Култура
Концерт на Марина Николовска, Маја Чанаќевиќ и Владимир Лазаревски во КИЦ на Македонија во Софија
На 17 ноември 2023, со почеток од 18.30 часот, во галеријата на КИЦ на Република Северна Македонија во Софија, ќе се одржи концертот на дувачкото трио, составено од македонските музичари Владимир Лазаревски (обоа), Марина Николовска (обоа) и Маја Чанаќевиќ (англиски рог).
Дувачкото трио, составено од две обои и англиски рог, е камерен состав чии членови потекнуваат од оркестарот на Македонската филхармонија во Скопје. Интересен е составот на ова трио бидејќи се работи за инструменти од ист род, кои во континуитет настапуваат како хомогена група во рамките на симфониската музика. Членовите на ова трио соработуваат со години и досега реализирале многубројни концерти токму во ваков состав.
Владимир, Марина и Маја се инструменталисти што го негуваат камерното музицирање и настапуваат и како солисти во разни други ансамбли.
Програмата на концертот е поделена во два дела, музички но и стилски. Во првиот дел од концертот се потенцира на негувањето на класичниот звук на камерното музицирање, а во вториот дел, преку разните танци, публиката ќе има можност да прошета во разни делови од светот.
Марина Николовска е родена во 1984 година во Кавадарци, каде што го завршува нижото музичко образование на отсекот флејта, во класата на професор Силвана Чулева-Атанасова. Средното музичко училиште го завршува во МБУЦ „Илија Николовски-Луј“ – Скопје, на отсекот обоа, во класата на професор Гордана Јосифова-Неделковска. Во 2007 година дипломира на Факултетот за музичка уметност во класата на истиот професор со највисока оцена Cum Laude. Магистрира кај истиот професор во 2011 година.
Од 2005 година Марина Николовска е член на симфонискиот оркестар на Македонската филхармонија, со кој има остварно огромен број концерти со врвни уметнички имиња. Воедно, таа е член и на No Borders Orchestra, составен од реномирани музичари од поранешните југословенски простори. Настапувала и со Балканскиот камерен оркестар. Од 2013 година е член на балканскиот секстет ProArte, составен од музичари од Македонија, Албанија и од Косово, со кој оствариле концерти во Македонија и странство.
Марина Николовска учествувала на повеќе натпревари и е добитник на повеќе награди.
Настапувала како солист со Македонската филхармонија во 2002, 2005, 2006, 2007 и во 2010 година. Во 2011 година настапила како солист со оркестарот на Факултетот за музичка уметност.
Маја Чанаќевиќ оформува музичкото образование во Скопје, каде што дипломира во класата на проф. Гордана Јосифова-Неделковска. Веднаш по дипломирањето ги завршила и постдипломските студии по културен менаџмент, а магистрирала и во обласата на музичката уметност во класата на проф. д-р Владимир Лазаревски.
Добитник е на многубројни награди на државните музички натпревари, како и и наградата за најдобар студент на Факултетот за музичка уметност.
Настапувала како солист или како член на камерни оркестри на сите фестивали во Р. Македонија, но и надвор од неа, во Холандија, Босна и Херцеговина, Грција, Турција, Украина, Унгарија, Бугарија, Србија, САД итн… има остварно и повеќе аудио и видеоснимки. Постојан член е на камерното студио „Бахус“, камерниот ансамбл „Консонанс“, обоист во оркестарот Macedonian Music Entertainment.
Во областа на културниот менџмент има огромно искуство и во организирање разни концерти, семинари, раководење ансамбли и оркестри. Во периодот од 2007 до 2017 година беше директор на Македонската филхармонија.
За нејзината успешна работа како лидер, но и како уметник, одликувана е и со највисоки меѓународни и национални признанија: Медал за посебни заслуги во областа на културата и уметноста, доделен од државата Полска (медал што ретко се доделува на странци), Медал за посебни заслуги за придонес кон македонската култура, доделен од Бигорскиот манастир, и медал „Витез од редот на уметноста и книжевноста“, доделен од француското Министерство за култура.
