниот линк.

