Филмскиот фестивал во Венеција ќе се одржи од 2 до 12 септември, како што беше планирано, рече денеска гувернерот на регионот Венето, Лука Заја.

„Поради застојот во филмската индустрија поради коронавирусот, помалку продуценти веројатно ќе присуствуваат на фестивалот“, рече Заја.

Претседателка на жирито на најстариот филмски фестивал во светот оваа година ќе биде американската актерка Кејт Бланшет.

Неодамна, организаторите на филмскиот фестивал во Кан потврдија дека годинава нема да се одржи.

Освен Кан, досега се откажани филмските фестивали во Карлови Вари, Локарно, Шангај, Сиднеј, Прага …

Италија планира да ја укине забраната за патување на 3 јуни.

Кинотеката на својата веб-страница продолжи да додава дел од своите изданија, со што тие се достапни за пошироката јавност, кинотечната публика и сите оние што сакаат да дознаат нешто повеќе за домашната и странската кинематографија. По сите досегашни броеви на „Кинопис“, списанието за теорија и историја на филм, од денес достапна за читателите е и монографијата „Манаки“ од авторот Игор Старделов, издание на Кинотеката од 2003 година. Тука можете да ја преземете монографијата.

Монографијата е еден заокружен научен труд за дејноста, значењето и активноста на првите сниматели на Балканот – браќата Јанаки (1878-1954) и Милтон (1880-1964) Манаки – и донесува нови сознанија за нивната фотографска, филмска и киноприкажувачка дејност. Низ шест поглавја авторот ги разгледува не само биографските моменти и творечкиот опус на браќата Манаки туку и критички демистифицира одредени историски факти и тврдења за нивниот живот и дело, ги анализира содржината и структурата на нивните филмови и изразните елементи, како монтажа, структура и хронотопичност на кадар, семиотика на филмска слика, кинестетски карактеристики на масовните сцени итн. На крајот, со посебен прилог Старделов се осврнува кон предизвиците на реставраторските и конзерваторски хемиски процеси со кои се заштитени филмските ленти на Манакиевци.

Во 2014 година монографијата „Манаки“ беше преведена и на турски јазик за заедничкото издание на Кинотеката и ESR Film Yapim од Истанбул.

Игор Старделов (1963) е раководител на Одделението на заштита на филмови и филмски материјали (Филмскиот архив) на Кинотеката. Објавил повеќе научни трудови од областа на историјата и теоријата на филмот во домашни и странски списанија, а меѓу другото, раководел и со проектите за заштитна реставрација на филмските ленти и дигитализација на филмовите на браќата Манки, финансирани од Министерсвото за култура.

Кинотеката филмовите на браќата Манаки, реставрирани и дигитализирани, ги издаде на ДВД во 2014 година.

Проектот „Жени за жени“ (Women on Women), кој во моментот Здружението за промоција на женската активност „Тиииит! Инк.“ го имплементира заедно со партнерите Prostor rodne i medijske kulture K-zona од Хрватска, Mesto Žensk од Словенија и Outlandish Theatre Platform од Ирска, има цел да даде видливост на значајните и инспиративни жени што нашето општество го менувале на подобро.

Во 2018 година партнерите од Хрватска развија иновативна игра со карти Fierce Women, која ги запознава нејзините играчи со достигнувањата на жените во сферите на културата, политиката, науката, феминизмот, човековите права и уметноста. Ова е забавен, едукативен и општествено ангажиран производ, кој ја нуди можноста да го отвори прашањето за родовата еднаквост во нашите општествени кругови.

Во рамките на овој проект во план е изработка на дополнителен шпил со 30 нови значајни или, како што ги нарекуваат нашите партнери од Хрватска, страшни жени, од Хрватска, Словенија, Ирска и од Северна Македонија. Вкупно 7 жени од ова поднебје се наоѓаат во селекцијата, и тоа: Роса Плавева, Накие Бајрам, Лилјана Дирјан, Вера Весковиќ-Вангели, Искра Грабул, Мимоза Несторова-Томиќ и Рајна Алексова за кои едвај чекаме да видиме интересни илустрации што ќе ги претстават нивните ликови и достигнувања. Апликант(к)ите треба да изберат од една до три од листата на триесетте избрани жени, од кои не се бара завршена илустрација, туку доволно е само скица.

За таа цел, објавен е повик отворен за уметници, илустратор(к)и и дизајнер(к) од цела Европа! Ги повикуваме креативците од нашата земја да се пријават најдоцна до среда, 24 јуни 2020. Оние автор(к)и чии илустрации ќе бидат избрани да бидат дел од овој шпил, ќе добијат награда од 160 евра (бруто) од илустрација и нивното уметничко дело како дел на овој шпил ќе биде промовирано преку разни канали на проектните партнери, како социјални мрежи, фестивали и други настани. Исто така, победничките и победниците ќе добијат шпил од картите Fierce Women WOW и еден од оригиналниот шпил Fierce Women. Повеќе информации за правилата и можностите што ги нуди овој повик можете да најдете на веб-страницата на „Тиииит! Инк.“ (tiiiitinc.com).