Вечерва на Скопско лето ќе се одржи концерт на Младинскиот светски џез-оркестар на чело со светски познатиот Луис Бонила со почеток во 22 часотво Младинскиот културен центар – кино „Фросина“. Концертот е во соработка со Музичката младина на Македонија.

Младинскиот светски џез-оркестар е првиот интернационален младински џез-оркестар во светот, составен од 18 млади професионални џез-музичари избрани преку отворени глобални аудиции. Бендот работи со најдобри диригенти, уметници и композитори во светот и годишно оди на турнеја појавувајќи се на престижни европски места и џез-фестивали. Во јули 2018 година овој оркестар ќе ја донесе глобалната иднина на џез-музиката на Балканот со својата 7. европска турнеја. Млади музичари претставувајќи 12 земји и 6 континенти ќе одат на турнеја низ Македонија, Бугарија, Хрватска и Словенија, водени од меѓународно признатиот тромбонист, композитор и едукатор од САД, Луис Бонила. Младинскиот светски џез-оркестар има работено со познати интернационални џез-артисти, како Гонзало Рубалкаба, Џон Рајли, Хектор Мартигнон, Карлхајнц Монтро и Сиги Фигл. Има настапи на масовни концерти и џез-фестивали, вклучувајќи ги Монтро џез-фестивалот, џез-фестивалот „Северно Море“ и „Уникредит павилјонот“ на Милано. Овој оркестар е формиран во 2012 година од „ЈМ интернешнл“, мрежа од невладини организации за музика за млади која работи за да направи разлика во музиката преку сите граници. Младинскиот џез-оркестар продолжува да просперира под менторството на Луис Бонила, кој се враќа за својата четврта сезона како уметнички директор.

Исто така, вечерва ќе се одржи изложба на фотографии „Три автори“ со почеток во 20.30 часот во „НЛБ галеријата“. Куратор е Александар Кондев, а автори се Мирослав Марина, Кирил Михаилов и Мимоза Чолак.

Мирослав Марина дипломирал на Архитектонскиот факултет во Скопје и како архитект и дизајнер со години работеше во „Скопски саем“… Фотографијата како медиум го заинтересирала уште во студентските денови, но работата на дизајнот малку го оддалечила од фотографирањето. Фотографијата останала како дел од секојдневниот работен ангажман во „Скопски саем“, а подоцна и во винарницата „Фонко“ во Скопје. По пензионирањето, тој повторно ѝ се враќа на фотографијата и целосно го преокупира „човекот во неговиот амбиент“, како и пејзажот на кој му приоѓа со страст на еден сликар. Секако, потребата од визуелниот исказ го принудува и да слика, па сликарството во неговото дело се надополнува со фотографијата влијаејќи меѓусебно една на друга.

Кирил Михаилов, дипломиран архитект, кој целиот работен век го посвети на архитектонското обликување на брендот АМСМ и зад себе остави проекти и изведби на цела низа објекти во Македонија, но и две забележителни монографии за автомобилизмот во Македонија, како и повеќе изложби и јавни манифестации на оваа тема. Малку е познато дека овој архитект е активен учесник како во спортот така и во културата. Заедно со својот брат Томе Михајлоски е основач на Нуркачкиот сојуз на Македонија и тие ги удрија темелите на спортското нуркање кај нас. Уште во седумдесеттите години во рамките на овој спорт снимаше подводни фотографии како од Охридското Езеро така и од морињата, каде што спортски нуркаа и се натпреваруваа. Со пензионирањето доби време и можност комплетно да се посвети на предизвикот што го дава фотографијата. Своите фотографии ги споделува со сограѓаните на „Фејсбук“ и „Твитер“. На изложбата ќе ни се претстави со фотографии од спортскиот автомобилизам кај нас, како и со урбани фотографии од Скопје.

Мимоза Чолак е дипломиран економист, која целиот работен век го поминува во струката. По пензионирањето, ја открива фотографијата како простор во кој може да ги изрази своите естески и културни експресии на светот околу себе. Фотографијата за неа е постојана преокупација и таа ја создава на себе својствен начин, со внимателно забележени детали облагородени со емоции кои се така какрактеристични за женскиот свет. Иако, таа самата тоа го негира, факт е, дека жените кај нас/а и во светот/сè повеќе се определуваат за творечка фотографија и ако внимателно ги гледаме тие фотографии, во многу нешта тие се разликуваат од „машката“ фотографија. Тие фотографии се полни со внатрешни емоции, помирни и посуптилни, посветени на детаљот и расказот. Кај Мимоза Чолак ќе ги видиме нејзините три циклуси „Цвеќе и аранжмани“, „Луѓе“ и „Природа“.