Култура
„Лајбах“ ќе го отворат „Скопје колинг“: нивниот единствен услов беше да биде темно, бидејќи подготвуваат импресивно лајт и видео
Руската техно изведувачка Нина Кравиц и словенечкиот бенд „Лајбах“ се најавени како главни изведувачи на годинешното издание на фестивалот „Скопје колинг“.
Менаџерот Бобан Милошоски се изненади од бројот на камери па се пошегува „Пет камери како да збориме за ново парламентарно мнозинство или за прифаќање на уставните промени, е посетен пресот, што е доказ дека луѓево се желни за убави работи“.
„Лајбах“ ќе го отворат „Скопје колинг“. Нивното барање било да настапат во темно, затоа што подготвуваат спектакл.
„„Лајбах“ ќе бидат први ќе настапат во 9 и 15, нивниот единствен услов беше да биде стемнето, бидејќи подготвуваат импресивно лајт и видео. За да може и вие што сакате од дома со столчиња да дојдете и да ги гледате. Адаптиран е редоследот, но нема да биде вака како што објавено. Адаптирано е според музичкиот концепт на фестивалот како да се загрева атмосферата до Нина Кравиц, пред неа ќе настапи некој како вовед“, изјави Бобан Милошевски од „Авалон продукција“.
Предвидено е на „Скопје колинг“ да настапат уште три регионални ѕвезди од поновиот бран: минатогодишната претставничка на Србија на Евровизија, Констракта, српската електро-поп група „Буч Кесиди“ и хрватите „Ниплпипл“.
Лајнапот на фестивалот ќе почнат да го објавуваат од вечерва. Авалон се изненадени од интересот на публиката.
„Ако земеме предвид фестивалот сепак е авангарден и не е ултра комерцијален како што е охридскиот, сме неверојатно позитивно изненадени од бројот на посетители кои ќе се појават во петок.
Секогаш се трудиме „Скопје колинг“ да биде пософистициран и да биде настроен кон мејнстрим генерацијата“, рече Бобан.
Авалон лани најавија голем стадионски спектакл. Бобан вели идејата сè уште стои, но сега повеќе сакаат да стават акцент на „Скопје колинг“ и „Охрид колинг“ кој оваа година првпат ќе трае пет дена.
„Лично одлучив оваа година да биде некоја транзициска година со што е можно помал број на концерти, да се фокусираме на ова во Скопје и посебно на „Охрид Колинг“ кој оваа година ќе трае пет дена. „Охрид колинг“ е на ниво на Европа и не е ништо помалку од Егзит. Наредната година ќе биде изборна година во Македонија, а ние сме таква држава во која за да се случи стадионски концерт мора државата и градот претежно да пружат одредена логистика во целата таа приказна. Јас не знам дали ние можеме 30 камиони да паркираме пред Градски стадион за таа опрема да се растури. Но нема да се откажам од идејата, ќе се случи“, вели Бобан.
Македонски артисти оваа година нема на „Скопје колинг“, но како што рече Милошоски тоа е затоа што од планирани две вечери за „Скопје колинг“ поради резервацијата на артистите морало да се одржи во една вечер.
„Беше замислено фестивалот да биде поделен во два дена, сите овие изведувачи букирани и требаше да има уште еден регионален изведувач и два – три македонски изведувачи. Се случи да не може тројца од изведувачите да се поделат во два дена, и кога одлучивме фестивалот да биде во еден ден, навистина немаше каде да сместат.
„Скопје колинг“ ќе се одржи на 7. Јули на стадионот АРМ во Градски парк. Влезниците се во продажба онлајн на ticketx.mk и ширум продажната мрежа на Авалон низ Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
ЈОУ Библиотека „Гоце Делчев“ – Гевгелија распишува награден конкурс за книжевни творби инспирирани од творештвото на Франц Кафка
По повод 100 години од физичкото заминување на Франц Кафка (1883-1924), еден од највлијателните европски и светски писатели на 20-от век, ЈОУ Библиотека „Гоце Делчев“ – Гевгелија распишува награден конкурс за книжевни творби.
Делата, напишани на македонски јазик, може да бидат во вид на расказ или есеј, а секој автор може да учествува со една творба на слободна тема, инспирирана од книжевните дела и/или животот на Кафка.
Максимална должина на секоја од испратените творби е 5 000 зборови.
Творбите да се потпишат со шифра, а на посебен лист да се пополни пријава за учество на конкурсот со следниве податоци: шифра, име и презиме, наслов на испратено дело, телефонски број, e-mail адреса и адреса на живеење.
