Книги
Промоцијата на новата поетска збирка на Ана Голејшка – „Напишан дом“

Промоцијата на новата поетска збирка на Ана Голејшка, насловена „Напишан дом“, ќе се одржи денеска во кафулето „Винил“ со почеток во 20 часот. Покрај авторката, на промоцијата стихови од збирката ќе читаат македонските поети Ѓоко Здравески, Биљана Стојановска и Снежана Стојчевска. Збирката „Напишан дом„ е еден од четирите нови поетски наслови што непосредно пред Саемот на книгата излегоа како дел од едицијата „Огнови“.
Создавана во неколку различни поглавја од животот и во неколку различни фази од растењето на еден внатрешен и еден надворешен дом, оваа стихозбирка изобилува со емотивни напливи како во бран, но и како нежно застанување на улица покрај излог со колачи. Поетскиот занос и желба за зачувување на домот како топоним врзан за телесноста, но и за ослободувањето од него во овие страници се во изобилие напишани. Лесно и впивливо, како крем за сончање во врел месец. Читајќи ја оваа книга, добивате гратис љубов и желба да го спасите маалското кутре, но и да се налутите на автобусите што доцнат. Купувајќи ја оваа книга, си подарувате нов дом – за читање и за уживање. Но и за подарување. Клуч од нова врата кон поезијата на Ана Голејшка и нејзините приватни растења.
Дел од најновата продукција на „Антолог“ е и најновиот поетски ракопис на Јосип Коцев – „Сега е најдолгото никогаш„, книга што би можела да се чита како љубовна поема, како поетска партитура во три става („Сега“, „Никогаш“ и „Најдолгото никогаш“). Кога ги читаме песните на Јосип Коцев му се радуваме на поетското „сега и тука“, со леснотија доловено во секоја поетска слика. Речиси на секоја нова страница нè дочекува една убава стапица: сакаме пак да ја препрочитаме веќе прочитаната песна, но едновремено сакаме да свртиме и нова страница за да ја видиме следната, а се добива впечаток дека песните се прелеваат една во друга и како заедно да создаваат една поголема поетска синтеза. Затоа, оваа книга не е само стихозбирка (некаков збир и одбир на песни и стихови), туку заокружена поетска целина од педесетина песни.
Во едицијата „Огнови“ е реобјавена и дебитантската збирка поезија од Дарко Лешоски, под наслов „Дете од лоша фамилија“ – луцидност и страст суштински преточени во поезија на урбаното секојдневје. Специфичен, остар и многу силен поетски пристап пренесен од обичен човек. Лешоски е автор што пишува од дното на душата. Преку 69 одделни поетски сегменти гласно зборува за љубовта, страдањето, начнувајќи ги трагедијата, самотијата, борбата, смртта, тегобноста! Теми колку блиски до поетот, толку и до читателот. Песни во кои неминовно се чувствува хибридноста на љубовта видена во сите форми. Во секој напишан стих се чувствува неговиот внатрешен хаос, сфатен преку симболичка димензија.
Неодамна излезе и „По трагата на белиот грифон„ од Стефан Марковски, вистинско зрело остварување на овој млад автор. Во оваа книга се мешаат митологијата и современието, имагинарното и реалното, игриво обликувајќи ги постојните и непостојните светови. Станува збор за петта поетска збирка на Марковски, која компилира 45 песни неподелени во циклуси. Комбинација на митологија, револуција, анархија, богови, земјени самовили и Недојдија. Дали митолошките суштества наоѓаат место во реалноста? Дали шетаат меѓу нас? Но само со „луцидна халуцинација“ можеме да ги забележиме и да ги почувствуваме. Марковски гради игрив облик на (не)постојните светови!
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Книги
Промоција на книгите „Историја на човештвото“ од Џани Родари и „Визуализација на современата македонска книжевност“ од група автори

На 29 април во 18 часот во Студентскиот културен центар ќе се одржи промоција на книгите „Историја на човештвото“ од Џани Родари и „Визуализација на современата македонска книжевност“ од група автори.
Двете изданија се резултат на соработката меѓу студентите и наставниот и соработничкиот кадар од Факултетот за ликовни уметности, Филолошкиот факултет „Блаже Конески“ и Машинскиот факултет при Универзитетот „Св. Кирил и Методиј“ во Скопје.
Издавањето на книгите е поддржано од Инситутот „Данте Алигиери“ во Скопје, Здружението Данте Алигиери во Рим и Министерството за култура и туризам.
Книги
Книгата „Мајсторот“ од Димитар Башевски објавена во Софија

Во издание на издавачката куќа „Изида“ од Софија, деновиве е објавена книгата раскази мајсторот од Димитар Башевски. Тоа е трета книга од Башевски објавена во Бугарија. Претходно објавени се неговите романи „Бунар“ и „Круг“. Преводот на книгата „Мајсторот“ од македонски на бугарски јазик е на Тања Попова.
Во текстот кон објавената книга се вели дека „Димитар Башевски го води читателот на книжевно патување низ длабоките слоеви на човечките емоции и вечните потраги. Со екстремна леснотија и чувство за јазични нијанси, авторот слика живописни слики на љубов, страст и копнеж кои се испреплетени со огромните прашања за смислата на животот и човечкото место во светот“.
Димитар Башевски е автор на дваесеттина книги проза и поезија. Добитник е на највисоките книжевни и општествени награди во земјата. Неговите книги се преведувани и објавувани на повеќе европски јазици.
Книги
МАИ ги додели наградите за изданијата меѓу два Саеми на книга

Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).