„Небо во кафез“ е насловот на новата збирка поезија од Д.А.Лори, која ќе биде промовирана на 26 октомври во фоајето на киното „Фросина“ во МКЦ. Во својата  трета книга Лори го користи и омилениот поетски стил, сиџо, за на уште подиректен начин да направи пресек на стварноста, па на краток и чист начин ни ја предочува пресеана преку својата душа.

Во новата книга авторката зборува за љубовта, мајчинството, за губењето-наоѓањето, за лицемерието, решително за да ги допре најболните точки без грам патетика, а со оптимистичност за небото над нас.

Истата вечер, „Театарот на сенки“ ќе има претстава – перформанс со позајмени гласови на Ѓоко Здравески, Верица Недеска, Биљана Стојановска и на самата авторка, Лори. Музиката е од нашиот реномиран музичар, Горан Атанасов („Санаториум“). Дел од стиховите на Лори ќе читаат Снежана Стојчевска, Ана Голејшка Џикова, Биљана Стојановска и Ѓоко Здравески.

Во„Небо во кафез“ дел од песните се илустрирани со дела на Касиопеја Наумоска. Ова е нејзина трета збирка на  поезија по „Будење во трето лице еднина“ и  „Со ветерот под рака“.

Вечерва од 18:30 часот во Галеријата при Домот на културата „Иван Мазов – Климе“ во Кавадарци ќе се оддржи промоција на книгата „Маалски прикаски 1+2“ од македонскиот новинар Синиша Станковиќ.

За книгата ќе зборува самиот автор, а извадоци ќе пренесе актерот Александар Малинков.

Како дел од промоцијата авторот ќе потпишува примероци од „Маалски прикаски 1+2“

Деновиве во издание на литературното списание „Современост“ беше објавен драмскиот текст „Мајстори за огледала“ од Стефан Марковски.Во драмата Марковски дава автентичен и комичен приказ на болни општествени точки и актуелни феномени од типот на популарноста и делотворноста на литературата за самопомош, миграцијата на младите, среќата наспроти лузерството, меѓугенерациските конфликти и материјализмот во ерата на глобалното пазарно општество.

Како што пишува Катерина Момева, „Стефан Марковски преку оваа комична фарса за догмите на глобално еродираниот свет нè соочува со фактот дека малите земји со мали пазари остануваат центри за корупција, додека миграциите непрестано ќе се одвиваат во пренаселените европски држави. Во сето ова можеш да останеш човек кој не може да ги промени тековите, туку својата индивидуална судбина.

Огледалата се нашиот одраз, она што ние испраќаме на универзумот, тоа ни се враќа по принцип на огледало. Со драмска иронија Марковски фарсично го интерпретира верувањето дека енергијата се враќа онаква каква што ќе ја испратиш во универзумот, затоа што истото ова без современите изрази и фрази го знаеле и старите и мудрите, а дека среќата треба да се заснова на постабилни вредности Марковски автореференцијално коментира во фарсичен дух преку ликот на протагонистот.

Драмата е структурирана во 12 сцени, со автентичен авторски стил изразен преку линеарна драматуршка структура и контемплативна драматуршка нарација во манир на фарсичниот жанр, преку прецизни конфликти и изградени ликови“.

„Мајстори за огледала“ е прв драмски текст на Марковски објавен како книжевно дело.
Автор на корицата е академскиот сликар Никола Голубовски.