Култура
Костадиновска-Стојчевска: Македонската култура нема да исчезне, ЕУ ги чува и ги штити културите на земјите членки

Министерката за култура Бисера Костадиновска-Стојчевска денеска учествуваше на јавната трибина „ЕУ за македонското културно богатство“, на која рече дека културата е таа што ги поврзува 27-те држави членки на ЕУ, кои сите меѓу себе се различни, и дека ниедна држава не го загубила идентитетот со тоа што станала членка на ЕУ.
– Ниедна држава не го загубила идентитетот со тоа што станала членка на ЕУ. Нема ни ние. Нема ништо да загубиме, остануваме Македонци, кои говорат македонски јазик, кои имаат свои културни обележја, бидејќи за културата не се преговара во пристапните преговори. Европската култура се дефинира како збир на национални култури и таа не се усогласува со законодавство на ЕУ – рече министерката Костадиновска-Стојчевска.
Таа додаде дека сите дезинформации што се пласираат од почетокот на преговорите на Северна Македонија со ЕУ, дека ќе ги загубиме идентитетот, македонскиот јазик, нашите културни обележја, доаѓаат од структури на кои не им е до реформи и не сакаат позитивна трансформација на македонското општество.
– ЕУ го негува мотото „Обединети во различностите“, и тоа не е случајно. Тоа значи дека ЕУ ги чува и ги негува културите на народите на своите држави членки, јазикот и културното наследство, и затоа граѓаните треба да знаат дека нема опасност од губење на македонскиот идентитет или да се намали важноста на македонскиот јазик, идентитет, култура кога ќе станеме членка на ЕУ – укажа Костадиновска-Стојчевска.
Таа пред битолчани спомна и конкретни примери како Европската Унија го заштитува македонското културно богатство преку ИПА-програмата, потенцирајќи дека филмскиот фестивал „Браќа Манаки“ е првиот македонски филмски фестивал кој бил поддржан од програмата на ЕУ за култура, „Креативна Европа“.
– Нашиот филмски фестивал „Браќа Манаки“ е првиот македонски филмски фестивал кој добил средства од програмата „МЕДИА“ на „Креативна Европа“, единствената програма на Унијата конкретно наменета за културните, креативните и аудиовизуелните сектори во Европа. Оваа програма за периодот од 2021 до 2027 година обезбеди 2,44 милијарди евра за поддршка на европската култура, достапни и за македонската. Министерството за култура е дел од различни европски проекти, а, конкретно, во програмата „Креативна Европа“ учествуваме со вкупен износ од 1,14 милиони евра – укажа министерката.
Министерката за култура во својот говор нагласи дека со ЕУ споделуваме исти вредности во однос на културата и уметноста и затоа работиме заедно во градењето инклузивно општество каде што сечие уникатно културно наследство се почитува и негува, а македонската култура, како што рече таа, е „европска и е додадена вредност на богатството и културната разновидност на заедничкото европско наследство“.
– Многу е важно сами да продолжиме да го негуваме и да се грижиме за нашиот културен идентитет, а ЕУ ќе го поддржи тоа. Сега стоиме одговорно исправени пред задачата која не се однесува само на нашата иднина туку и на заштитата на нашето културно наследство, нашиот идентитет и кои сме како нација. А најдобра заштита е културниот мозаик на ЕУ, каде што се слави различноста и се создава единство преку заедничките вредности – порача Костадиновска-Стојчевска.
Трибината „ЕУ за македонското културно наследство“ во Битола е во рамките на кампањата „Ние сме Европа“, во организација на Секретаријатот за европски прашања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Изложба на Ферди Булут во КИЦ-Битола

Во кристалната сала на Офицерскиот дом во Битола во тек е изложбата на академскиот сликар Ферди Булут, насловена “Широк сокак во боја”.
Станува збор за циклус на визуелни решенија, презентирани преку женското битие, односно преку визуелен птриказ на жената со користење на постапката осветлување, наспроти колористичната симбиоза на композициите.
Проектот се реализира со поддршка на Министерството за култура во рамките на проектот “Култура во лето”.
Ферди Булут е македонски сликар од помладата генерација. Дипломира на Факултетот за ликовна уметност во Скопје.
Учествувал на изложби во Македонија, Австрија, Франција, Бугарија, Италија и Турција.
Култура
СДСМ: Со нас македонската култура постигнува значајни успеси

