Филхармонијата, в четврток (20 часот), ќе одржи симфониски концерт, на кој ќе прозвучи Симфонијата број 3 од Феликс Менделсон и Концертот за виолончело и оркестар од Роберт Шуман. Диригент е маестро Јерухам Шаровски, а солистика Даниеле Акта, и двајцата од Израел.

Концертот за виолончело во А-мол, оп. 129 од Роберт Шуман бил напишан за неверојатни две недели, меѓу 10 и 24 октомври 1850 година, набргу откако композиторот станал музички директор во Диселдорф. Концертот никогаш не бил отсвирен за време на неговиот живот. Премиерно бил изведен на 23 април 1860 година, четири години по неговата смрт, во Олденбург, со Лудвиг Еберт како солист. Со години овој концерт бил заборавено ремек-дело. Делото е прилично комплексно и бара голема техничка подготвеност од солистот, иако во него доминира поетската експресија наспроти виртуозноста.

Mузиката на германскиот композитор Феликс Менделсон (1809 – 1847) ретко провоцира, таа главно ги следи и надградува принципите создадени во претходните музички епохи, го интегрира и реоткрива на индивидуален начин музичкото наследство создадено од претходниците. Неговиот музички стил е оригинален, но не и радикален. Опусот му е совршен микс на класичната пропорционалност со романична жестокост. Таква е неговата трета симфонија „Шкотска“, која ја напишал инспириран од патувањето во оваа земја во 1829 година.

Роден во Буенос Аирес, Аргентина, маестро Јерухам Шаровски рано почнал да изучува музика, а потоа студирал флејта, контрабас, композиција и диригирање на Националниот конзерваториум за музика во својот град. Во раните седумдесетти години на минатиот век имигрирал во Израел, каде што дипломирал на Академијата за музика „Рубин“ во Ерусалим под палката на проф. Менди Родан. Во 1990 година Шаровски бил избран од славниот маестро Зубин Мехта да ја прими наградата „Млад артист на годината“, кога ја добил и привилегијата да диригира со Израелската филхармонија, како и со другите поголеми оркестри во Израел.

По турнејата во поранешиот СССР, која за него ќе биде значајна во кариерата, во 1991 година станал уметнички директор и шеф-диригент на Симфонискиот оркестар „Раанана“ во Израел. Под палката на Шаровски овој оркестар станал еден од најпопуларните симфонски ансамбли изведувајќи стотици дела и надвор од земјата. Од 1998 до 2004 година маестро Шаровски раководел и со Бразилскиот симфониски оркестар на Рио де Женеиро, со кој патувал на турнеи во Бразил и во Европа и снимил четири цедиња. Тогаш Шаровски го формирал Младиот симфоники оркестар на Бразил, кој ќе стане еден од најпознатите ансамбли во земјата. Со Бразилскиот симфониски оркестар заминал на турнеја и во САД кога во Централ парк во Њујорк и во центарот „Линколн“ одржал концерти пред 50-илјадна публика, кои биле високо оценети од публиката и од критиката.

За време на својата кариера, маестро Шаровски диригирал со над 50 оркестри во повеќе од 20 земји, вклучувајќи ги и серијата концерти со маестро Лорин Мазел, диригирајќи со Минхенската филхармонија во Германија и со Симфонискиот оркестар на Ерусалим заедно со Баварскиот радиооркестар на концерти посветени на градот Ерусалим. Маестро Мазел го предложил маестро Шаровски да биде и дел од жирито на Мазел интернационалниот натпревар за диригенти (2002). Широк е неговиот репертоар и во однос на оперските изведби, а во последните години тој гради навистина успешна кариера на полето на едукацијата одржувајќи мастер-часови на значајни универзитети во светот.

Израелската виолончелистка Даниеле Акта, иако млада (2002), досега настапувала со Камерниот оркестар „Московски виртуози и Владимир Спиваков“, Израелската филхармонија, Националната филхармонија на Русија, Филхармонијата на Кејптаун, со Вадим Репин и Филхармонијата на Новосибирск и многу други светски оркестри.

Даниеле Акта како солистка настапувала и на најпрестижните светски сцени  „Карнеги хол“, концертната сала „Чајковски“, „Барбикан“, центарот „Линколн“ и др. Оваа исклучителна виолончелистка беше рангирана меѓу десетте најдобри изведувачи во 2016 година од „Дајли газета“. Како добитиничка на стипендијата на Американско-израелската фондација за култура таа настапи на гала-настанот по повод 75-годишнината на Фондацијата, на која домаќин беше Исак Перлман во центарот „Линколн“ во Њујорк. Акта е лауреатка на натпреварот „Флејм“ (Париз, 2014), на интернационалниот натпревар во Атина (2014, 2015) и на Израелскиот натпревар за виолончелисти (2013). Таа е студентка на проф. Франс Хелмерсон на Музичката академија во Берлин од 1915 година.

Родена во семејство на музичари, почнала да свири чело на четири години кога слушнала снимка од Жаклин де Пре. Почнала да учи чело по нејзино барање на Музичкиот конзерваториум „Раана“ со Галина Ароновил и Луба Рабин. Посетувала мастер-часови кај Лоренс Лесе, Трлејф Тден, Памела Франк, Марија Чајковскаја, Гери Хофман… Даниеле свири на челото „енрико орсели“, направено во Песаро меѓу 1925 и 1930 година и има гудало направено од Клод Томасин меѓу 1900-1920 година.