Култура
Костадиновска-Стојчевска: Со Сојузот на борците продолжуваме да го чуваме делото на храбрите визионери на кои им ја должиме слободата
Министерката за култура Бисера Костадиновска-Стојчевска денеска учествуваше на трибината по повод јубилејот 80 години од ослободувањето на градовите во државата на која рече дека, почитта кон хероите од НОВ и НОБ во нас ја буди вербата во идеалите, ни дава храброст и мудрост да продолжиме во градењето и обликувањето на визијата за слободна и демократска татковина.
-Како внука на носител на Партизанска споменица и како почитувач на жртвата и пожртвуваноста на сите борци, со гордост можам да кажам дека ние, како наследници на знајните и незнајните јунаци, го чуваме нивниот аманет. Со него живееме и е наше секојдневие и инспирација во градење на правично, демократко, модерно и европско општество, истакна Костадиновска-Стојчевска во Градскиот народен одбор.
Министерката за култура зборуваше за обвсрката што како поколенија ја имаме за чување и одбележување на сите борци кои ни ја подарија државата, и додаде: „Да се сеќаваме на АСНОМ, на сите кои помогнаа да се кодифицира и да се стандардизира македонскиот јазик, да стане дел од ЕУ и евртопското семјество како македонски јазик, да бидеме Македонци горди на својата историја, и никој не може ниту да ни ја земе ниту да ни ја избрише“.
Таа потенцираше дека како еден од приоритетите и нејзини и на Министерството за култура е секако превентивната заштита на спомениците од НОБ со што се потврдува посветеноста за зачувување на богатото културно и историско наследство за идните генерации.
-Овие споменици повеќе од 30 години воопшто не беа третирани и никој не се грижеше за нив. Затоа минатата година поправивме дел, а годинава продолжуваме и со останатите. За таа цел во некои установи од областа на културата минатата година воспоставивме и нова буџетска ставка за тековно одржување на спомениците, рече министерката за култура.
Владата и Министерството за култура се искрени поддржувачи на Сојузот на борците и како што истакна министерката за култура, и во иднина продолжува поддршката и негувањето на делото на жртвите на партизаните.
Костадиновска-Стојчевска изрази жалење што и годинава продолжува оштетувањето на спомениците од кои дел се под ингеренции на локалните самоуправи, кои не покажаа интерес за нивна заштита.
На трибината која се одржа во организација на Сојузот на борците учествуваа и министерките за одбрана и за труд и социјална политика Славјанка Петревска и Јована Тренчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.