Култура
Музичка убавина и префинето мајсторство на уметниците Јосифоска и Џермановиќ

Со духовна грациозност и нагласен виртуозитет се огласија вчеравечер на „Охридско лето“ младите уметници од Србија, виолончелистката Ирена Јосиофоска и пијанистот Александар Џермановиќ.
Публиката уживаше во маестралната изведба на Сонатата во Це-дур за виолончело и пијано од Бетовен, во Фантастичните пиеси на Роберт Шуман, во Сонатата за виолончело и пијано од Сергеј Рахмањинов, како и во композицијата „Le grand Tango“ од Астор Пјацола.
Подиумот во црквата „Света Софија“ зрачеше од музичката убавина што ја приредија двајцата млади уметници со префинето мајсторство врз своите инструменти.
Ирена Јосифоска е една од најперспективните виолончелистки на нејзината генерација. Таа е победничка и освојува награди на повеќе национални и меѓународни натпревари.
„Првпат свирам во Македонија што е многу чудно зашто сум настапувала насекаде во светот, во Европа и во САД, а згора на тоа сум и половина Македонка. Но фестивалот „Охридско лето“ го следам уште од рана возраст. Доаѓајќи на одмор во Охрид имав можност да ги следам моите идоли и навистина е голема честа да настапам на концертниот подиум каде што свиреле и тие“, рече младата виолончелистка Јосифоска.
Младиот професор и пијанистички виртуоз, Александар Џермановиќ, е професор на Академијата за уметности во Нови Сад. Добитник е на бројни награди за пијано и камерна музика.
„Со Александар се знаеме од мали нозе, но не настапуваме често заедно. Досега сме одржале само три концерти и тоа на Балканот. Секогаш кога треба да се настапи на овие простори, секогаш се присетувам првин на него“, додаде Јосифоска која по учеството на „Охридско лето“ ја очекува настап на фестивал во Полска.
Репертоарот на класична музика на 62-то „Охридско лето“ продолжува утревечер со Музички времеплов на српските уметници Андрија Минчиќ на кларинет и Тадија Минчиќ на фагот во соработка со пијанистот Никола Цветковиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Македонскиот народен театар вечерва ја изведува „Народен пратеник“ во Народно позориште – Белград

129 години по праизведбата на „Народен пратеник“ и 101 година од неговото прво печатено издание, „Народен пратеник“ на Македонски народен театар вечерва игра во Народно позориште – Белград.
Оваа прва комедија на Бранислав Нушиќ, во изведба на моќна актерска екипа и режисерски конципирана од страна на Егон Савин, по впечатливата и одлично забележана изведба на реномираниот фестивал и добиената специјална награда за колективна актерска игра од „Стериино позорје“ – вечерва во 20:30 часот игра на сцената „Раша Плаовиќ“.
Силните впечатоци и импресиите што ги сподели новосадската публика и критиката за двете изведби се патоказ и очекување тоа да се доживее и по оваа изведба.
Култура
Историски ден за МНТ: триумф на ансамблот во „Народен пратеник“

3 јуни 2025 – ден што со особена чест ќе биде запишан во поновата историја на Македонскиот народен театар.
Наградата што секој актер и ансамбл ја посакуваат – Специјалната Стериина награда за колективна актерска игра – му припадна на ансамблот на претставата „Народен пратеник“ од Бранислав Нушиќ, во режија на Егон Савин, а во продукција на Македонскиот народен театар – Скопје.
Ова е награда што ја слави и ја велича не само актерската вештина туку и сплотеноста што се раѓа на сцената – заедништвото во процесот на создавање, како и силата на колективната енергија што живее низ целото траење на претставата.
Александар Микиќ, Дарја Ризова, Тони Михајловски, Јордан Симонов, Тања Кочовска, Александар Михајловски (со снимен глас), народот: Дејан Стамчевски, Синан Ракип, Скендер Бериша, Зекирија Алим, Мирослав Атанасовски, Мартин Китановски и Хусеин Халили, како и целиот тим зад сцената – го заслуживте ова признание!
ПР
Култура
Премиера на балетот „Госпоѓа Бовари“ – одбележување 25 години уметничка дејност на примабалерината Марија Кичевска-Шокаровска

На 25 јуни 2025 година со почеток во 20.00 часот на големата сцена на Националната опера и балет, ќе се одржи премиерата на новата балетска продукција „Госпоѓа Бовари“, инспирирана од безвременскиот роман на Густав Флобер. Ова сценско остварување е посветено на јубилејот од 25 години уметничка дејност на примабалерината, Марија Кичевска Шокаровска која со својата енергија, емоција и посветеност остави длабок белег во историјата на македонскиот балет.
Ова балетско дело, поставено во два чина ја раскажува драмата на женската душа, копнежот по страст, слобода и трагичниот судир со општествените норми.
Диригент е Едуард Амбарцумјан од Ерменија, кореографијата ја потпишува Виктор Ишчук од Украина, кој со прецизност и современ израз го доловува духот на 19 век, додека музичката подлога е составена од дела на К. Сен-Санс, М. Равел, Ж. Масне, Ф. Менделсон и Г. Ф. Хендл, сценографијата и костимографијата се на Андреј Злобин и Гана Ипатиева од Украина, светло дизајн, Милчо Александров, а концерт-мајстор е Јане Бакевски.
Особено значајно е што оваа премиера е посветена на Марија Кичевска Шокаровска, која со својата уметничка кариера остави неизбришлив печат во историјата на македонскиот балет.Таа ќе ја толкува главната улога на Ема Бовари, во останатите улоги ќе настапат, Франциско Хименез Руиз (Шарл Бовари), Балаж Лочеи (Рудолф Буланже), Дмитро Чеботар (Трговецот Лере) и Ендру Кук (Доктор Оме) заедно со солистите, балетскиот ансамбл и оркестарот на Националната опера и балет.
Билетите се пуштени во продажба, онлајн и на билетарницата на МОБ.