Оваа година проекции ќе има за студентите во Студентскиот дом „Гоце Делчев“ на 20 април, за затворениците во Казнено-поправниот дом во Шуто Оризари на 21 април и за штитениците во Домот за стари лица „Мајка Тереза“ – Скопје на 22 април.

Петтото издание на „Златна рамка“, ревија на македонски филмови во организација на Друштвото на филмските работници на Македонија (ДФРМ), ќе се одржи од 20 до 22 април во киното „Фросина“ во Младинскиот културен центар и Кинотеката на Македонија. Оваа година ќе бидат прикажани вкупно 13 филма од минатогодишната продукција, од кои три долгометражни филма, три документарни и седум краткометражни филма.

Исто како и минатата година, „Златна рамка 2023“ ќе продолжи со спроведување на социјалната програма „Фокус“, која е наменета за публиката која од разни социјални ограничувања не може да ги посети киното „Фросина“ и Кинотеката. Водејќи се од ова сознание, ДФРМ одлучи филмот да го донесе пред оние граѓани во институциите каде што се затекнати поради разни околности (пензионерски домови, затвори, болници, домови за деца, казнено-поправни домови итн.).

Филмската уметност им припаѓа на сите, без исклучок. Филмот, од самата негова појава пред речиси 130 години, сè до денес е постојан придружник на современиот човек, без разлика на неговиот материјален, образовен и социјален статус. Но, за жал, а особено на овие наши простори, постојат извесни групи граѓани кои од разни причини се социјално маргинализирани, изолирани и спречени да восприемаат филмска уметност, што во современиот свет претставува елементарно човеково право, без разлика на статусот на секој еден од нас.

Водени од мотото „Ако вие сте спречени да дојдете на филм, ние филмот ќе го донесеме кај вас“, годинашната „Златна рамка“ ќе биде одбележана со организација на проекции во рамките на установи и институции каде што живеат или престојуваат лица што не може да одат во кино, ниту да посетат филмски фестивал или друг вид настан. Овие дисперзирани проекции како дел од „Златна рамка 2023“, а поместени во рамките на социјалната програма, во иднина ќе бидат надградени со инвентивни работилници и проекции чија крајната цел е инклузивноста на маргинализираните групи на граѓани во тековите на културниот живот.

Оваа година проекции ќе има за студентите во Студентскиот дом „Гоце Делчев“ – на 20 април, за затворениците во Казнено-поправниот дом во Шуто Оризари на 21 април и за штитениците во Домот за стари лица „Мајка Тереза“ – Скопје на 22 април. В четврток (20 април), со почеток во 18 часот, во Студентскиот дом „Гоце Делчев“ ќе бидат прикажани краткометражниот филм „Бесцента“, во режија на Дејан Јованов, и долгометражниот „Мими“, режиран од Даријан Пејовски. В петок (21 април) во КПД во Шуто Оризари (почеток 18 часот) на програмата ќе бидат краткометражниот „Синиот час“ на Ана Јакимска и долгометражниот Најсреќниот човек на светот“, во режија на Теона Стругар-Митевска, а в сабота (22 април) во Домот за стари лица „Мајка Тереза“, исто така со почеток во 18 часот, ќе бидат прикажани краткометражните филмови „Си беше еднаш еден звук“, во режија на Огнен Шапковски и „Фениксот од Кавадарци – Васил Хаџиманов“, режиран од Мишо Нетков.

Друштвото на филмските работници на Македонија верува дека филмската уметност и нејзината повеќекратна семантичка димензија е благороден начин на комуникација и можност за подобрување на животот и на оние луѓе што судбината од разни причини ги ограничила во нивното движење, дејствување и желба за социјална интеграција. Оваа социјално одговорна програма е иницијатива на „Златна рамка“ и ќе се практикува и во иднина.