Култура
Дан и Лиа Пержовски донираа дела на Музејот за современа уметност и ја забогатија уметничката колекција
Уметникот Дан Пержовски донираше две дела за колекцијата на Музејот на современа уметност во Скопје.
Првото дело „Скопски столб“, site-specific цртеж на столб, создаден во согласност со просторот на музејот, а второто е компилација од 15 броеви на Newspaper/Artzine, серија на уметнички публикации (објавени помеѓу 2009-2022).
Додека, уметницата Лиа Пержовски ја донираше инсталацијата под наслов „Сет за преживување (за преживување во денешниот свет)“, 2024. Оваа инсталација се фокусира на стратегиите за преживување во денешниот свет, истражувајќи различни аспекти на социјалните, политичките и културните предизвици.
Донираните дела од Дан и Лиа Пержовски ќе го збогатат музејскиот фонд и ќе понудат уникатен поглед на современата уметност.
Уметничкиот пар досега ги има исцртано ѕидовите во МоМА Њујорк, Тејт Модерн во Лондон, Центарот Помпиду-Бобур во Париз, ВанАбе Музејот во Ајндховен… а во моментов во МСУ може да се погледне нивната самостојна изложба, која ќе биде отворена до средината на ноември.
Дан Пержовски, чие изразно средство е цртежот во МСУ се претстави со проектот „Обновени вести“ (ReNews), фокусиран на актуелните општествени и политички настани преку оригинална визуелна перспектива. Замислен како динамична и еволутивна визуелна хроника, која реагира на тековните настани и промените во светот. Уметникот користи различни медиуми, често комбинирајќи графики, текстови и илустрации за да создаде креативен и критички поглед на актуелните случувања. Овој проект вклучува и компоненти како што се стрипови, колажи и слики, кои на интензивен начин ја истражуваат и визуелизираат комплексноста на современата политика и општество. Дан Пержовски се фокусира на тоа како медиумите и информациите влијаат на нашето разбирање на светот, и „Обновени вести“ е негов обид да ги истражи и предизвика традиционалните наративи и начин на известување. Со тоа, ги поттикнува гледачите да размислуваат за информираноста, пропагандата и моќта на медиумите.
Дел од неговата изложба е и интерактивна. На поставката има ѕид, каде посетителите можат да цртаат или напишат нешто доколку имаат што да кажат.
Лиа Пержовски истражувачка, уредничка и концептуална уметница ќе се претстави со проектот „Сет за преживување (избор од Музејот на знаењето)“ – (Survival Kit (a selection from Knowledge Museum)) во кој истражува концепти поврзани со знаењето, образованието и социјалните структури, преку серија интерактивни и концептуални дела. Сет за преживување е интердисциплинарен проект кој вклучува различни медиуми и формати, како: графики, објекти и документи. Оваа селекција е изработена како обид да се создаде едукативен ресурс, кој преку визуелната уметност го истражува и предизвикува размислување за историјата, културата и секојдневниот живот.
Проектот вклучува и различни интерактивни компоненти, кои ги поттикнуваат гледачите да се вклучат и да размислуваат на поинаков начин, користејќи ги визуелните елементи за да создадат нови перспективи и критичко размислување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Кармина Бурана“ – Триумфална изведба во Националната опера и балет
Синоќешната изведба на „Кармина Бурана“ во Националната опера и балет беше вистинско уживање за љубителите на сценската уметност, пружајќи извонредно искуство и спојувајќи ги силната музика, динамичната кореографија и визуелниот раскош. Под диригентската палка на
Иван Еминовиќ, ова познато дело на Карл Орф оживеа пред публиката, според организаторот.
Кореографската верзија на Кан Арслан внесе свежина во познатото дело, каде што совршено беше избалансирана комбинацијата на танцовите движења и моќната музичка партитура. Посебен момент од вечерта беше изведбата на „О Фортуна“, кога балетските уметници, во впечатливи костими, со своите енергични и прецизни движења ја воодушевија публиката.
Хорот на Националната опера и балет, заедно со солистите на операта, Надe Талевска- сопран, Благој Нацоски – баритон и Денис Димоски – контра-тенор, беа клучниот елемент на оваа изведба. Нивната вокална моќ и емоционална длабочина ги донесоа на сцена темите на „Кармина Бурана“ –судбината, љубовта и желбата. Хорот успеа да ја задржи динамиката на изведбата, создавајќи силен звучен ѕид кој постојано се усогласуваше со оркестарот и балетот на сцена. Нивната изведба беше врвот на вечерта, а публиката ги награди со долготраен аплауз.
Диригентот Иван Еминовиќ со извонредна прецизност го водеше оркестарот низ комплексната партитура на Орф, вешто истакнувајќи ги контрастите помеѓу нежните и експлозивните делови. Оркестарот брилијантно ја изведе секоја партитура, овозможувајќи ѝ на публиката целосно
да го почувствува емоционалниот распон на ова големо дело.
„Кармина Бурана“ во изведба на Националната опера и балет, беше извонреден уметнички подвиг. Спојот на визуелниот, музичкиот и кореографскиот израз создаде претстава што ја маѓепса публиката и докажа зошто оваа институција останува еден од водечките столбови на културниот живот во Македонија, истакнува организаторот.
