Книги
Објавена книгата „По трагите на древните цивилизации“ на Искра Тасевска Хаџи-Бошкова

Друштвото за издавачка дејност „Македоника литера“ од Скопје неодамна ја објави книгата на Искра Тасевска Хаџи-Бошкова – „По трагите на древните цивилизации“, во која се синтетизирани разновидните проучувања, кои се однесуваат на најдревните културни традиции, писма и литератури.
„Книгата овозможува детален увид во специфичностите на одделните цивилизации, а особено на древните литератури кои им припаѓаат на тие цивилизации. Во неа се опфатени месопотамската, египетската, индиската и хеленската цивилизација. Особено се обработени најрепрезентативните книжевни дела кои им припаѓаат на тие цивилизации“, велат издавачите.
Во рецензијата на проф. д-р Венко Андоновски, која е објавена како поговор, пишува дека книгата на Тасевска Хаџи-Бошкова е идеална хармонија на два пристапа: енциклопедискиот (кој подразбира акумулација и систематизација на научно проверени податоци, синхрониски и дијахрониски) и херменевтичкиот (интерпретација, односно толкување на книжевниот текст)“.
„Тасевска Хаџи-Бошкова овде направила научен подвиг… Импресионираат нејзините познавања од десетици научни дисциплини, кои се нужни за да се говори за првите цивилизациски жаришта. Археологија, историја на писмата, религија, филозофија, антропологија, етнологија, митологија – сè е тука, во оваа книга, уредно систематизирано и подредено во систем кој се помни. Ова е книга по чие читање многу малку нешта се забораваат зашто се подредени во мнемотехнички систем на идеален учебник. Од друга страна, интерпретациите се доближуваат до идеална книга на херменевтички аналогии, асоцијации и метафори. И уште – во книгата на еден сосема дискретен и речиси невидлив начин се применети сите современи филолошки методологии на проучување на книжевниот текст, од наратологијата до семиотиката, од структурализмот до деконструкцијата, од иманентниот close reading-метод до теоријата на рецепцијата и проучувањето на улогата на читателот. Тасевска Хаџи-Бошкова се служи со методолошки симултанизам и синестетичност на научните парадигми за да може да исцеди што повеќе значења од овие не само полисемични, туку и поликултурни први книжевни текстови“, пишува Андоновски за книгата на Искра Тасевска Хаџи-Бошкова.
Искра Тасевска Хаџи-Бошкова е доктор на филолошки науки и работи како доцент на катедрата за македонска книжевност и јужнословенски книжевности при Филолошкиот факултет „Блаже Конески“ во Скопје. Има објавено педесетина научни трудови од областа на науката за книжевноста, македонската книжевност и културологијата во еминентни научни списанија и публикации (во земјата и странство), како и една стручна монографија, посветена на Бахтиновата теориска парадигма (Бахтин и стилското разногласие во македонската литература, „Македоника литера“, 2015).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Книги
Промоција на книгите „Историја на човештвото“ од Џани Родари и „Визуализација на современата македонска книжевност“ од група автори

На 29 април во 18 часот во Студентскиот културен центар ќе се одржи промоција на книгите „Историја на човештвото“ од Џани Родари и „Визуализација на современата македонска книжевност“ од група автори.
Двете изданија се резултат на соработката меѓу студентите и наставниот и соработничкиот кадар од Факултетот за ликовни уметности, Филолошкиот факултет „Блаже Конески“ и Машинскиот факултет при Универзитетот „Св. Кирил и Методиј“ во Скопје.
Издавањето на книгите е поддржано од Инситутот „Данте Алигиери“ во Скопје, Здружението Данте Алигиери во Рим и Министерството за култура и туризам.
Книги
Книгата „Мајсторот“ од Димитар Башевски објавена во Софија

Во издание на издавачката куќа „Изида“ од Софија, деновиве е објавена книгата раскази мајсторот од Димитар Башевски. Тоа е трета книга од Башевски објавена во Бугарија. Претходно објавени се неговите романи „Бунар“ и „Круг“. Преводот на книгата „Мајсторот“ од македонски на бугарски јазик е на Тања Попова.
Во текстот кон објавената книга се вели дека „Димитар Башевски го води читателот на книжевно патување низ длабоките слоеви на човечките емоции и вечните потраги. Со екстремна леснотија и чувство за јазични нијанси, авторот слика живописни слики на љубов, страст и копнеж кои се испреплетени со огромните прашања за смислата на животот и човечкото место во светот“.
Димитар Башевски е автор на дваесеттина книги проза и поезија. Добитник е на највисоките книжевни и општествени награди во земјата. Неговите книги се преведувани и објавувани на повеќе европски јазици.
Книги
МАИ ги додели наградите за изданијата меѓу два Саеми на книга

Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).