Мегапопуларната актерка, која јавноста во регионот ја познава по многуте серии, како „Жикина династија“, „Бољи живот“ и уште многу филмови и серии, в петок (15 ноември), гостува во Струмица со хит-комедијата „Чекајќи го министерот“.

Хит-комедијата, која ќе биде поставена во Центарот за култура во Струмица, ги освојува срцата на сите гледачи во сите земји во светот.

Во неделата и во понеделникот во Театар „Комедија“ пред преполна сала, а в петок Лидија Вуќичевиќ заедно со Милан Паиќ и Семир Гичиќ ќе го чека министерот во Струмица.

Претставата ќе се одигра во Центарот за култура со почеток 20 часот, а билетите се по цена од 200 денари.

(ПР текст)

По фестивалите во Бусан, Варшава и Котбус, филмот „Глас“, во режија на Огњен Свиличиќ, утре ќе ја доживее македонската премиера во рамките на Фестивалот на европскиот филм „Синедејс“.

„Глас“ е копродукција меѓу „Максима филм“ од Хрватска, „Скопје филм студио“ од Македонија и „Биберче продукција“ од Србија, а проектот беше поддржан од страна на Агенцијата за филм на РСМ, како и од Хрватскиот аудиовизуелен центар, Хрватската радио-телевизија и Филмскиот центар на Србија.

По светската премиера во Бусан, каде што беше одлично прифатен од публиката, филмот имаше европска премиера на интернационалниот филмски фестивал во Варшава по што фестивалскиот живот продолжи на фестивалот во Котбус, Германија, каде беше дел од натпреварувачката програма.

„Глас“ е приказна за младо момче кое пристигнува во католички интернат, каде што им дава отпор на верските практики на училиштето. Сепак, учениците и наставниците го сметаат момчето за прилично чудно“.

Сценариото за филмот го напишаа Огнен Свиличиќ и Маријана Верхоев, директор на фотографијата е Маринко Маринкиќ, сценограф е Ивана Шкрабало, костимографијата е на Емилија Ивановска-Атанасовска, снимател на звук е Игор Поповски, а монтажата на Наташа Пантиќ. Продуцент на филмот е Дамир Терешак, а копродуценти се Томи Салковски и Николина Вучетиќ.

Улогите ги толкуваат: Франко Јаковчевиќ, Белма Салкуниќ, Игор Ковач, Карла Брбиќ, Барбара Вицковиќ.

Јубилејното реиздание на ремек-делото Homebound на Кирил Џајковски излегува на 13 ноември, точно дваесет години по оригиналната објава. Овој легендарен албум со своето појавување во 1999 година дефинира нов музички правец, во кој традиционалната музика и
современата електроника живеат во совршена хармонија. Оригинално објавен под
тогашното уметничко име на авторот, Кирил, Homebound беше еднакво фасцинантен и за публиката и за музичката критика, која не штедеше пофалби за храбрата мешавина од downtempo, world music, breakbeat и drum’n’bass. Албумот доби одлични рецензии од речиси сите релевантни музички списанија и радиостаници и со тоа значително им го олесни патот на цела генерација нови музичари кои не се плашеа да експериментираат, да ги пробиваат постојните граници и да откриваат нови музички светови.

Дваесет години подоцна оваа исклучителна колекција од современа музика останува да биде скапоцено сведоштво за едно време кога музиката беше забавна и авантуристичка, но истовремено и длабока и полна со значење. Речиси е неверојатно што покрај тоа што беше футуристички и авангарден во времето кога се појави Homebound, остари прилично достоинствено, па звучи извонредно свежо и релевантно цели две децении по првото објавување.

Реизданието на Homebound содржи ремастерирани верзии од сите десет песни од оригиналното издание. Излегува потпишано со новиот уметнички бренд на авторот Џајковски, а од 13 ноември ќе биде достапно на сите дигитални сервиси за музика во светот. Издавач на реизданието е Filter Label.