Пријавите за литературниот конкурс да се испратат на е-адресата на ЈОУ Библиотека „Гоце Делчев“ – Гевгелија: [email protected], најдоцна до 25-ти мај 2024 година.
По завршувањето на конкурсот, ќе бидат доделени парични награди за трите најдобри творби.
Конкурсот е без возрасни ограничувања за авторите или авторките.
Секоја непотпишана и нецелосна пријава на конкурсот нема да биде разгледана од страна на жири-комисијата, се наведува во соопштението.
Култура
Музичкиот ансамбл во Република Северна Македонија – Тетово добива простории за работа на трајно користење
Владата на Република Северна Македонија донесе Одлука со којашто на Националната установа Музички ансамбл во Република Северна Македонија – Тетово, му се даваат на трајно користење, без надомест, простории кои се наоѓаат на улица „Тетово” б.б, Тетово, сопственост на Република Северна Македонија.
Задолжение да се реши просторното сместување на Н.У. Галерија Гостивар, формирана со одлука на Владата
Во врска со сместувањето на Н.У. Галерија Гостивар, формирана со одлука на Владата на Република Северна Македонија, по насока на претседателот на Владата, задолжено е Министерството за култура да ја разгледа постојната документација, испратена од Н.У. Галерија Гостивар до Владата и да излезе со предлог решение во врска со нејзиното трајно сместување.
Култура
Заокружена серијата мурали што го отворија 19. издание на АКТО-фестивалот за современи уметности
Серијата мурали во државата – акцијата со која и официјално се отвори најновото 19-то издание на АКТО-фестивалот за современи уметности, во организација на здружението Факултет на работи што не се учат – ФРУ од Скопје, е заокружена со последните два мурала во Кичево и Скопје.
Во центарот на кичевската чаршија, на Националната установа Центар за култура „Кочо Рацин“, на надворешната и на предната фасада е реализиран мурал од уметницата Ивана Самандова, во соработка со уметниците Александар Џинго и Методиј Исков. Идејата зад муралот е да поттикне размислување за потребата за соработување меѓу луѓето, особено во полето на уметничките и креативните контексти/дејности.
Во соработка со ФРУ – Скопје идејата за овој мурал е делумно инспирирана од релјефот на Јордан Грабулоски, македонски академски вајар и уметник, кој го има изработено на спомен-костурницата во Кичево. Од истиот тој релјеф композициски се презема инспирацијата да се преобрази во еден поинаков контекст преку кој се нагласува хармонична соработка помеѓу луѓето (во сооднос со самата порака), но и ја доловува функцијата на домот на култура – како простор каде што се негуваат културата и уметноста иницирани од индивидуалци и групи. Кога заедно би создавале и негувале услови во кои сите би се чувствувале поддржани едни меѓу други, преку заедничката соработка би се развила и здрава потреба за творештво во заедница во која едни со други, меѓугенерациски, си помагаме и го потхрануваме нашиот заеднички и индивидуален развој.
Муралот, кој се реализира во март во Скопје, на зградата што се наоѓа на булеварот Митрополит Теодосиј Гологанов, побуди позитивни чувства и кај соседните згради, така што резултира со уште една иницијатива за реализација на мурал како вид завршно заокружување на целиот проект и подарок кон станарите. Поткрепени со ентузијазмот на станарите во зградата и поддршка од ФРУ, уметницата Ивана Самандова во соработка со Ана Трајковска и Доротеј Нешовски реализира мурал на зградата бр. 37. На овој мурал е поставен цитат од Бертхолт Брехт, кој вели: „Наместо само да бидете слободни, создадете услови што ги ослободуваат сите!“ Со овој мурал фокусот е пренасочен на визуелни елементи со деца како симболика на реална слобода, особено во аспекти на однесување, изразување и размислување.
Преземајќи го извадокот од песната за солидарност од авторот Бертхолт Брехт, идејата е да се воспостави траен повик дека со поддршката, разбирањето и постапките на заедницата може да се создадат иницијативи и услови што ја ослободуваат истата заедница од повеќето форми на опресија и рестрикција водејќи кон поздрава и поволна состојба на живеење критикувајќи го строгиот и наметнат индивидуализам.
Серијата мурали (во Скопје, Прилеп и во Кичево), од кои два се во соработка со две јавни културни институции и уште два со две заедници по нивно барање, се темелат на концептите за солидарност, правдина, соработка и слобода, со надеж дека долго време ќе останат визуелен потсетник за неопходноста на борбата за да дојдеме до нив – со силата на заедништвото.