Култура
Исмаили на отворањето на Меѓународниот конгрес на општествени науки во Скопје

Министерот за култура Хусни Исмаили, денеска присуствуваше и се обрати на свеченото отворање на 5. Меѓународен конгрес на општествени науки кој оваа година во соработка на Меѓународниот Балкански универзитет, Универзитетот на Тракија, Универзитетот Намик Кемал од Текирдаг и Универзитетот Мармара се одржува во Скопје.
Во своето поздравно обраќање министерот Исмаили го изрази задоволството од досегашната соработка меѓу Република Северна Македонија и Република Турција која се одвива во духот на пријателството и традицијата, со постојани заложби за нејзино унапредување.
Исмаили говореше за непроценливата важност што културата, науката и образованието ги имаат во градењето на пријателството и довербата помеѓу земјите од светот, споменувајќи ги бројните заеднички реализирани проекти во културата, уметноста, издаваштвото, соработката со ТИКА, како и соработката во областа на образованието и размената на искуства, што претставуваат светол пример и афирмација на универзалните вредности кои, пак, помагаат за поголемо взаемно почитување, запознавање и градење свет на толеранција, богат со различности кои меѓу себе се надградуваат создавајќи нов квалитет.
Покровител на Конгресот кој на Балканскиот универзитет се одржува денес и утре е претседателот на законодавниот дом на Турција, проф.др. Мустафа Шентоп. На отворањето беа присутни и амбасадорката на Турција во Скопје, Тулин Еркал Кара, министерот за јавна администрација на Република Косово, Махир Јагџилар, заменик-претседателот на Собранието на Турската Република Северен Кипар, Зорлу Торе, високи гости од Турција, пратеници и професори од двете земји.
Конгресот е поддржан од Министерството за култура и туризам на Република Турција, ТИКА, Институтот Јунус Емре, Унијата на општини на Турција, Општините Османгази, Бахчелиевлер, Сивас и Сулејманпаша од Турција, Туркиш Ерлајнс и Стопанската Комора на Измир.
Покрај протоколарниот дел ќе се одржат и три панели со учество на еминентни панелисти од земјава и од странство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Објавен конкурсот за доделување на државната награда „Мајка Тереза“

Министерството за култура и туризам го објави Конкурсот за доделување на државната награда „Мајка Тереза“ за 2025 година.
Со државната награда „Мајка Тереза“ се оддава признание за остварувања во областа на хуманоста и човечката солидарност и за поттикнување и унапредување на меѓусебното разбирање и развој на соработката како меѓу народите, така и меѓу припадниците на различните заедници, култури и вери.
Државната награда се доделува на поединци, група творци, екипи, установи, трговски друштва и здруженија на граѓани од земјава.
Конкурсот трае од 2 до 30 април 2025 година, а е објавен и на веб-страницата на Министерството за култура и туризам.
Култура
Димитрија Доксевски избран за директор на фестивалот „Браќа Манаки“

Актерот Димитрија Доксевски на денешното свечено Собрание на Друштвото на филмски работници (ДФРМ) е избран за нов директор на Меѓународниот фестивал на филмска камера „Браќа Манаки“.
Според статутот на ДФРМ, мандатот на Димитрија Доксевски важи за следните две изданија на фестивалот.
Димитрија Доксевски ја презентираше предлог програмата на фестивалот и се заложи дека ќе работи на зачувување на реномето што го има овој интернационален фестивал на филмска камера, соопшти ДФРМ.
Димитрија Доксевски е македонски филмски и театарски актер, сценарист и продуцент, роден на 28 јули 1983 година во Скопје. Дипломирал актерска игра на Факултетот за драмски уметности во Скопје во 2006 година во класата на проф. Кирил Ристоски, а во 2014 година магистрирал режија на истиот факултет во класата на проф. Слободан Унковски. Својата професионална кариера ја започнал во Македонскиот народен театар во 2006 се до 2011. Продолжил кратко да работи во Кумановскиот театар во прериодот од 2011 до 2013, по што во 2014 година се приклучил на ансамблот на Драмски театар Скопје и се до денес е активен член на тој театар. Покрај настапите на матичната сцена, Доксевски има учествувано и во претстави на други театарски сцени низ Македонија, како и во филмски и телевизиски проекти во и надвор од Македонија.
Учествувал во организирање и продуцирање повеќе театарски претстави, организирање на повеќе од 20 музички настани со артисти од целиот свет, продуцирање и организација на 2 големи музички (open air) фестивали со повеќе од 20 интернационални изведувачи, продуцирање и реализација на кратки филмови, играни видеа за деца и театарски претстави.
Култура
Љуљзиме Лека-Муљаку во Чифте амам со циклусот „Метаморфоза II“

На втори април, среда, во 19.00 часот, во Чифте амам ќе биде отворена самостојна изложба на Љуљзиме Лека Муљаку со наслов „Метаморфоза II“.
Љуљзиме Лека Муљаку припаѓа на современата уметничка сцена и ја претставува генерацијата уметници кои својата дејност ја започнале со визуелен израз од 90-тите години.
Таа ќе се претстави во Националната галерија со 50 слики од различни формати, интересен циклус со дела изработени во акрилна техника.
Изложбата „Метаморфоза II“ е нов циклус на дела кој претставува реалистичен поглед на егзистенцијалните естетски вредности. Фигуративната композиција на овој циклус ја отсликува егзистенцијалната уметност на женската невиност и достоинство.
Ликовното претставување тесно се поврзува со идејата на женскиот феномен во нашето општество и го претставува нејзиното диспропорционално присуство во видлив облик.
Изложбата ќе биде поставена до 13 април 2025, а куратор е Нарона Љума Весели.