Култура
Покренат Меѓународен проект за литература за деца и млади

Во рамките на Институтот за наука, алтернатива, култура и уметност “ИНАКУ”– Скопје покренат е Меѓународен проект за литература за деца и млади во кој ќе бидат вклучени голем број истакнати универзитетски професори и писатели од земјава и странство.
Меѓу имињата кои ќе бидат дел од проектот се: проф.д-р Стана Смиљковиќ, проф.д-р Милутин Ѓуричковиќ, Љубивоје Ршумовиќ, проф.д-р Тихомир Петровиќ, проф.д-р Миомир Милинковиќ, проф.д-р Сунчица Дениќ, проф.д-р Мирјана Стакиќ, Зоран Пеневски, проф.д-р Виктор Радун, Снежана Алексиќ Станојловиќ од Србија, проф.д-р Вања Ангелова и Латинка Златна од Бугарија, проф.д-р Бајрузин Хајро Плањац, проф.д-р Саша Делиќ, Ранко Павловиќ, Јелена Глишиќ, Сабина Дајановиќ Салетовиќ и Тања Томиќ од Босна и Херцеговина, Фрањо Франчич, Петра Бауман и Соња Цекова Стојаноска од Словенија, Милица Бакрач, Лабуд Н. Лончар и Александра Вујисиќ од Црна Гора, м-р Татјана Милановиќ и Саво Костадиновски од Германија, Олга Лалиќ – Кровицка од Полска, м-р Жарко Милениќ од Русија, м-р Жаклина Михајлова од Австралија, Ана Багрјана од Украина, Мирослав Демак од Словачка,
Од земјава во проектот се вклучуваат голем број автори како: проф.д-р Васил Тоциновски, проф. д-р Мито Спасевски, проф.д-р Весна Мојсова Чепишевска, проф.д-р Александар Прокопиев, проф.д-р Благица Петковска, Александар Поповски, Горјан Петревски, проф.д-р Христо Петрески, доц.м-р Трајче Кацаров, проф.д-р Елизабета Бандиловска, проф.д-р Виолета Мартиновска, Виолета Танчева Златева, д-р Даниела Андоновска Трајковска, д-р Ана Петреска, д-р Милена Ристова Михајловска, д-р Лили Бошевска, проф.д-р Виолета Николовска, Билјана Станковска, м-р Огнен Неделковски, м-р Весна Бошковска, Весна Мундишевска – Велјановска, Славица Дабевска – Ќировска, м-р Ели Маказлиева, м-р Славица Урумова Марковска, Јадранка Клисарова, Лили Арсова, Филип Димкоски и други.
Веќе е распишан Конкурсот за Меѓународниот фестивал за творештво за деца и млади, кој ќе се одржи на 21 март оваа година во Скопје, а во истиот термин ќе се одржи и интернационалната онлајн трибина на тема “Литературата за деца и млади денес – тенденции, специфики и перспективи”.
Исто така, во подготовка е новиот број на меѓународното списание за книжевноста за деца Нов круг.
Наскоро ќе биде распишан и Конкурсот за наградата „Силјан Штркот” за најдобра критика и есеј за книга за деца.
Институтот за наука, алтернатива, култура и уметност – Скопје, постои веќе неколку години и веќе има успешно реализирано повеќе проекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Националниот џез-оркестар ќе гостува на фестивалoт Сплитско лето

Националниот џез оркестар ќе гостува на еден од најзначајните културни настани во регионот – фестивалот „Сплитско лето“. Концертот ќе се одржи на 30 јули, на величествениот Перистил во Сплит, во организација на Хрватскиот народен театар.
Овој концерт ја отвора новата сезона на интернационални гостувања за Националниот џез оркестар, со кои оркестарот ја зацврстува својата позиција на меѓународната музичка сцена преку иновативен пристап и силна уметничка визија.
Публиката во Сплит ќе има ретка можност да ужива во уникатна програма што го поврзува современиот џез со традиционалното португалско фадо – во изведба на Националниот џез оркестар и извонредната вокалистка Мариа Мендеш, под диригентство на маестро Владимир Николов.
Соработката на Националниот џез оркестар со Мариа Мендеш започна со незаборавниот концерт во Скопје, во март оваа година. Вечер што нежно допре до публиката, благодарејќи на внимателната и чувствителна изведба која создаде посебна атмосфера.
Настапот на „Сплитско лето“ носи повеќе од музика – тој е израз на културна размена, меѓународна поврзаност и внимателно претставување на македонската уметничка сцена пред европската публика.
Култура
Две нови фестивалски селекции во Италија за „Јон Вардар“

