Култура
Музика од Гоце Стевковски на водечката џез плејлиста во светот
Кураторите на најголемиот светски сервис за слушање музика, Spotify, вклучија композиција од Гоце Стевковски на нивната плејлиста State of Jazz.
Станува збор за песната Monday, која го отвора новиот албум на септетот на Гоце Стевковски, наречен Homage to a Dreamer. Албумот, во Македонија, на компакт диск го издаде Скопје Џез Фестивал, додека дигиталното издание за светскиот пазар излезе на 17 август под етикетата на Филтер Лабел. Инаку, се работи за второ албумско издание на групата Гоце Стевковски Септет, на кое се наоѓаат седум нови композиции напишани од Стевковски.
Плејлистата State of Jazz, која ја подготвуваат кураторите на Spotify, важи за еден од најрелевантните избори на она што е квалитетно во светската џез продукција. На листата има вкупно 75 песни, а композицијата Monday на Стевковски е во друштво на музика од новите изданија на Brad Mehldau Trio, Kamasi Washington, Steve Turre, Trygve Seim, Charles Lloyd & The Marvels и други претставници на светската џез елита.

Интересно е што Monday се појави на оваа листа уште на денот на објавувањето и тоа на високото 8 место. Ваквата поддршка од Spotify ни влева оптимизам дека може да се очекува во следните недели и други композиции од албумот на Гоце Стевковски Септет да се најдат на популарните плејлисти на водечкиот сервис за музички стриминг во светот.
Инаку, покрај на Spotify, албумот Homage to a Dreamer може да се даунлодира и да се слуша од сите релевантни дигитални сервиси во светот. За песната Monday е снимен и видео спот, кој може да се погледне на https://youtu.be/kqBy_Pp3684
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Почина пејачката Бади Бекир
Денеска во Скопје почина пејачката на народна музика Небахат Бади Бекир.
Нејзиниот колега музичар Горан Алачки објави дека погребот ќе се одржи утре на градските гробишта „Бутел“.
Небахат Бади Бекир беше македонска пејачка на народна музика. Покрај соло кариерата, Бади понекогаш настапуваше со групата наречена „Четири грации“, каде покрај Бади беа и Благица Павловска, Адријана Алачки и Росана Тодоровска. Нарекувана е македонската Весна Змијанац.
Првите чекори на сцената ги прави во детските денови како член на играорна група изучувајќи го во исто време и македонскиот и турскиот фолклор. Како дебитант на музичката сцена се појавува во 1985 година на фестивал на забавни мелодии. Паралелно пее на турски, албански и македонски јазик. Најплоден период на нејзината кариера е за време на големите југословенски турнеи. По распадот на Југославија и се посветува на македонската фолк песна. Следат настапи на македонските фестивали, соработка со бројни автори и турнеја во австралија во 2002 година. Во 2004 година станува една од Грациите. Во 2006 година прославува 20 години постоење на естрадата.
Култура
„Емпатија во светлина“ – фотографска изложба на Милорад Милиќевиќ во Галерија „Рудиќ“
На 22 ноември (сабота) во 19 часот, во Галерија Рудиќ ќе биде отворена изложбата „Емпатија во светлина“ на фотографот Милиќевиќ. Портретите на Милиќевиќ не се студиски аранжирани кадри, туку сведоштва за луѓе вкоренети во својот простор, време и културна традиција на која ѝ припаѓаат.
Милиќевиќ не документира само лица – тој бележи приказни, традиција, верување, моменти на искреност кои не можат да се инсценираат. Неговите субјекти се спонтани, опуштени, прикажани во животни услови што ги дефинираат.
Портрет може да направи секој. Но добар портрет — оној што останува, што нè погодува таму каде што не сме очекувале — може да направи само оној што има вистинска емпатија кон другиот човек. Тоа не е прашање на занает, туку на карактер. Тоа или го носите во себе, или не. Милиќевиќ го носи. И го споделува со нас.
Изложбата „Емпатија во светлина“ ја опишува суштината на фотографскиот пристап на Милиќевиќ — тивка, но длабока присутност, каде светлината не е само визуелен елемент, туку медиум преку кој се открива човечноста, традицијата и искреноста на неговите субјекти.
Култура
Концертот „Од барок до современи македонски композитори“ во Даутпашиниот амам
Во петок, 21 ноември 2025 година, со почеток во 19:30 часот, во Даут-пашин амам ќе се одржи концертот „Од барок до современи македонски композитори“, кој низ внимателно конципирана програма го следи развојот на музичката форма и израз – од барокната прецизност до современиот македонски звук.
Концертот ќе ги обедини делата на Купрен, Хендл, Марчело/Бах и Силоти, a во центарот на програмата се дуетите на Бах од мисите и кантатите (BWV 232, 236, 124, 91) – пример за суптилен контрапункт и дијалог меѓу два вокални гласа.
Вечерта продолжува со избор од современата македонска продукција: композиции на Димитрије Бужаровски, Горан Начевски и Томислав Зографски, чија „Суита за пијано“, оп. 27 го заокружува програмскиот лак од барокната структура до модерниот национален израз.
Изведувачи се Мимоза Ќека (пијано), Марија Ташевска (сопран) и Мариана Бошковска (алт).
Проектот е поддржан од Министерството за култура и туризам на Република Северна Македонија. Влезот е слободен.

