концерти
Одржана вечер на ЕУ на фестивалот „Охридско лето“
Белгиско-грчкото дуо составено од виолинистот Ное Инуи и пијанистот Василис Варваресос синоќа во црквата „Света Софија“ оставија силни импресии кај публиката на фестивалот „Охридско лето“ настапувајќи во рамките на традиционалната Вечер на Европската Унија.
И годинава продолжи практиката концертот на оваа вечер да го одржат најдобрите уметници од земјите на ЕУ.
Меѓу присутните во публиката беше и амбасадорот на Европската Унија во Република Северна Македонија, Самуел Жбогар, кој рече дека Вечерта на ЕУ е посебно доживување на фестивалот „Охридско лето“.
„Многу сме среќни што сме дел од овој прекрасен фестивал, ви посакувам најискрени честитки за 60-годишнината и за долгата традиција. Досега на Вечерта на Европската Унија имаме донесено многу уметници и секоја година сум пресреќен кога присуствувам на овој настан. Ова беше навистина прекрасна вечер и мислам дека сите уживавме во неа. Се надеваме дека заеднички ќе продолжиме и во иднина“, изјави евроамбасадорот Жбогар, кој го проследи концертот заедно со неговиот колега, амбасадорот на Франција во земјава, Кристијан Тимоние, како и со градоначалникот на општина Охрид, Константин Георгиески.
Уметниците на подиумот во катедралната црква „Света Софија“ ноќта што долго ќе се памети ја започнаа со маестрална изведба на Бетовеновата Соната за виолина бр.7, продолжија со импресивна изведба на Свитата од музиката за Шекспировата драма „Многу врева за ништо“ од Корнголд, а завршија со преубавата Соната за виолина и пијано од Франк.
„Прекрасно е, црквата е преубава и има неверојатна акустика, градот е прекрасен. И иако е многу тешка ситуацијата со Ковид-19, сепак, вечерва имаше многу позитивна енергија на концертот. Прекрасно си поминавме, а верувам и публиката“, изјави грчкиот пијанист Василис Варваресос.
„Луѓето кои беа присутни на концертот многу уживаа и беа максимално инволвирани и е нешто што многу ме радува. Енергијата беше многу силна“, се надоврза белгискиот виолинист Ное Инуи.
Инаку, двајцата уметници кои со своето музицирање ја збогатија програмата на „Охридско лето“ често настапуваат заедно. Ное Инуи свири на виолина изработена од Томазо Балестриери во 1764 година. Студира на конзерваториумите во Брисел, Париз, Карлсруе и Дизелдорф, што му овозможува да ги запознае различните виолински „школи“- француско-белгиската, германската и руската преку дидактичките стилови на педагозите Галамијан и Столјарски. Василис Варваресос дипломира, магистрира и докторира на престижната школа за музика „Џулијард“ во Њујорк. Неодамна кон неговите академски титули ја придодава и дипломата уметник изведувач од Конзерваториумот за музика и танц во Париз. Неговиот последен албум „В за Валс“ е посветен на познатите дела инспирирани од танцот од Лист, Скрјабин, Шуман и Равел, а неодамна за издавачката куќа „Навис класикс“ сними аудиозаписи со виолинистот Ное Инуи и баритонот Димитрис Тилиакос.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
концерти
„Медитеранска магија“: Концерт за две пијана и четирирачно пијано на дуото Аврамовска–Мариновски
Во Салон 19 19, на 26 ноември 2025 година со почеток во 19:19 часот, ќе се одржи концертот „Медитеранска магија“ — музичка вечер посветена на јужниот медитерански дух, во изведба на дуото Аврамовска–Мариновски. Наратор на концертот ќе биде Мимоза Рајл.
Публиката ќе има можност да доживее ретко музичко патување исполнето со сончеви ритми, страст и виртуозност. На програмата се дела од италијански, француски и шпански автори, како и премиерни изведби и специјално подготвени аранжмани.
Програма:
Жорж Бизе – Свита „Арлезијанка“ бр. 2
Жорж Бизе – Свита „Арлезијанка“ бр. 1
Ернесто де Куртис – Non ti scordar di me (солист: Илија Белистојановски)
Rodolfo Falvo – Dicitebcelli (солист: Илија Белистојановски)
Г. Росини – Увертира „Крадливата страчка“
Исаак Албениз – Rapsodia Española
Дуото, активно веќе девет години, има бројни настапи во Македонија и во странство — меѓу кои Турција, Бугарија и САД. Нивната работа е посветена на спојот меѓу македонската традиција и современиот музички израз, со концертни програми што ја освојуваат публиката со емоција и уметничка длабочина.
„Медитеранска магија“ ветува вечер исполнета со топлина, енергија и дух на јужниот Медитеран — музика која ги надминува границите и допира директно до публиката.
концерти
Почна фестивалот „Виноскоп 2023“
Со настапи на Стефан Петановски, Пајак, „Офчестра“, „Брас брадрс“ и „Фолтин“ вчера беше отворен фестивалот „Виноксоп“, кој веќе тринаесет години по ред ја промовира македонската винска култура.
![]()
Со учество на над 40 винарници и гурмански катчиња фестивалот продолжува до сабота, а денеска концертни настапи ќе имаат „Баклава“, Нино Величковски, Сале Певац, Дани Димитровска и „Куку леле’.
![]()
Програмата почнува во 17 ч со „афтер ворк“ забава, а до 19 ч на секои две купени вина, посетителите ќе добијат едно гратис.
концерти
Петтото издание на музичкиот фестивал „Андерфест“ Скопје
Музичкиот фестивал „Андерфест“ ќе се одржи петти пат на 13 октомври во Младинскиот културен центар (МКЦ).
На овој јубилеј публиката ќе може да ужива во музиката од алтернативната, рок, панк-рок, метал, хардкор-сцената од нашата држава, која ќе покаже дека е одлична и има што да понуди.
Од најавените бендови, сите ѝ се одлично познати на македонската публика. Се работи за актуелни музички имиња за кои организаторите очекуваат многу публика и ветуваат забава.
На „Андерфест 5“ ќе настапат: Преку ред, Ред 18, Конспираси, Луфтанза, Пич Ваис и Последен удар.
Продажбата на билети за концертот e почната и можете да ги набавите преку следниот линк.

