Култура
Костадиновска-Стојчевска од Крушево: Поддршката од скоро десет милиони денари за развојот на културната програма дава резултати

Министерката за култура Бисера Костадиновска-Стојчевска денеска беше во работна посета на Општина Крушево, каде што се сретна со градоначалникот Томе Христоски и направи обиколка на дел од националните установи од културата.
Костадиносвка-Стојчевска и Христоски ги разгледаа актуелните состојби во културата, а разговараа и за резултатите кои се постигнати со вложувањето во овој сектор, кој е еден од најважните за промоцијата на градот.
Таа рече дека Крушево и локалната самоуправа знаат да ја вреднуваат моќта на културата и според тоа влегуваат во приоритетите за поддршка на Министерството за култура, кое инвестира во изградба и обнова на културна инфраструктура.
„За крушевчани, 2023 е исклучително успешна година, во која се вложени речиси 10 милиони денари за културни настани, претстави, концерти, изложби кои го претставија градот како културен и туристички центар на овој регион од државава. Достоинствено одбележавме 120 години од Илинденското востание во рамките на манифестацијата „Крушево, град на културата 2023“, што ја поддржавме со сума од 3,4 милиони денари, рече министерката за култура.
Ги издвои позначајните проекти со кои Минситерството за култура преку Годишната програма ја поддржа оваа установа, како и „Спомен куќа на Тодор Проески“, а стана збор и за степенот на реализација на финасираните проекти од областа на заштитата на културното наследство, за што изманатава година се инвестирани околу еден и пол милион денари.
„Општината со богата историја, традиција и култура беше корисник и на Програмата за капитални дотации од областа на културата за единиците на локалната самоуправа, од која на Крушево му доделивме речиси 1,2 милиони денари за монтажната бина. Ова е потврда дека со добри проекти и идеи, успешно се остваруваат потребите и интересите на граѓаните, рече Костадиновска-Стојчевска.
При својата работна посета на Крушево, ги посети „Леарницата“ и „Спомен собата на Васил Иљоски“, која исто така е реализирана со поддршка на Министерството за култура, а се сретна и со в.д. директорот на новоформираната институција, НУ „Десет дена Крушевска Република“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Димитрија Доксевски избран за директор на фестивалот „Браќа Манаки“

Актерот Димитрија Доксевски на денешното свечено Собрание на Друштвото на филмски работници (ДФРМ) е избран за нов директор на Меѓународниот фестивал на филмска камера „Браќа Манаки“.
Според статутот на ДФРМ, мандатот на Димитрија Доксевски важи за следните две изданија на фестивалот.
Димитрија Доксевски ја презентираше предлог програмата на фестивалот и се заложи дека ќе работи на зачувување на реномето што го има овој интернационален фестивал на филмска камера, соопшти ДФРМ.
Димитрија Доксевски е македонски филмски и театарски актер, сценарист и продуцент, роден на 28 јули 1983 година во Скопје. Дипломирал актерска игра на Факултетот за драмски уметности во Скопје во 2006 година во класата на проф. Кирил Ристоски, а во 2014 година магистрирал режија на истиот факултет во класата на проф. Слободан Унковски. Својата професионална кариера ја започнал во Македонскиот народен театар во 2006 се до 2011. Продолжил кратко да работи во Кумановскиот театар во прериодот од 2011 до 2013, по што во 2014 година се приклучил на ансамблот на Драмски театар Скопје и се до денес е активен член на тој театар. Покрај настапите на матичната сцена, Доксевски има учествувано и во претстави на други театарски сцени низ Македонија, како и во филмски и телевизиски проекти во и надвор од Македонија.
Учествувал во организирање и продуцирање повеќе театарски претстави, организирање на повеќе од 20 музички настани со артисти од целиот свет, продуцирање и организација на 2 големи музички (open air) фестивали со повеќе од 20 интернационални изведувачи, продуцирање и реализација на кратки филмови, играни видеа за деца и театарски претстави.
Култура
Љуљзиме Лека-Муљаку во Чифте амам со циклусот „Метаморфоза II“

На втори април, среда, во 19.00 часот, во Чифте амам ќе биде отворена самостојна изложба на Љуљзиме Лека Муљаку со наслов „Метаморфоза II“.
Љуљзиме Лека Муљаку припаѓа на современата уметничка сцена и ја претставува генерацијата уметници кои својата дејност ја започнале со визуелен израз од 90-тите години.
Таа ќе се претстави во Националната галерија со 50 слики од различни формати, интересен циклус со дела изработени во акрилна техника.
Изложбата „Метаморфоза II“ е нов циклус на дела кој претставува реалистичен поглед на егзистенцијалните естетски вредности. Фигуративната композиција на овој циклус ја отсликува егзистенцијалната уметност на женската невиност и достоинство.
Ликовното претставување тесно се поврзува со идејата на женскиот феномен во нашето општество и го претставува нејзиното диспропорционално присуство во видлив облик.
Изложбата ќе биде поставена до 13 април 2025, а куратор е Нарона Љума Весели.
Култура
Ремек-делото „Тоска“ од Џакомо Пучини на 4 април во НОБ

На 4 април со почеток во 20.00 часот на сцената на Националната опера и балет ќе се изведе ремек-делото „Тоска“ од Џакомо Пучини, музичка драма во вистинска смисла на зборот, монументална, брилијантно оркестрирана, реалистична опера во три чина. Љубовта, страста, љубомората и политичките интриги се движечките драмски елементи на овој „оперски трилер“.
Гостинот од Италија, Марио Меникаљи ќе диригира со изведбата на оваа драматична трагедија на Пучини, во режија на Огњан Драганов од Бугарија, сценографијата е на Зоран Николовски, а костимографијата на Марија Пупучевска, хор-мајстор: Ѓурѓица Дашиќ и Јасмина Ѓоргеска, а концерт-мајстор е Верица Ламбевска.
Во насловната улога ќе настапи Благица Поп Томова , во улогата на Каварадоси ќе настапи Зоран Сотиров, во улогата на Скарпија, Maрјан Јованоски, во останатите улоги настапуваат: Борко Биџовски, Драган Ампов, Никола Стојчески, Тихомир Јакимовски, Никола Чедомировски, Десанка Глигоријевиќ заедно со хорот и оркестарот на Националната опера и балет.
Tоска е опера во три чина од Џакомо Пучини. Напишана е по италијанското либрето од Луиџи Илика и Џузепе Џакоза. Либретото се базира на драмата „Тоска“ од Викториен Сарду. Светската премиера на операта е одржана на 14 јануари 1900 г. во Рим, Италија.