Маја повеќе од 20 години музицира на позицијата англиски рог и обоа во Македонска филхармонија и активно ги промовира камерната музика и музиката пишувана за англискиот рог, кој сѐ уште се смета за редок инструмент.
Владимир Лазаревски студира инструмент обоа на Националната музичка академија „Панчо Владигеров“ во Софија, кај проф. Георги Желјазов, каде што дипломира и магистрира во 2003 година. Една година подоцна Владимир добива целосна стипендија од музичката академија „Лонџи“ во Бостон, САД, каде што заминува да се усовршува како обоист и камерен музичар. Таму учи во класата кај проф. Вејн Рејпиер и проф. Марк Мекеван, врвни обоисти на оркестарот на Бостонската филхармонија, каде што ги заокружува своите постдипломоски студии во 2006 година. Во периодот 2007- 2009 година успешно ги заврши студиите по програма на Универзитетот „Курт Бош“ од Сион, Швајцарија, и го добива звањетото МБА – магистер по бизнис-администрација, а во февруари 2013 година успешно ја брани својата докторска дисертација на Националната музичка академија „Панчо Владигеров“ во Софија и доби титула доктор на музички науки и музичка уметност од областа камерна музика и обоа.
Како член на квартетот „Мјузик прогресив“, Лазаревски е добитник на наградата „Виртуози“ за најдобар камерен ансамбл во 2012 година. Исто така, тој е лауреат на меѓународниот музички натпревар „Алегро виво“ во Австрија 2002 година и добитник на третата награда на натпреварот „Земјата и луѓето“, Бугарија 2001. Освојува и први награди на државните натпревари во Македонија во 1996 и 1997 година. Својот музички профил го усовршува на многубројни семинари и мајсторски класи кај еминенти обоисти, како Инго Горицки, Давид Валтер, Паул Гуди, Хелмут Мецера и др.
Владимир Лазаревски има многубројни настапи на фестивали во земјата и странство, како: „Моцартеум“ и „Алегро виво“ во Австрија, Бостонски музички вечери во САД, фестивалот „Дартингтон“ во Англија, Гдањско музичко лето во Полска, Блуз и Џез-рели фестивалот во Луксембург, Скопско лето, ДММ, „Бит-фест“, „Балкан класикал мјузик фестивал“, Штипско културно лето, фестивалот МОДОАРС и др. Секако, на ова се приклучуваат и настапите како солист со оркестар: Македонската филхармонија (1998, 2012, 2015), со ансамблот „Арс барока“ во Софија, Битола и Крива Паланка, (2003, 2013), со Академскиот симфониски оркестар во Бугарија (2012) и со оркестарот на West Coast symphony од Канада во Македонија и Канада (2012, 2013, 2016).
Како обоист и солист на англиски рог свири во составот на голем број ансамбли, и тоа: Македонската филхармонија, Македонската опера и Балет, Сараевската филхармонија, симфониските оркестри во Пазарџик и Враца, Р. Бугарија, Нов симфоничен и Академскиот симфоничен оркестар во Софија, Камерниот оркестар на Лонџи, САД, Колегиум-музикум Банкја од Бугарија, West Coast symphony од Канада, оркестарот Warmińsko-Mazurskiej од Полска и др.
Актуелно, Владимир Лазаревски е вработен како прв обоист во НУ Македонска филхармонија и е ангажиран како вонреден професор на музичката академија при Државниот универзитет „Гоце Делчев“ во Штип од формирањето, па до денес. Исто така, Владимир е член на камерниот ансамбал „Мјузик прогресив“, ансамбалот за современа музика КОНТЕМПОРА и симфонискиот оркестар за филмска музика FAMES.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Обајвен конкурсот за поетската награда „Млада Струга“ за 2024 година
НУМ „Струшки вечери на поезијата“ во соработка со Јуроп Хаус и со поддршка на Делегацијата на Европската Унија во Северна Македонија, го распишаа конкурсот за поетската награда „Млада Струга“ 2024 за најдобра необјавена поетска збирка од млад автор-дебитант.
