Култура
Охридско лето: Интегритетот и прифаќањето на разликите се најважни, им порача куклата Тоби на најмладите

Со голема фантазија, но и длабока етичка порака, ансамблот на Театарот за деца и младинци вчеравечер ги возбуди најмладите посетители на фестивалот Охридско лето. Поради нагласениот интерес, претствата „Тоби“ од Флоријан Зденек во режија на Драгослав Тодоровиќ се одигра на големата сцена во Домот на културата и беше досега еден од најуспешните настани на фестивалот. Одличен чекор да се регрутира публика кај новите генерации, но истовремено да се наметне еден естетски норматив кај децата.
Најдобро е да бидеш тоа што си, без да се китиш со туѓи перја, им порача претставата „Тоби“ а актерите професионално и со посебна енергија им дадоа живот на духовито дизајнираните кукли.
Со многу воздишки, восхит и силен аплауз, децата, но и возрасните, го следеа развојот на драмското дејство речиси претопени со сцената.
Инаку, со едноставен драмски приказ оваа претстава го следи патот што на сцената го помина кучето јазовичар Тоби, кое се срамеше од својот изглед. Воедно, тој персонифицира спознавање една голема вистина, која се однесува на себеприфаќањето, на вистинскиот приказ и на интегритетот.
Во куклената претстава се откриваа сѐ уште актуелните проблеми кај луѓето, како што се необјаснивата желба за промена на сопствениот изглед, дискриминацијата по разни основи, физички, социјални, расни, но јасна беше и пораката дека во секој случај најважно е ние самите да бидеме среќни и да бидеме прифатени со она што го носиме и со она што имаме.
Режисерот Драгослав Тодоровиќ вели дека постои нешто, особено кај младите, што изгледа како ненадминлива пречка.
„Во тие години никако не сте задоволни од сопствениот изглед. Меѓутоа, ако имате пријателка како госпоѓата Флора, вие како јазовичарот Тоби ќе се согледате од сосема друг среќен агол со помош на пријателите. И уште нешто: „Никогаш немојте да се китите со туѓите перја. Ќе испаднете смешни“, вели тој.
Директорката на НУ Охридско лето, Сузана Вренцовска, појаснува дека на фестивалските сцени и годинава пленат многуте музички и драмски претстави и изложби, но се води сметка и за најмладата публика.
„Отворајќи ја сцената на Охридско лето токму за нив, ја всадуваме уметноста во длабочината на детската душа, како и почитта кон високите уметнички дострели“, вели директорката на оваа национална установа, Вренцовска.
Програмата на фестивалот Охридско лето е некаде на половина и до крајот на идниот месец ќе понуди уште многу атрактивни содржини. Како дел од стратегијата за општествена одговорност, фестивалот традиционално е подржан и од „Македонски телеком“ АД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
„Голдберг варијациите“ на Бах во изведба на Дино Имери – утре во Виена

Македонскиот пијанист Дино Имери, еден од највпечатливите уметници на својата генерација, утре (13 јуни) ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн Центрум“ во Виена, во организација на Амбасадата на Република Северна Македонија, со поддршка од Македонско-австрискиот бизнис клуб и компанијата SSB Infrastructure-Austria.
Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. г-дин Освит Росоклија и на поддржувачите на концертот – без нив оваа реализација немаше да биде можна“, изјави „волшебникот на пијаното“ Дино Имери пред настапот.
Концертот е со слободен влез и отворен за сите љубители на класичната музика.
Култура
Фестивалот Credence Dance почнува на 16 јуни

Третото издание на фестивалот Credence Dance започнува на 16 јуни, а ќе трае до 21 јуни со програма конципирана тематски, Вечери на класичен балет и Вечери на современ танц.
Фестивалот оваа година има и дополнителна програма која ќе се состои од работилници и трибини. На програмата се фрагменти од бисерите на класичното наследство „Лебедово езеро“, „Рајмонда,“„Копелија“, „Дон Кихот“, „Силфида“ и други.
Освен тоа во делот на модерниот и современиот танц премиерно ќе бидат изведени дела на Игор Киров, Бојан Мицов, Џонс Хинг, Франциско Руиз и Јована Петровска кој кореографите наменски ги подготвија за фестивалот.
Овогодинешниот Credence Dance фестивал ќе понуди ексклузивни гости од Кина, САД, Италија, Франција, Германија, Велија Британија итн. Ова е исклучителна и ретка можност да се видат овие уметници на домашна сцена.
Во рамки на фестивалот традиционално ќе биде врачена Наградата за трајни вредности во танцовата уметност. Настанот се одржува во Националата опера и балет.
Фестивалот е поддржан од Министерството за култура и Универзитетот „Св Кирил и Методиј“, Скопје. Влезот е слободен.
Култура
Во Москва излезе „Пиреj“ од Петре М. Андреевски

Романот „Пиреj“ излезе од печат во Москва на инициjатива на Олга Панкина, познат популаризатор на македонските културни вредности во Русија. Таа го преведе уште во 2008 година, го обjави издавачката куќа „Феникс“, Скопjе. Како што обjаснува Панкина, романот на руски веднаш предизвика интерес каj публиката, но сепак книгата не можеше да допре до широк круг рускоjазични читатели. Сметаjќи го романот на основоположникот на современата македонска проза Петре М. Андреевски за ремек дело, таа си постави за задача да го преобjави во Москва.
Оваа година идеjата jа поддржа Центарот за книга „Рудомино“ со коj Олга Панкина плодно соработува веќе петнаесет години (Центарот за книга има обjавено творби на над 20 македонски автори).
Ова издание на „Пиреj“ е многу квалитетно (368 страни, тврд повез) и изгледа современо. На корицата има фрагмент од сликата „Стара куќа“ на Олга Панкина. Блескав предговор за книгата напиша Венко Андоновски, коj даде за руска читателска публика основни информации за историјата која е заднина на личната драма на едно македонско семејство од почетокот на ХХ век, семејството на Јон и Велика, jа подвлече актуелноста на романот и го нарече како најголем македонски бестселер на сите времиња.
Тукушто обjавениот роман веќе заживее своj книжевен живот – почна да стекнува читатели. Минатата недела, од 3 до 7 jуни, беше презентиран на Саемот на книга на Црвениот плоштад во Москва на штандот на издавачот Центар за книга „Рудомино“.