Култура
Дванаесето издание на „Анимакс“

Под мотото „Каде бајките оживуваат“ ќе се одржи дванаесеттото издание на меѓународниот фестивал за анимирани филмови во С Македонија, Анимакс Скопје фест. На него ќе бидат прикажани 25 анимирани филмови во официјалната програма и 9 анимирани филмови наменети за детската публика. Настанот ќе се одржува од 24 до 25 декември (петок и сабота) во Кинотека на Македонија. Влезот е бесплатен.
Филмовите во официјална селекција се избрани од пријавениот рекорден број анимации, над 1 800 меѓу кои најголем број од: Франција, Англија, Германија, Шпанија, Русија, Бразил и други.
Овогодишната жири комисија ја сочинуваат: м-р Мими Ѓоргоска, д-р Лазе Трипков и Илчо Симовски.
Голем дел од филмовите кои се борат за Златната, Сребрена и Бронзена Тула се носители на престижни награди и победници на филмски фестивали од А категорија.
Официјалната програма на фестивалот со прикажување на филмовите ќе почнува во 20:00 часот Проекцијата на филмови за деца ќе се одржи на 25 декември (сабота) со почеток во 17:00 часот. Младата публика ќе има можност да гласа за најдобриот филм за деца и да го одбере победникот. Проекциите за деца се исто така бесплатни.
„ Мудрите луѓе велат колку е поголемо делото толку се поголеми искушенијата. Овој период, на планетарно ниво повикува на преиспитување, на донесување одлука. Нихилизмот се чини дека е нововоспоставена религија, но вистинскиот автор секогаш е смел во потрагата по единствената вистина. Други автори, пак, ја сликаат стварноста без да очекуваат иманентен одговор; ја прикажуваат вехементноста на времето и просторот; и размислата ја оставаат на оние кои ја восприемаат нивната уметност. Накратко вака би можел да ја опишам програмата на овогодишното издание на Анимакс Скопје фест“, вели основачот и директор на фестивалот Кузман Кузмановски.
Анимакс Скопје фест е во организација на продуцентската куќа „Аурипигмент“, во соработка со филмското училиште „Тинтири-Минтири“ од Скопје, со поддршка од Град Скопје и во соработка со Кинотека на Македонија.
Анимакс Скопје фест е прв фестивал на анимиран филм во Македонија. Цел на фестивалот е подигање и градење на културата во поглед на изработка на анимирани филмови за возрасни и деца, кои презентираат различни аспекти од секојдневниот живот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Полскиот режисер Кемпински ќе режира претстава во Македонија

Еден од најдобрите полски режисери Грзегорз Кемпински ќе режира македонска претстава. Во продукција на независниот театар „Отпишани“, македонската публика, наесен, ќе има можност да ужива во претставата „Животот е краток и нејасен“, чиј автор е македонскиот драмски писател Марјан Анѓеловски.
Сатиричната драма „Животот е краток и нејасен“ преку еден апсурден начин зборува за системот на загубени вредности, кој го разорува корупција и колективно безумие. Грзегорз Кемпински (Grzegorz Kempinsky) е еден од најреномираните полски режисери, добитник на голем број меѓународни награди од областа на театарот и филмската уметност.
Претставата „Животот е краток и нејасен“ доаѓа по одличниот успех на претставата „Среќен мртовец“ во продукција на театарот „Отпишани“, каде главната улога ја толкува легендарниот актер Благој Чоревски.
Култура
Објавени конкурсите за државните награди „11 Oктомври“ и „22 Ноември“ за 2025 година

Министерството за култура известува дека Одборот за доделување на државната награда „11 Октомври“ распиша Конкурс за доделување на државната награда „11 Октомври“ за 2025. Со оваа награда се оддава највисоко признание за животно дело во областа на науката, уметноста, стопанството и во другите дејности од јавен интерес на Република Северна Македонија. Наградата се доделува на поединци, група творци, екипи, установи, трговски друштва и здруженија на граѓани од земјава.
Воедно, Одборот за доделување на државната награда „22 Ноември“ распиша Конкурс за доделување на државната награда „22 Ноември“ за 2025 година. Со оваа награда пак, се оддава признание на личностите од политичкиот, културниот и општествениот живот во Република Северна Македонија кои дале свој придонес во унапредување на меѓучовечкиот соживот и меѓусебно разбирање меѓу припадниците на различните заедници, култури и вери во земјава.
Конкурсите за државните награди „11 Oктомври“ и „22 Ноември“ за 2025 година траат од 1 до 31 мај 2025 година.
Култура
Нова книга „Културата и траумата – Писмо до бугарскиот пријател“ од проф. д-р Златко Крамариќ

Во издание на „Матица македонска“ од Скопје излезе од печат книгата „Културата и траумата“ од познатиот македонист од Хрватска, д-р Златко Крамариќ. Воведниот текст од книгата е во форма на „Писмо до бугарскиот пријател“. Како редок познавач на балканските состојби тој во овој прилог ја нагласува смислата за добрососедството и заемната почит меѓу државите, посочувајќи дека „еден од битните детали во тие визии на идните посакувани односи во Европа е и односот спрема соседите. Можеби токму тој детаљ и е еден од најважните. Има ли нешто поубаво отколку да се живее крај среќен и задоволен сосед. Неговата среќа и задоволство и нас би требало да не прави среќни“, констатира авторот.
Во книгата „Културата и траумата“ посебен акцент е ставен и на улогата на Штросмаер и македонскиот идентитет, на модернизмот во мрачните времиња, на создавањето на македонската интелигенција и на новите политики кон новите идентитети.
Златко Крамариќ (Осиек, 1956) е познат хрватски научник, универзитетски професор, книжевен критичар, врвен теоретичар на литературата и долгогодишен дипломат. Автор е на триесетина книги, преведени на повеќе јазици. Во изминатите четири децении со особена љубов и континуирана посветеност, тој ја афирмира македонската литература, поставувајќи високи критериуми при анализирањето на дела од најзначајните македонски писатели. Со својот континуиран ангажман, Златко Крамариќ застанува на чело на проучувачите, проследувачите, толкувачите и аниматорите на процесите на македонската историја, традиција и култура и на македонскиот јазик и богата литература. Член е на Друштвото на хрватските книжевници, на Хрватското филозофско друштво, на Матица Хрватска, а во 2015 година беше избран за член на Македонската академија на науките и уметностите.