„Со посветеноста и заложбите на СДСМ, македонската култура постигнува значајни успеси и резултати.
Изборот на Скопје за престолнина на културата во Европа за 2028 година е успех за македонската култура и признание за влогот на институциите предводени од СДСМ, Министерството за култура, Владата но и поранешната локална власт на Градот која имаше визија и ја подготви апликацијата.
Додека ДПМНЕ го уназадува Скопје, СДСМ обезбедува можности за развој.
Освојувањето на титулата Европска престолнина на културата овозможува значителни културни, економски, социјални придобивки за Скопје, и одлична можност Скопје и целата македонска култура во 2028 година да се претстават во најдобро светло на европската и светската сцена.
Овој нов успех на македонската култура доаѓа само неколку дена по одлуката на Комитетот на УНЕСКО Охридскиот регион да остане на листата на светско културно и природно наследство, со исклучителна универзална вредност. Важноста на Охридскиот Регион е немерлива и трајна. Затоа, наша должност е да го заштитиме.
СДСМ, преку институциите коишто ги предводи покажа одговорност во заложбите за негување и промоција на културното богатство и преземените чекори и мерки се препознаени и валоризирани“.
Соопштение на СДСМ
Култура
Тринаесетто издание на фестивалот на нова музика „Здраво млади“ вечерва во МКЦ

Вечерва со почеток од 20 часот, започнува еднодневната фестивалска програма на музичкиот фестивал ЗДРАВО МЛАДИ во организација на ЈУ Младински културен центар веќе тринаесетта година по ред.
На 5 бини во Младинскиот културен центар ќе настапат повеќе од 20 артисти од 11 земји од Европа. Како и секоја година, програмата на фестивалот цели кон жанровска разновидност, нови и надежни артисти како и веќе етаблирани музичари во својата музичка кариера. Надоаѓачките артисти се срцевината на фестивалот, кој се труди да понуди богата и ексклузивна програма која е ретко застапена во домашната музичка понуда.
Во салата 25 Мај во МКЦ, популарно познта како Денсинг сала како централниот настан ќе го отвори настапот на рускиот џез панк состав Оми, по кој следи фолк сензацијата Џутко и Плодови Земље од Хрватска, потоа домашниот состав Мај Тиар со нов состав и најава за новиот албум, хрватската психоделична банда Немања за на крај вечерта на оваа бина се затвори со долгоочекуваниот настап на хрватскиот анти рапер Војко В и Доуп Куќата.
Киното Фросина е наменето за млади надоаѓачки артисти кои имаат на кои дел од нив настапот на ЗДРАВО МЛАДИ им е посебен предизвик во нивните свежи кариери. На оваа бина, ќе се проследат настапите на новата звезда на српската поп музика Жива, португалката маѓионичарка на уку лелето Рита Брага, домашниот џез фолк состав Калата и францускиот рапер Јоланде Башинг.
Клубот МКЦ е резервиран за електронските артисти на фестивалот. Овде, публиката ќе има прилика да го чуе легендарниот рокенрол изведувач Иан Свенониус и неговиот последен проект Ескапизам, францускиот електронски артист чиј настап долго се очекува YMNK, кралевите на кумбијата Маускович Денс Бенд, италијанците Планет Опал и звездите на вечерта, британците PVA, кои за многу кратко време ќе се искачат многу високо на светските топ листи.
Џебното кино во МКЦ е резервирано за промоција на литературно музичкиот колектив Слово Култ со настап на 3 електронски артисти, ЏејДи Зази, Елизабета Костадиновска и Маргарет Аноун.
На платото пред МКЦ пак, со свој диџеј сет ќе не загреваат во текот на целата фестивалска вечер – резидент диџејот на Здраво Млади, диџеј Фиц заедно со поддршка од локалните диџеј уметници Ајнур Касо и Ертунч Сали.
Младински културен центар ветува уште едно спектакуларно издание на фестивалот, кој оваа година е финансиран од страна на Министерството за култура и Град Скопје, како и настапите на артистите кои се дел од програмата Лајвјуроп.
Билетите се по цена од 800 денари се до денот на фестивалот. Билетите може да се набават на билетарницата на МКЦ или на олајн линкот за продажба на билети на МКЦ. Вратите на МКЦ ќе бидат отворени за публика од 19 часот.