Култура
Националниот џез оркестар со уште едно музичко патување во Битола

Националниот џез оркестар ве води на уште едно музичко патување, овој пат во Битола. Полека ја заокружуваме летната сезона со уште еден концерт на Оркестарот кој овој пат за свој гостин ќе го има Мартин Ѓаконовски – Шпато.
A Letter to Ray е насловот на концертот кој ќе се одржи на 5 септември, на локацијата позната под името Пацио, Музеј Битола, со почеток од 20:30 часот, а диригент на концертот ќе биде Џијан Емин.
Мартин Ѓаконовски e македонски контрабасист и композитор кој живее во Германија и се смета за еден од најистакнатите џез-уметници во Европа.
Ѓаконовски потекнува од музичко семејство; неговата мајка била џез-пејачка, а неговиот татко, Драган Ѓаконовски-Шпато, е истакнат македонски композитор, диригент и музички аранжер, основоположник на Биг Бендот на Радио Скопје.
Мартин Ѓаконовски од своја шестгодишна возраст учи виолина за на 14 години да се пренасочи кон контрабасот, по што наскоро формира свој бенд, триото Шпато.
Во 1991 година ги започнува студиите на музичкиот универзитет во Келн. Соработува со групите на Пол Кун, Лин Ариале, Оливија Трамер, Пол Шигихара, Никола Симион, Бојан З, Андерс Берг Кранц, Омер Клајн и Биг-бендот од Франкфурт. Со музичари како Роман Швалер, Енди Мидлтон, Тони Лакатош и Чарли Маријано, настапува на најголемите европски фестивали, меѓу кои фестивалите во Загреб, Брисел, Билбао, Краков и Леверкузен. Соработува на албуми со Хуго Рид и Томас Кремер, во џез триото во Франкфурт, и Маркус Бургерс во рамки на Септер Бурбон.
Има соработувано и снимено повеќе од осумдесет ЦД-а на џез и светска музика, меѓу другите со Душко Гојкович, Пол Кун, Николас Симион, Антонио Фарао / Боб Берг, Мајкл Сагмајстер, Анке Хелфрич, Торстен Гудс, Ференц Снетбергер, Дејан Терзиќ, Европско собрание, Клаудиус Валк трио, Ратко Зјача / Симоне Занчини / Адам Нусбаум.
Концертот со наслов A Letter to Ray е еден вид посвета на еден од највиртуозните контрабасисти на сите времиња и “писмо со благодарност” за неговата трага врз џез музиката. Реј Браун е еден од најпопуларните и најплодните музичари во џез музиката чија умешност и богат звук го става на врвот на листата највлијателни џез музичари, повеќе од 50 години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Претставата „Едмонд“ денес премиерно во Битолски театар

Претставата „Едмонд“ според текстот на Дејвид Мемет, а во режија на Оливер Мицевски, денес премиерно ќе биде одиграна на големата сцена на Битолскиот народен театар. Се работи за петта по ред премиера за оваа година. Директорот Васко Мавровски вели дека во периодот септември 2024 / јуни 2025, е постигнат е апсолутен рекорд на премиерно изведени претстави, 12, а следи и премиерата на “Рибарски караници” која ќе се одигра на 25.07.
„Во овој период одиграни се 129 претстави, или на секои 2.5 дена се изведувала по една претстава. Во салите на НТБ, не посетиле 25.141 гледач, или во просек сме имале по 194 гледачи по претстава“, рече директорот Мавровски.
„ Јас сум радосен што работам овде, бидејќи не сум работел во земјава од 2011, и е убаво да се работи на својот јазик. Ние имавме многу убави осум недели работа и веруваме дека завршивме одлична работа. Беше задоволство да се работи со талентираниот ансамбл на Народен Театар Битола, предводен од Огнен Дранговски, еден од најдобрите актери во Македонија и Балканот. Верувам дека ЕДМОНД ќе стане значајна точка во несомнено богатата историја на Народен Театар Битола“, рече режисерот Оливер Мицевски.
Претставата го следи вртоглавото / спирално патување на бизнисменот Едмонд Бурк и неговите кошмарни 48 часа во њујоршкото подземје, каде што барајќи возбуда и среќа, од баналноста на неговата канцеларија и монотон семеен живот завршува како убиец и подоцна како затвореник, најверојатно осуден на доживотен затвор. Богат со многу параболи, референци на Хамлет и Библијата, прошаран со несекојдневно брутален јазик и агресивни сцени, главното прашање коешто Едмонд го отвора е прашањето на слободата. Што е слободата всушност? Дали потрагата по слобода прави всушност, незабележително да станеме робови на својата (потрага по) слобода. Дали откажувањето / лимитирањето на своите желби го олеснува патот кон слободата? Не случајно, мотото на Едмонд е : “Внимавај што посакуваш.”
Покрај Дранговски во претставата играат Валентина Грамосли, Соња Михајлова, Марјан Георгиевски, Ана Грамосли, Борче Ѓаковски, Александар Стефановски, Филип Мирчевски, Викторија Степановска-Јанкуловска и Маја Андоновска-Илијевски. Сценографијата е на Валентин Светозарев, костимографијата на Благој Мицевски, а музиката на Марјан Неќак.
Култура
Скопско лето: В понеделник џез концерт на Ѓорги Шаревски трио во Сули ан

Дирекцијата за култура и уметност на Скопје в понеделник повикува на џез концерт на Ѓорги Шаревски трио во Сули ан со почеток во 20.30 часот. Покрај Шаревски, ќе учествуваат и Акира Накамура од Окинава, Јапонија на тапани и Оливер Јосифовски на контрабас.
„Извонредна интеркултурна соработка, каде што триото на Георги Шаревски се обединува со еминентниот јапонски тапанар Акира Накамура за динамичен настап што умешно ја обединува источната прецизност со европската џез естетика.Предводено од македонскиот гитарист и композитор Георги Шаревски, фокусот на ова посебно трио се автентични авторски композиции, прецизна меѓусебна комуникација и соврмени хармонски структури. Со приклучувањето на Накамура и неговиот изразен ритмички јазик и смела импровизациска визија, овој исклучителен настап претставува возбудливо музичко патување исполнето со спонтаност, експлозивна енергија и бесконечен грув“, велат од Дирекцијата за култура и уметност.
Публиката ќе има можност да слушне внимателно избрана програма составена од авторски композиции, кои ги прошируваат хоризонтите на современиот џез израз.
Култура
Џез концерт на 30 јуни – Георги Шарески Трио во Сули ан

Во рамки на програмата на Скопско лето на 30 јуни (понеделник) во 20:30 часот во Сули ан (Стара Чаршија) ќе се одржи концерт на Георги Шарески Трио.
Организаторите велат дека овој концерт претставува извонредна интеркултурна музичка соработка, каде што триото на македонскиот гитарист и композитор Георги Шарески се обединува со врвниот јапонски тапанар Акира Накамура, како и со истакнатиот контрабасист Оливер Јосифовски. Настапот нуди динамична комбинација на автентични авторски композиции, ритмичка прецизност, импровизација и бесконечен џез грув.
Програмата опфаќа внимателно избрани композиции кои ја истражуваат границата помеѓу современиот џез и традиционалната музика, исполнета со енергија, спонтаност и иновативност. Ова е прво гостување на Акира Накамура во Македонија – музичар со светска кариера, кој има соработувано со имиња како Хироми Уехара, David Fiuczynski и BIGYUKI.
Билетите се продаваат по цена од 400 денари, и можат да се набават на влезот од Сули ан, на денот на настанот и онлајн преку платформата Купи карти: https://www.karti.com.mk/skopsko-leto.nspx.