Култура
Почна Фестивалот на нов британски филм Play UK

Фестивалот на нов британски филм „PlayUK“ се отвори во четвртокво кино Милениум со премиерното прикажување на долгоочекуваното продолжение „Т2 Треинспотинг“.
Фестивалот беше официјално отворен од страна на британскиот амбасадор, Н.Е. Чарлс Гaрет.
Фестивалот на нов британски филм „PlayUK“, во организација на Британскиот совет од 16 до 19 февруари ќе ја собере филмската публика во Скопје, Белград, Подгорица, Призрен, Сараево и Тирана, премиерно прикажувајќи десет играни и документарни филмови од современата британска продукција. Документарецот за британското музичко влијание „Човекот од Mo’Wax“, комедија за станувањето возрасен, „Вештините во животот на возрасните“, моќна драма, „Уна“, документарец за ширењето на џихадот во современиот свет, „Признание“, се само некои од интригантните наслови кои ќе и ги претстават новите сили на британскиот филм на публиката ширум регионот.
Режисерот Дерик Борте во филмот „Градот Лондон“ (London Town) го прикажува животот на работната класа во предградијата на Лондон во 1979. Семејствата едвај врзуваат крај со крај, а невработеноста секојдневно расте. 14-годишниот Шеј Бејкер расте брзо, додека целото семејство се бори да не потоне и да се одржи на површината. Откако добива касета со најновата музика од Лондон, звукот на групата „Клеш“ го плени со својата сирова енергија и го влече кон новиот свет.
Моќната драма „Уна“ (Una) е дебитантски филм на режисерот Бенедикт Ендрјус. Сниман според претставата „Кос“, на Дејвид Херовер, „Уна“ носи емотивна приказна за млада жена која тргнува на романтично патување во потрага по нејзиното минато. Со очајна желба да дознае дали се уште му значи нешто на Реј, Уна ќе се појави кај него на работа и го соочува со болното минато кое прогонува. Нивната средба по 15 години ќе отвори безбројни рани и нерешени дилеми, и ќе се појават потиснатите страст и копнеж. Слоевите лаги, забранетата љубов и неочекуваната средба се закануваат да ја сменат насоката на нивните животи. Настапуваат Руни Мара, Бен Менделсон и Риз Ахмед.
„Признание“ (The Confession) е првиот игран документарец на Ашишија Гадиалија. Филмот ја следи приказната на Мозам Бег, муслиман од Англија кој минал низ безбројни конфликти. Од обезбедување на поддршка на муџахедините, преку притворање во затворот Баграм во Авганистан и во Гвантанамо, бунтовничка обука во кампови во Сирија, до ќелиите на затворот Белмарш во Британија, Мозам Бег ни овозможува приказна од прва рака за ширењето на џихадот во денешниот свет и реакцијата на Западот.
Џастин (Бри Ларсон) организира состанок меѓу двајца Ирци (Силијан Марфи, Мајкл Смајли) и банда на чело со Вернон (Шарлто Копли) и Орд (Арми Хамер) во еден напуштен магацин во Бостон во ’70-те. На состанокот расте притисокот затоа што продаденото оружје е дефектно и неочекувано е испукан куршум…Тука следи борбата за опстанок во следниот час и половина на филмот „Слободна стрелба“ (Free Fire). Мартин Скорсезе и Ема Тилингер Коскоф се извршните продуценти на филмот, додека режисер е Бен Витли.
Во „Боби Сендс: 66 дена” (Bobby Sands: 66 Days) е документиран обичниот живот во центарот на турбулентниот и трагичен конфликт, кој се претвора во необичен кога младиот идеалист гладува до смрт за да го зачува интегритетот на републиканското движење на кое верно му служел. Филмот покажува како Сендс ја зема судбина во свои раце и се издигнува до статус на меѓународен херој.
Во летото 1983-та, неколку дена пред да се роди нивниот прв син, писателот и теолог Џон Хал ослепел. За одново да ја најде смислата на животот, тој започнал да води дневник на аудио касети. Ремек делото „Белешки за слепилото“ (Notes on Blindness) го истражува внатрешниот свет на слепилото, врз основа на оригиналните снимки на Џон Хал и прикажува „свет над видот“ вклучувајќи ги и соништата, сеќавањето и имагинарниот живот.
Во комедијата „Вештините во животот на возрасните“ (Adult Life Skills) станува збор за Ана, која се ближи кон 30-те и живее како испосник во градината на мајка ѝ снимајќи видеа во кои нејзините палците се актери. Универзалната приказна за самодовербата и гордоста ќе ги натера на смеа и најладнокрвните, но исто така ќе го постави и прашањето „Како некој да си го најде мирот во себе?“.
На списокот на „PlayUK“ ќе биде документарниот филм „Човекот од Mo’Wax“ (The Man from Mo’Wax), кој го прикажува впечатливиот живот и кариера на диџеј иконата, музичкиот продуцент Џејмс Лавел. На филмот се појавуваат диџеј Шедоу, 3Д од Масив Атак, Футура, Иан Браун, Гранмастер Флеш и Џош Хоми.
Четиридневниот фестивал за новиот британски филм „PlayUK“ исто така го носи и филмот „Најдоброто од нив“ (Their Finest), кој е хумористичен и романтичен поглед на една млада жена која го наоѓа нејзиниот пат во хаосот на војната, но исто така ги открива и филмовите. Хероината Кетрин (Гема Артертон) во Лондон во 1940, работи како сценарист и се обидува да ги организира актерите и филмската екипа за да снимаат филм кој треба да го крене духот на нацијата, но истовремено и да ја инспирира Америка да влезе во војната.
Филмовите кои ќе се прикажат за време на четирите дена во шест градови од регионот во рамките на фестивалот „PlayUK“ ја слават човековата издржливост и способноста за изнаоѓање вистински одговори и решенија во тешки времиња./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
МНТ, 80 години – приказни поголеми од времето