Култура
„Водени предели: Импресии од патувања и култури“ – изложба на акварели од Симонида Филиповa и Ари де Гоеш
Во Културно-информативниот центар – Скопје на 22 октомври 2024, во 20 часотќе се случи отворањето на „Водени предели: Импресии од патувања и култури“ – изложба на акварели од Симонида Филиповa и Ари де Гоеш.
Заедничката изложба на Симонида и Ари де Гоеш „Водени предели: Импресии од патувања и култури“, според организаторот, е фузија на многугодишните искуства и посветеноста кон уметноста на двајца артисти, претставена во форма на уникатен дијалог помеѓу нивните рафинирани техники и емотивни изрази. Акварелната техника е средство со кое овие визуелни уметници, и неуморни патници, ја доловуваат флуидноста и постојаната трансформација на пејзажите со кои се сретнале и на влијанијата од културите што ги апсорбирале на секое едно место при своите патувања.
Симонида, позната по нејзината техничка сензитивност, користи енергични потези и живописна палета на бои за да создаде апстрактни форми кои одекнуваат како импресии од нејзината културна траекторија. Водената боја, применета со мајсторство, им овозможува на нејзините композиции да бликаат со својата длабочина и динамика, додека транспарентноста меѓу слоевите создадава игра на светлина и сенка која го предизвикува гледачот да погледне под површината. Нејзиното широко искуство како визуелен уметник е очигледно во богатите детали на формите и нејзината способност да го преведе со совршена прецизност хаосот и енергијата на урбаните и природните пејзажи кои ја инспирирале.
Од друга страна, Ари де Гоеш се фокусира на едноставноста на пејзажите во форма на елегантни полуапстракции, каде што рафинираната техника е фундаментална за постигнување на посакуваната леснотија и спокојство. Неговата прецизна употреба на техники базирани на вода, комбинирана со поедноставување на формите, ги облагородува пејзажите со контемплативен карактер, дозволувајќи му на гледачот да се нурне во спокојот на неговите композиции. Преку транспарентноста и суптилните контрасти, Ари ги претвора обичните сцени во длабоки визуелни рефлексии.
Технички, изложбата „Водени предели“ открива уникатна хармонија помеѓу гестуалната експресивност на Симонида и контемплативната леснотија на Ари де Гоеш. Двајцата уметници се потпираат на различни културни влијанија за да ги компонираат своите апстрактни пејзажи, каде што транспарентноста, суптилните или енергичните потези и интеракцијата меѓу боите и формите се истакнуваат. Апстракцијата е заедничка нишка која овозможува личните искуства од патувањето и интроспекцијата на секој уметник да се соединат во визуелен дијалог.
Оваа фузија на техники и естетски пристапи нуди рефлексија за влијанието на пејзажите, не само како физички простори, туку и како метафори на спомени, емоции и трансформации што ги доживуваат оние кои ги населуваат или посетуваат тие предели расеани по меридијаните. „Водени предели: Импресии од патувања и култури“ е изложба која ја слави уметноста како зачин за внатрешна и надворешна трансформација, поканувајќи го гледачот на контемплација при своето патување низ водените предели на двајца исклучителни уметници, пријатели и патници.
Култура
Меѓународниот филмски фестивал ,,Киненова” од денеска во Домот на културата „Билјана Беличанец“ во Кисела Вода
Градоначалникот Орце Ѓорѓиевски вчера беше дел од отворањето на 9. издание на Меѓународниот филмски фестивал „Киненова“ кое се одвиваше во киното „Фросина” во МКЦ. За првпат досега, целокупната филмската програма, од денеска па се до 20 октомври, ќе може да се проследи во Домот на култура „Билјана Беличанец“ во Кисела Вода, во „Киноверзум“.
„На мое огромно задоволство, вечерва имав чест да присуствувам на едно од најубавите случувања во Скопје – на отворањето на деветтото издание на Меѓународниот филмски фестивал, „Киненова”. Токму од ова место, од киното „Фросина” во МКЦ, а веќе од утре и за првпат досега, целата филмска програма ќе се одвива во Домот на култура „Билјана Беличанец” во Кисела Вода и ќе имаме можност да ги видиме возбудливите дебитантски остварувања од младите режисери од Македонија и светот за кои сум убеден дека, ќе го задржат до крај вниманието на сите гледачи.
Исто така, имаме можност да го проследиме и првиот анимиран филм во Македонија, дело на Гоце Цветановски. Изразувам огромна благодарност до директорот на овој фестивал, Небојша Јовановиќ за поканата на овој прекрасен настан. Упатувам честитки до лауреатот за оваа година, познатиот австриски режисер Улрих Зајдл, добитникот на наградата ,,Златна грива.”
Беше навистина посебно да се биде во друштво со македонските и светските режисери и актери. На Скопје му недостасуваат вакви настани. И Скопје, повторно ќе биде град на културата“, истакна вчера, градоначалникот Орце Ѓорѓиевски.