Култура
Црниот бран во српскиот филм во Кинотека
![](https://makfax.com.mk/wp-content/uploads/2016/11/82d3590f-5f14-4d71-aaf2-d0d102b09ff3-1.jpeg)
Со проекцијата на „Капки, води, војници“ на Марко Бабац, Живојин Павловиќ и Воислав Кокан Ракоњац од утре, 13 ноември, па се‘ до 21 Кинотеката на Македонија започнува со прикажување на филмската ревија Црниот бран во српскиот филм
Ревијата ги опфаќа најзначајните од ноар југословенските филмови. До 21 следуваат проекциите на: документарниот „Забранети без забрана“ (2007) на Милан Никодијевиќ и Динко Туцаковиќ; „Кога ќе бидам мртов и бел“ (1967) на Живојин Павловиќ; „Наскоро ќе се случи пропаст на светот“ (1968) на Душан Макавеев; „Рани трудови“ (1969) на Желимир Жилник; „Љубовен случај или трагедија“ (1967) на Душан Макавеев; „Парада“ (1962) на Душан Макавеев, „Утро“ (1967) на Младомир Пуриша Ѓорѓевиќ, „Чавки“ (1969) на Љубиша Козомара и Гордан Михиќ; „Будење на стаорците (1967) на Живојин Павловиќ, „Собирачи на пердуви“ (1967) на Александар Петровиќ.
Гостин на Кинотеката по овој повод ќе биде проф. Марко Бабац еден од авторите од црниот бран. Бабац е филмски режисер, монтажер и професор на Академијата за филм во Белград, а покрај другото е основач на Катедрата за филмска и ТВ монтажа во Бања Лука. Автор е на учебниците „Техника на филмската монтажа“ (1876, 1986, 1997 год.) и „Јазикот на подвижните слики“ (2000 год.). Главен уредник е на „Лексиконот на филмски и телевизиски поими“ (1993, 1997 год.). Ги објавил и книгите „Кино клуб – Белград“ (2001 год.) и „Сомнабулен филм“ (2004 год.). За време на посетата на Македонската кинотека проф. Бабац ќе одржи три предавања:1. Црниот филм во југословенската кинематографија. (петок 13 ноември, ФДУ, 17 часот)Отворени предавања:2. Визуелната природа на филмот, предавање посветено на Славко Воркапиќ со проекција на филмовите: „Живот и смрт на холивудскиот статист 9413“, „Пештерата на Фингал“ и „Шума шумори“. (сабота 14 ноември, Кинотека, 11 часот)3. Предавање посветено на Мери Пикфорд со проекција на филмот „На споредната врата“. (сабота 14 ноември, Кинотека, 16 часот)
Црниот бран во српскиот/југословенскиот филм се јавува на почетокот на 60-те, кога се почувствувало некоја привидна либерализација на јавниот живот во СФРЈ. Црниот бран бил одговор на дилетантизмот и уметниците кои биле склони кон социјалистичката естетика. Она што е карактеристично за овие филмови е песимизмот, на моменти и морбидна атмосфера, егзистенцијалната беда. Никаде на друго место, југословенската реалност не била опишана на толку брутален начин како во ноар филмовите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Култура
„Нови хоризонти“: изложба на Зоран Арсовски-Бабата во Крива Паланка
![](https://makfax.com.mk/wp-content/uploads/2024/06/thumbnail_FB_IMG_1718970816094.jpg)
На 20 јуни од 19.30 часот во НУЦК Крива Паланака беше отворена самостојна изложба на слики на современиот академски визуелен уметник Зоран Арсовски – Бабата со наслов „Нови хоризонти“ којашто е во рамките на манифестацијата Крива Паланка град на културата за 2024 година, а проектот е поддржан од Министерството за култура.
На отвореното на изложбата беа присутни многу љубители на уметноста а се обрати и авторот на Арсовски кој беше поздравен со долг громогласен аплауз.
Изложбата за посетителите ќе биде поставена до 1 јули а влезот е слободен.
Култура
Изложба на слики, цртежи и принтови од Суире Магали Симоне и Сергеј Јордановски во КИЦ
![](https://makfax.com.mk/wp-content/uploads/2024/06/thumbnail_Plakat-creart-UMETNIK-VO-PRESTOJ.jpg)
Културно-информативниот центар – Скопје најавува отворање на изложбата на слики, цртежи и принтови од Суире Магали Симоне (Франција) и Сергеј Јордановски (Македонија).