Театарот е место каде што се случува нешто исклучително.
Тука се преплетуваат режисерските идеи; најсилно чука актерското срце; се слуша зборот на драматургот; шепотот на суфлерот; сценографите, костимографите и композиторите ја оплеменуваат сцената со својот креативен израз; светлото, дизајнот и тонот создаваат магија; големиот број луѓе зад сцената се секогаш посветено тука; а менаџерскиот тим е тука да ја поддржи секоја идеја.
Се создава магија, а публиката го восприема секој атом на театарската уметност.
Македонскиот народен театар е сила што опстојува 80 години!
Култура
Теодор Јаневски ја доби наградата за најдобар млад џез-музичар „Гоце Димитровски“

Годинешното 8. по ред издание на Џез фактори фестивалот, ќе се одржи од 17-ти до 19-ти април со настапот на повеќе реномирани џез музичари од Македонија и странство во Народниот театар и Центарот за култура Битола.
Наградата за најдобар млад џез-музичар во 2024 година, која го носи името на легендарниот „Гоце Димитровски“, годинава ја добива Теодор Јаневски – дипломиран џез-тапанар на Џез Одделот на Музичката академија при Универзитетот Гоце Делчев – Штип. Наградата традиционално се доделува во соработка со Општина Битола и ќе биде врачена на 19.04.2025 година, во 20 часот, на сцената на Народниот театар од Битола.
„Ја користиме оваа прилика да му ја честитаме наградата на младиот Теодор и да му посакаме многу успеси во професионалната кариера“, истакнува директорот на Џез фактори фестивалот, професорот Сашо Поповски. Досегашни добитници на наградата се: 2020 Александар Ванчовски – тапани 2021 Филип Динев – гитара 2022 Александар Бошков – гитара 2023 Јован Цветковиќ – пијано 2024 Давид Скерлевски – пијано 2025 Теодор Јаневски – тапани.
Годишно фестивалот реализира 9 концерти и 5 пратечки настани на сцената на Народен Театар Битола, Центарот за култура, како и локалните клубови и културни сцени со посетеност од над 2000 посетители.
Култура
Краткометражниот анимиран филм „Неми филмови“ на Крсте Господиновски во официјална селекција на најстариот фестивал за анимирани филмови „Анеси“ во Франција

Новиот краткометражен анимиран филм на македонскиот автор Крсте Господиновски, „Неми филмови“, во продукција на Фокус Покус Филмс и Флип Бук Продакшнс и поддржан од Агенцијата за филм, премиерно ќе биде прикажан во официјалната селекција на овогодинешното издание на најпрестижниот и најстар фестивал за анимирани филмови Анеси во Франција.
Од 3900 филмови пријавени од сите континенти, „Неми филмови“ ќе се натпреварува со уште 70 филмови за една од најзначајните награди во светот на анимацијата. Успехот на екипата предводена од Господиновски претставува значаен исчекор за македонската авторска анимација, бидејки ова е првиот македонски филм по „Адам“ на Петар Глигоровски од 1977 г. кој успева да биде вклучен во официјалната селекција на фестивалот.
Филмот е работен по сценарио на Крсте Господиновски, Жарко Иванов и Димитар Димоски, кое е инспирирано од истоимениот расказ на Димитар Димоски, награден на книжевниот конкурс на „Нова Македонија“. Како продуценти се јавуваат Димитар Димоски и Дарко Попов, а копродуценти се Жарко Иванов (Флип Бук Продакшнс) Раду Николае и Дорин Стелеску (Опал Продакшн). Жарко Иванов исто така е Директор на анимација заедно со Гоце Господиновски. За кинематографијата се потпишуваат Горан Наумовски, Димо Попов, Крсте Господиновски, дизајнер на звукот е Горан Петровски, композитор на музика е Владимир Лукаш. Сценографијата е на Крсте Господиновски, Викторија Динева и Тамара Радојковиќ, која исто така е и асистент на режија.
„Неми филмови“ е приказна за едно мало кино сместена на залезот на немото доба, каде една поранешна филмска ѕвезда, маскирајки ја својата згасната слава, решава да проектира исклучиво неми филмови. Неговиот син спокојно расне во овој илузорен свет, несвесен за промените што се одвиваат вон неговите ѕидови, сè дур едно необично откритие не ги разниша неговите уверувања, нарушувајќи го веќе кревкиот однос со неговиот татко.
Филмот е изработен во техниката куклена стоп анимација и она што го прави исклучително специфичен е фактот што целиот филм е изработен во еден непрекинат кадар.
Шеесет и четвртото издание на Анеси ќе се одржи од 8-ми до 14-ти јуни во Анеси, Франција. Освен на Анеси, филмот ќе биде прикажан и на педесет и третото издание на престижниот Анимафест Загреб, уште еден од најзначајните фестивали за анимиран филм во светот.
„Неми филмови“ наскоро премиерно ќе биде прикажан и пред македонската публика.