Конкурсот е објавен денес, на 9 мај, Денот на Европа и ќе трае заклучно со 3 јуни 2024 година, до кога сите пријави и необјавени поетски збирки треба да пристигнат на поштенската адреса на Струшките вечери на поезијата.
Авторот не смее да биде помлад од 18 години, односно постар од 30 години заклучно со денот на крајниот рок на конкурсот и мора да биде државјанин на Република Северна Македонија. На конкурсот пријава може да поднесе исклучиво авторот.
Пријавените необјавени поетски збирки ќе ги разгледува жири-комисија од три члена, којашто најдоцна до 1 јули 2024 година до Управниот одбор на СВП треба да достави единствен предлог за добитник на наградата. Добитникот на наградата ќе биде објавен на 3 јули 2024 година.
Наградата вклучува плакета, паричен износ и објавување на печатена публикација во склоп на изданијата на СВП.
Добитникот на наградата ќе биде поканет да учествува на изданието на „Струшките вечери на поезијата“ во Струга кон крајот на август 2024 година, каде и ќе му биде врачена наградата на манифестацијата „Мостови“.
Поетската награда „Млада Струга“ е возобновена награда која што во минатото се избираше на Конкурс што го распишуваше Книжевната младина на Македонија.
Култура
Шопен под отворено небо со Дино Имери
Во сабота со почеток во 12 часот ќе се одржи музички настан организиран од Амбасадата на Република Полска, по повод Денот на Уставот.
Имено, во Градскиот парк, на „Школка“, македонскиот пијанист Дино Имери ќе одржи рецитал на кој ќе изведе дела од големиот романтичар, полскиот композитор Фредерик Шопен.
„Волшебникот на пијаното“, Дино Имери, ќе ги изведе најпознатите пиеси за пијано од еден од најголемите композитори на сите времиња: Балада бр.1 оп.23, во g-moll, Grand Valse Brillante оп.34 бр.1, во As-dur, Валцер оп.64 бр.2, во cis-moll, Валцер оп.64 бр.1, во Des-dur -„Минутен“, Ноктурно оп.20, во cis-moll, Скерцо бр.2 оп.31, во b-moll, Мазурка оп.17 бр.4, во a-moll и Полонеза оп.53, во As-dur – „Херојска“.
Станува збор за навистина редок настан, затоа што класичната музика не се изведува често на отворено.
Но, идејата е и Скопје да се придружи на традицијата на реализирање на концерти на отворено какви што се случуваат во Полска, близу Варшава, токму кај споменикот на Шопен и неговото родно место, од страна на врвни, светски пијанисти.
Целта е постојано да живее творештвото на овој музички гениј кој светот го направи подобро место за живеење.
Настанот е бесплатен.
Култура
ЈОУ Библиотека „Гоце Делчев“ – Гевгелија распишува награден конкурс за книжевни творби инспирирани од творештвото на Франц Кафка
По повод 100 години од физичкото заминување на Франц Кафка (1883-1924), еден од највлијателните европски и светски писатели на 20-от век, ЈОУ Библиотека „Гоце Делчев“ – Гевгелија распишува награден конкурс за книжевни творби.
Делата, напишани на македонски јазик, може да бидат во вид на расказ или есеј, а секој автор може да учествува со една творба на слободна тема, инспирирана од книжевните дела и/или животот на Кафка.
Максимална должина на секоја од испратените творби е 5 000 зборови.
Творбите да се потпишат со шифра, а на посебен лист да се пополни пријава за учество на конкурсот со следниве податоци: шифра, име и презиме, наслов на испратено дело, телефонски број, e-mail адреса и адреса на живеење.
Пријавите за литературниот конкурс да се испратат на е-адресата на ЈОУ Библиотека „Гоце Делчев“ – Гевгелија: [email protected], најдоцна до 25-ти мај 2024 година.
По завршувањето на конкурсот, ќе бидат доделени парични награди за трите најдобри творби.
Конкурсот е без возрасни ограничувања за авторите или авторките.
Секоја непотпишана и нецелосна пријава на конкурсот нема да биде разгледана од страна на жири-комисијата, се наведува во соопштението.