Македонскиот долгометражен анимиран филм „Јон Вардар против Галаксијата“ продолжува со успешното фестивалско патешествие, со две нови селекции во Италија. Филмот ќе биде прикажан во главната програма на Ariano International Film Festival, каде што ќе има прајм-тајм проекција овој вторник, 29 јули, како и на International Tour Film Festival во Рим, во текот на октомври.
Двата фестивала имаат за цел да ја промовираат кинематографската уметност преку поттикнување на иновативни стилски пристапи и културна размена помеѓу различни народи и култури. Особено внимание се посветува на дела кои ја комбинираат уметноста со забава, едукација и современа визуелна експресија.
„Многу сум среќен што филмот продолжува да живее на фестивали низ Европа и светот. Италија е посебно значајна за мене, бидејќи е земја со богата традиција во анимацијата и филмската уметност. Овие селекции се уште една потврда дека и од малите земји можат да дојдат големи авантури,“ изјави режисерот Гоце Цветановски.
Овие нови селекции доаѓаат по италијанската премиера во мај на Cartoons on the Bay, најголемиот италијански фестивал за анимација, каде што „Јон Вардар против Галаксијата“ се натпреваруваше за Pulcinella Award, една од најпрестижните европски награди во областа на анимацијата.
Култура
Камерниот ансамбл „Консонанс“ настапи на Охридско лето

Камерниот ансамбл „Консонанс“ со концертот „Мозаик“ вчеравечер се претстави пред публиката на фестивалот „Охридско лето“.
Извонредните уметници, флејтистката Елена Дојчинова, Маја Чанаќевиќ која свири на англиски рог, кларинетистот Здравко Ангелов, Сашо Темелковски на бас-кларинет и Дарко Илиевски на хармоника кои се и професионални музичари во Македонската филхармонија, ја збогатија фестивалската програма на класична музика со дела напишани од македонски композитори.
Концертната вечер започна со „Минијатури“ од Благој Цанев, припадник на четвртата генерација македонски композитори.
-Ова е посебно дело што сакам да го потенцирам бидејќи токму на вчерашниот концерт доживеа премиерна изведба во оваа верзија и за овој ансамбл. Композицијата „Минијатури“ е дело од македонскиот композитор Благој Цанев којшто почина пред пет години и оваа година, ние, на овој начин, јубилејно ја одбележуваме петгодишнината од неговата смрт изведувајќи го ова дело во овој состав. Инаку, аранжманот за овој состав го направи неговиот внук, Филип Иванов, којшто е исто така композитор, вели Маја Чанаќевиќ.
Второто дело што го изведоа уметниците од Консонанс ансамбл „Мозаик“ е посветено и напишано токму за овој состав од Филип Иванов, кој припаѓа на најмладата генерација македонски композитори. На концертниот репертоар беа уште неколку композиции од композиторот Дарко Илиевски кого публиката во црквата „Света Софија“имаше можност да го види со својата хармоника како дел од овој ансамбл.
-Дарко Илиевски свири хармоника, но е и композитор кој пишува прекрасна музика што се базира на македонскиот фолклор. Тоа не се аранжмани на македонски фолклор, туку комплетно нови композиции кои само се инспирирани од македонскиот фолклор, појаснува Чанаќевиќ.
Според неа, „Охридско лето“ преку застапеноста на македонските музичари и композитори на фестивалската програма покажува дека негува посебен однос и почит кон македонското музичко творештво.
-Фестивалот „Охридско лето“ за нас музичарите во Македонија претставува врвот на нашата кариера. Настапот на „Охридско лето“ и со Македонската филхармонија се врвот којшто може да го достигнеме во нашата држава и сме навистина пресреќни поради тоа што директорот на фестивалот Ѓорѓи Цуцковски и селекторката Симона Ѓорчева годинава ни ја дадоа можноста и нè поканија да учествуваме на 65-издание на „Охридско лето“. Со тоа, тие покажуваат посебен однос и почит кон македонското музичко творештво, значи, не само кон македонските музичари, туку и кон македонското музичко творештво бидејќи на нашиот концерт беа изведени дела исклучиво од македонски композитори, додава Чанаќевиќ.
„Консонанс“, основан во 2007 година, е истакнат ансамбл кој на своите почетоци беше составен исклучиво од дрвени дувачки инструменти, но денес во својот состав вбројува и други инструменталисти кои го збогатуваат звукот на овој состав. Музичарите од ансамблот, кои имаат долгогодишно искуство, подеднакво се посветени на оркестарската, соло и камерната музика.