Изложбата на ликовните уметници Суире Магали Симоне од Франција и Сергеј Јордановски од Македонија е во рамките на меѓународниот уметнички проект на вмрежени градови од Европа „КРЕАРТ – Уметник во престој“ подржана од градот Скопје како еден од градовите учесници.
На изложбата авторите ќе се претстават со 20 дела создадени во просториите на уметничкото атеље на ЈУ КИЦ Скопје.
ЈУ КИЦ Скопје веќе петта година го организира овој меѓународен проект во кој до сега учествуваа уметници од Хрватска, Италија, Латвија и Македонија.
Изложбата ќе биде отворена до 10.07.2024 година.
Култура
Изложба „Врзино“ на Стефан Анчевски во Куманово
![](https://makfax.com.mk/wp-content/uploads/2024/06/thumbnail_СТЕФАН-ПЛАКАТ-2024.jpg)
На 27 јуни, четврток, со почеток во 19,30 часот во Изложбениот салон на НУ Центар за култура “Трајко Прокопиев“ -Куманово ќе биде отворена изложбата “Врзино“ од авторот Стефан Анчевски. Изложбата содржи триесетина дела во вид на интегрирана sидна инсталација.
Стефан Анчевски (Куманово, 1993) е визуелен и мултимедијален уметник. Дипломирал графика на Факултетот за ликовни уметности во Скопје при универзитетот „Св. Кирил и Методиј“. Има реализирано свои осум самостојни изложби, учествува на преку 100 групни изложби и прикажувања во земјава и странство. Член на ДЛУБ (2022) и ДЛУМ (2023). Живее и работи во Куманово. Во 2014 г. и 2023 г. добитник е на прва награда „TrashForArt“ и прва награда „Let’s bring justice closer to citizens“ во 2023 г. – COE – Национална галерија Мала Станица – Скопје.
За неговото творештво професорот Звонко Павличиќ ќе запише:
“…Вродената дарба на младиот сликар и графичар Стефан Анчевски ги прерасна неговите творечки стремежи за сопствено воздигнување и афирмација. По стекнатото ликовно образование, Анчевски систематски и внимателно ја одредува појдовната точка за своето творештво, каде што формира графички претстави, облици и симболи, вклучително и неговата духовна, мисловна и емоционална перцепција.
Карактеристично за неговиот начин на размислување како автор е тоа што тој настојува најважните уметнички елементи да ги спои во една хармонична целина со својот уметнички облик на комуникација и остварен визуелен и наративен израз, а со тоа постигнувајќи свој ликовен интегритет. Анчевски има тенденција да ги перципира елементите како подвижни линии, кои укажуваат на патеката по која се создаваат исклучителни оптички трикови – илузии.
Преку многу експерименти ги создал своите оригинални уметнички вредности и дошол до сознание дека главниот феномен на една слика е неговата визуелно – графичка комуникација. Сликарскиот простор не го гради според принципот на разбирање на нештата и гледиштата, туку со нанесување на повеќе слоеви боја, испрекинати потези, стремејќи да ја нагласи транспарентноста и еластичноста на бојата, каде што продира светлината што доаѓа од позадината на сликата.
Цртежот на неговите платна се појавува доследно, но не толку очигледно, понекогаш служи за истакнување на просторните димензии, а неколку пати линијата се претвора во навидум имагинарна слика. За да ги оствари и реализира своите креативни идеи, покрај класичната примена на боите, на основата на сликата уметникот користи непосредни решенија при изразување на површината, но со различни технолошки процедури (употреба на разни природни смоли и лепила, импрегнација на песок, битумен, силиконски и акрилни маси…), каде што се постигнува одредена обоеност, структура/текстура и каде што формите се повеќе или помалку зависни од материјалот што уметникот го користи во своето дело.
Сликарството како медиум му значи многу повеќе од само доследно пренесување на видлив феномен на сликовита основа, бидејќи се смета дека свесно ги исклучува оние детали кои не се клучни носители на неговата уметничка порака и дека, пред се, тој се потпира на суштината и есенцијата на виденото и доживеаното.
Изложбата ќе биде поставена до 10. 07. 2024 г.