Македонската филхармонија, под диригентската палка на Џијан Емин и американскиот диџеј Хуан Аткинс, ќе го направи најдоброто музичко искуство со единствен и несекојдневен спој на електронска и класична музика. Овој ексклузивен настан ќе се одржи во Античкиот театар во Охрид на 2 август од 22 часот.

Тричасовниот музички сет на револуционерот во техномузиката, диџејот Хуан Аткинс, заедно со еден од најзначајните музичари на македонската современа сцена, Џијан Емин, и мајсторството на Македонската филхармонија, преку квалитетниот звук, визуелните и ласерските форми и артистичката игра на светла и бои, ќе понуди забава со исклучително доживување за сите сетила. Во текот на истата вечер забавата ќе продолжи со афтер-сетот на диџеј Jeff Mills на плажата „Парк“.

Организатори на настанот се Izlet Music, Music Incubator, Balance, Sektor 909, поддржани од музичката платформа NEULAND.

„Создадовме настан што ќе биде вистинско уживање за публиката, несекојдневно и досега единствено искуство кај нас. Спојот на електронската и класичната музика е само основата од која ќе произлезе мултисензорно доживување и мултимедијален настан што долго ќе се памети. Ние сме веќе подготвени за забавата што ќе ги раздвижи сите сетила и ќе доведе до едно ново доживување преку квалитетен звук, визуелни форми и несекојдневни искуства“, изјави Огнен Узуновски – Оги на денешната прес-конференција.

За џинот на Македонската филхармонија, маестро Џијан Емин, соработката со светски реномираниот диџеј Хуан Аткинс не е новитет.

„Досегашната соработка што ја имаме со Хуан Аткинс ветува дека ќе направиме вистински музичкиот спектакл. Ова ќе биде нов начин да се доживее и почувствува музиката и нејзината моќ. Направивме спој на неколку медиуми за пренесување емоции и токму тоа за присутните ќе значи мултисензорно доживување. За мене и за колегите од Македонската филхармонија, тоа е предизвик, но исто така и чест што учествуваме во создавањето ваков исклучителен и уникатен настан за кој македонската публика долго време копнее. Ќе биде искуство што не треба да се пропушти“, изјави диригентот Џијан Емин.

Како главна сензација на ова необично музичко шоу се издвојува оркестарот на Македонската филхармонија.

„Македонска филхармонија досега многупати ја покажала својата виртуозност во секој музички израз, па оттука и учеството во овој настан за нас е уште една потврда за подготвеноста да следиме нови трендови во концертната уметност и со тоа создадеме ново музичко искуство за граѓаните. Создадовме дело што оди ниво погоре во концертната класична музика и момент за препуштање на естетиката, каде што музиката ќе може непосредно да се види, чуе и доживее“, изјави Виктор Илиески, директор на Македонската филхармонија.

Светски познатиот креатор на електронската музика, диџејот Хуан Аткинс, ќе овозможи класичната музика да добие една поинаква димензија поддржана од електронски призвук.

„Создавањето разни музички изрази е главниот предизвик што постојано ме движи во нови димензии и ми помага да го разбудам чувството на слобода и адреналин кај публиката. Токму такво искуство, заедно со мојот пријател и соработник, маестралниот Џијан Емин и оркестарот на Македонската филхармонија, ќе овозможам на овој настан. Особено ме радува фактот што македонската публика знае да го препознае и доживее квалитетниот музички звук. Ослободување од секојдневниот стрес и владеење на најубавите емоции, музичка адреналинска еуфорија и доживување на перформансот преку аудиовизуелни ефекти е она што ќе може да го искусат љубителите на несекојдневни музички спектакли“, изјави диџеј Хуан Аткинс.

Настанот е поддржан од Neuland, мултисензорната платформа посветена да создава необични музички и уметнички искуства и со тоа ќе биде редефинирање на начините за уживање во секој музички израз и изведба.